ينسۋلت ورتالىعىن قۇرۋ جوعارى بىلىكتى مەديتسينالىق كومەكتى ۋاقتىلى كورسەتۋگە مۇمكىندىك بەرەدى جانە ميداعى قان اينالىمى جۇيەسىنىڭ اقاۋى بار پاتسيەنتتەر ءۇشىن كورسەتىلەتىن قىزمەتتەردىڭ قولجەتىمدىلىگىن ارتتىرادى. بولىنگەن قاراجاتقا دياگنوستيكالىق زەرتتەۋلەرگە ارنالعان قۇرال-جابدىقتار ساتىپ الىنادى, عيماراتتارعا جوندەۋ جانە تەحنيكالىق دايىندىق جۇرگىزىلەدى. وبلىس ورتالىعىنان شالعاي اۋدانداردىڭ 100 مىڭعا جۋىق تۇرعىنى جەدەل جاردەممەن قامتىلادى.
ء«بىز بولات وتەمۇراتوۆ قورىنا اۋليەكول, ناۋرىزىم جانە قاراسۋ اۋداندارىنىڭ تۇرعىندارىنا قىزمەت كورسەتەتىن ينسۋلت ورتالىعىن اشۋ جايلى وتىنىشىمىزگە جىلدام شەشىم قابىلداعانى ءۇشىن العىسىمىزدى بىلدىرەمىز. زارداپ شەككەن وتباسىلارعا اتاۋلى كومەك كورسەتكەنى ءۇشىن قورعا ءوز اتىمنان العىس ايتامىن», دەدى قوستاناي وبلىسىنىڭ اكىمى ارحيمەد مۇحامبەتوۆ.
ورتتەن زارداپ شەككەندەرگە ماتەريالدىق جاردەم «كومەك كارتاسى» جوباسى ارقىلى كورسەتىلەدى. بۇل – بولات وتەمۇراتوۆ قورى, قازاقستاننىڭ قىزىل جارتى اي ۇيىمى جانە ForteBank-ءتىڭ بىرلەسكەن باستاماسى. تابيعي جانە تەحنوگەندىك اپاتتاردان زارداپ شەككەن ادامدارعا ۋاقتىلى قولداۋ كورسەتۋدى كوزدەيتىن جوبا 2018 جىلدان باستاپ جۇمىس ىستەيدى. 2022 جىلى كورسەتىلگەن كومەكتىڭ جالپى سوماسى 2 ملرد 500 ملن تەڭگەدەن اسادى. بۇعان دەيىن 2022 جىلى اقتوبە, باتىس قازاقستان, پاۆلودار جانە ماڭعىستاۋ وبلىستارىنداعى سۋ تاسقىنىنان زارداپ شەككەن 6 200-دەن استام ادامعا جاردەم بەرىلدى.
ەستەرىڭىزگە سالا كەتەيىك, بۇعان دەيىن بولات وتەمۇراتوۆ قورى 25 مەديتسينالىق مەكەمەگە ءتۇرلى جوبالار بويىنشا كومەك كورسەتكەن. ولار ءۇشىن رەانيموبيلدەر, وكپەنى جاساندى تىنىستاندىرۋ اپپاراتتارى, ناركوزدى-تىنىس الۋ اپپاراتتارى, جاڭا تۋعان نارەستەلەرگە ارنالعان كۋۆەزدەر جانە باسقا دا مەديتسينالىق جابدىقتار ساتىپ الىندى.
