وتباسى كۇنىنە وراي پاۆلودار وبلىسىندا 554 وتباسىنا كومەك كورسەتىلدى. وبلىس اكىمى باستاعان قايىرىمدىلىق اكتسياسىن وڭىردەگى مەملەكەتتىك قىزمەتشىلەر, كاسىپكەرلەر, دەمەۋشىلەر مەن ءماسليحاتتار دەپۋتاتتارى قولدادى. ازىق-ت ۇلىك جيىنتىقتارىنان باسقا از قامتىلعان وتباسىلاردىڭ قاجەتتىلىگى ءۇشىن 35,5 توننا كومىر, 24 توننا ءشوپ, 55 تەكشە مەتر وتىن ءبولىندى جانە قارجىلاي كومەك كورسەتىلدى.
جۋىقتا پاۆلودار-شارباقتى تاس جولىندا ورتكە ورانعان اۆتوكولىكتەن ءتورت ادامدى الىپ شىعىپ, ومىرلەرىن قۇتقارىپ قالعان ەركەبۇلان جۇزباەۆتىڭ ۇيىنە بارعان ايماق باسشىسى ونىڭ باتىرلىق ارەكەتىنە قانداي ماقتاۋ ايتسا دا جاراساتىنىن جەتكىزدى. ەرلىك جاساعان ازاماتتى «وبلىس الدىندا سىڭىرگەن ەڭبەگى ءۇشىن» بەلگىسىمەن ماراپاتتادى. وتباسى كۇنىمەن قۇتتىقتاپ, وتاعاسىنا قارجىلاي سەرتيفيكات تاپسىردى.
– ءسىزدىڭ جاساعان ەرلىگىڭىز جۇرتقا ۇلگى بولۋى كەرەك. وبلىسىمىزدا اينالاسىنداعى ادامداردىڭ تاعدىرىنا بەيجاي قارامايتىن ءسىز سياقتى ازاماتتاردىڭ بار بولعانىن ماقتان ەتەمىن. ءوڭىر تۇرعىندارى اتىنان ەرلىگىڭىز ءۇشىن العىس بىلدىرەمىن, – دەدى ابىلقايىر سقاقوۆ.
ەستەرىڭىزدە بولسا, قىركۇيەك ايىنىڭ باسىندا كراسنوارمەيكا ستانساسىندا تەمىر جول مونتيورى بولىپ جۇمىس ىستەيتىن ەركەبۇلان جۇزباەۆ ورتكە ورانعان كولىكتەن ءتورت ادامدى قۇتقارىپ قالعان بولاتىن. اپات پاۆلودار – شارباقتى اۆتوجولىنىڭ مارالدى ستانساسى ماڭىندا بولعان. Audi 100 كولىگى كاماز-دىڭ تىركەگىشىنە سوعىلىپ, كەيىننەن ورتەنە باستاعان.
42 جاستاعى ەركەبۇلان جۇزباەۆ زايىبىمەن بىرگە ەكى قىز تاربيەلەپ وتىر. قازىر ول وتباسىمەن تۇرىپ جاتقان باسپاناسىن جوندەۋدە. سىيلىق قاراجاتتى قۇرىلىس ماتەريالدارىن ساتىپ الۋعا جۇمسايمىن, دەيدى وتاعاسى.
پاۆلودار وبلىسى,
شارباقتى اۋدانى
