«ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت. مەن ءۇشىن مەملەكەت مۇددەسى بارىنەن بيىك. سوندىقتان مەن وكىلەتتىك مەرزىمىمدى قىسقارتۋعا جانە كەزەكتەن تىس پرەزيدەنت سايلاۋىنا بارۋعا دايىنمىن», دەدى قاسىم-جومارت كەمەل ۇلى.
شىنىن ايتايىن, مۇنداي ماندەگى مالىمدەمەنى مەن وزگە قوعام مۇشەلەرىمەن بىرگە كۇتكەن ەدىم. پرەزيدەنت پەن ۇكىمەتتىڭ سەنىمدى جانە جوسپارلى جۇمىسى ءۇشىن قوعامداعى جاعداي تۇراقتى بولۋعا ءتيىس. ءاربىر سايلاۋدا دەموكراتيالىق دامۋىمىزعا باسقا قىرىنان ۇڭىلۋگە, حالىقتىڭ تالاپ-تىلەگىنىڭ جاڭا توعىسۋلارىن بايقاۋعا مۇمكىندىك الامىز. بيىل ماۋسىم ايىندا اتا زاڭىمىزعا ەنگىزىلگەن وزگەرىستەردى جۇزەگە اسىرۋدىڭ كەزەڭى وسى جولداۋدان باستالاتىنى ايقىن اڭعارىلدى. باستى زاڭىمىز قۋاتتى بولۋى ءۇشىن ول باسقا زاڭداردان ۇستەم بولۋى كەرەك.
الدا ىسكە اساتىن رەفورمالار اۋقىمدى, ءارى قامتيتىن سالالارى دا از ەمەس. اسىرەسە, بەلسەندى جاستارىمىزعا جاسالاتىن قولداۋ تۇرلەرى, ولارعا مولشەرلەمەسى تومەن نەسيە بەرۋ, رەفورمالاردى جۇزەگە اسىرۋدىڭ جاڭاشا تەتىكتەرىن ەنگىزۋ, الەۋمەتتىك كومەك تۇرلەرىن ۇلعايتا وتىرىپ, حالىقتىڭ تابىسىن ارتتىرۋ ماسەلەلەرى قوعام ءۇشىن اسا وزەكتى. سوندىقتان ماڭىزدى قۇجات بۇل جاعىنان العاندا اسا قۇندى. كەلەشەكتە جەمقورلاردىڭ زاڭسىز تاپقان قارجىسى ولار سوتتالعان سوڭ مەملەكەتكە ءوتىپ, تۇگەلدەي مەكتەپ قۇرىلىسىنا جۇمسالۋعا ءتيىس دەگەن تاپسىرماسى دا جۇرەككە جىلى ءتيدى.
يۋري كولەسنيكوۆ,
زاڭ عىلىمدارىنىڭ كانديداتى,
س.تورايعىروۆ مەملەكەتتىك ۋنيۆەرسيتەتىنىڭ دەكانى
پاۆلودار وبلىسى
