جۋرناليستەردىڭ حالىقارالىق ىنتىماقتاستىعى كۇنىنە وراي وتكەن جيىن بارىسىندا قازاقستانداعى نيدەرلاند كورولدىگى ەلشىسىنىڭ ورىنباسارى ناۋت ۆان ۆاۋدەنبەرگ ءسوز بوستاندىعى, ادام قۇقىعى, ازاماتتىق قوعامدى دامىتۋعا قاتىستى پىكىر ءبىلدىرىپ, قۇتتىقتاۋ ءسوزىن ارنادى.
ءتورتىنشى بيلىك وكىلدەرىن تولعاندىرىپ وتىرعان كوكەيكەستى ماسەلەلەرگە قاتىستى سۇراقتارعا اقپارات جانە قوعامدىق دامۋ مينيسترلىگى باق سالاسىنداعى مەملەكەتتىك ساياسات دەپارتامەنتىنىڭ ديرەكتورى جاسۇلان ومىراليەۆ جاۋاپ بەرىپ, «مەديا زاڭنامانى جەتىلدىرۋ ەلىمىزدىڭ ساياسي مودەرنيزاتسياسىنىڭ كەشەندى ماڭىزدى بولىگى» تاقىرىبىنا بايانداما جاسادى. بايانداماسىندا ول باق تۋرالى زاڭ جوباسىندا قامتىلىپ وتىرعان ماسەلەلەرگە توقتالدى.
وسى ورايدا ء«ادىل ءسوز» ءسوز بوستاندىعىن قورعاۋ حالىقارالىق قورىنىڭ ديرەكتورى تامارا كالەەۆا ازاماتتىق قوعام وكىلدەرى تاراپىنان ۇسىنىلعان بىرقاتار ماسەلەنىڭ ەسكەرىلمەي وتىرعانىن جەتكىزدى. بۇل ايتىلعانداردىڭ قاتارىندا باق-تىڭ باسەكەگە قابىلەتتىلىگىن ارتتىرۋعا كەدەرگى كەلتىرەتىن جايتتار بار.
گ.بەنديتسكي اتىنداعى قوردىڭ ديرەكتورى ساپا مەكەباەۆ جۋرناليستىك زەرتتەۋلەردىڭ شىنايىلىعى ءارى اشىقتىعى, ءاربىر مەديا وكىلىنىڭ ءوز ىسىنە ادالدىعى, تاپسىرىسپەن جازىلعان ماقالانىڭ ءجۋرناليستىڭ اتىنا سىن ەكەنىن اتاپ وتسە, «ساپمار» جشس ديرەكتورى مارات اسيپوۆ مەملەكەتتىك اقپاراتتىق تاپسىرىسقا قاتىستى ماسەلەلەرگە توقتالدى. ال مەديا زاڭگەر يگور لوسكۋتوۆ جۋرناليستەردىڭ قاۋىپسىزدىگىنە كەپىلدىك بەرەتىن حالىقارالىق ستاندارتتاردى ەنگىزۋ ماسەلەسىن كوتەردى. وسى ورايدا ءتارتىپ ساقشىلارىن دايارلايتىن جوعارى وقۋ ورىندارىندا ارنايى كۋرستار ەنگىزۋدى ۇسىنعان ساراپشى بۇل باعىتتاعى اقپاراتتار باق وكىلدەرىنە قۇرمەتپەن قاراۋعا ىقپال ەتەتىندىگىن ايتتى.
نارىقتاعى مەنشىك ماسەلەسى, مەملەكەتتىك مەديانى قارجىلاندىرۋ, دەمونوپوليزاتسيا ماسەلەسىن قوزعاعان Internews مەديا زاڭگەرى ولگا ديدەنكو مەديانى سەنىمدى ينستيتۋت رەتىندە قاراستىرا كەلىپ, ساپالى كونتەنتتى كۇشەيتۋدە ءوزىن-ءوزى رەتتەۋ تۇرعىسىنان العاندا مەملەكەتتىك باسقارۋ, قوعام جانە بيزنەسپەن تىعىز ارىپتەستىكتە ناتيجەلى رەفورمالارعا قول جەتكىزۋگە بولاتىنىن اتاپ ءوتتى.
«تۇركىتىلدەس جۋرناليستەر قورىنىڭ» پرەزيدەنتى ءنازيا جويامەرگەن بايانداماسىندا ەلىمىز وڭىرلەرى بويىنشا جۇرگىزگەن الەۋمەتتىك زەرتتەۋلەرگە توقتالدى. ساراپشىنىڭ ايتۋىنشا, جاۋاپ بەرگەندەردىڭ 97 پايىزى باق-تا جاريالاۋعا رۇقسات ەتىلمەيتىن تاقىرىپتاردىڭ بار ەكەندىگىن العا تارتقان. بۇل, اسىرەسە بيلىك وكىلدەرىنىڭ ارەكەتىنە, جەمقورلىققا قاتىستى زەرتتەۋلەرگە بايلانىستى. ال ساۋالداماعا قاتىسقان جۋرناليستەردىڭ 92 پايىزى ماقالا جازۋ بارىسىندا كەيبىر اكىمدىكتەر تاراپىنان قىسىم كورسەتىلەتىنىن, ايماقتارداعى جۋرناليستەردىڭ جالاقىسىنىڭ ازدىعى بيۋدجەتتىك قولداۋ مەن دەمەۋشىلەردىڭ قارجىسىنا تاۋەلدى ەتەتىنىن اتاپ وتكەن. «وسى ورايدا مەملەكەتتىك تاپسىرىس تولىعىمەن اشىق بولۋ قاجەت», دەگەن PR-مامان اسەل قاراۋلوۆا جاريالاناتىن ماتەريالدا تاپسىرىسپەن جازىلعاندىعى جايىندا مالىمەت كورسەتىلۋگە ءتيىس ەكەندىگىن العا تارتتى.
دوڭگەلەك ۇستەلدە, سونىمەن قاتار بايلانىس جانە اقپارات جونىندەگى مامان سەرگەي كارپوۆ يۋنەسكو-نىڭ ءباسپاسوز بوستاندىعى, جۋرناليستەردىڭ, ونىڭ ىشىندە ايەل جۋرناليستەردىڭ قاۋىپسىزدىگىنە بايلانىستى اقپاراتتاردىڭ قولجەتىمدىلىگىنە توقتالدى. اسىرەسە مەملەكەت پەن باق اراسىنداعى اشىق ءارى ءادىل بايلانىستاردى قولداۋ باعىتىنداعى ءىس-شارالارعا ءمان بەرىلىپ كەلەدى.
دوڭگەلەك ۇستەلگە قاتىسۋشىلار جۋرناليستەردىڭ قوعامداعى ءرولى, قاۋىپسىزدىگى, «بلوگەر», «كوممۋنيكاتسيا» ۇعىمدارىنا قاتىستى ماسەلەلەرمەن قاتار ءباسپاسوز ونىمدەرىن تاراتۋ, قوسىمشا قۇن سالىعى, قالا, اۋدان ورتالىقتارىندا جويىلىپ كەتكەن گازەت دۇڭگىرشەكتەرىن جانداندىرۋ ماسەلەسىن قوزعادى.
الماتى
