العاداي جاڭالىقتى جەتىسۋ وبلىسى اكىمىنىڭ ءباسپاسوز قىزمەتى حابارلادى. تامىز ايىنىڭ سوڭىندا اقتۇبەك اۋىلىندا جالپى قۇنى 657 ملن تەڭگە تۇراتىن جاڭا مادەنيەت ءۇيى پايدالانۋعا بەرىلگەن. مۇندا 150 ورىندى ءماجىلىس زالىمەن قاتار, 16 مىڭنان استام كىتاپ قورى بار وقىرمان زالى جاساقتالعان كىتاپحانا اشىلدى.
جالپى الاڭى 2 مىڭ شارشى مەتر بولاتىن ەكى قاباتتى عيمارات «اۋىل – ەل بەسىگى» باعدارلاماسىمەن سالىنعان. ءبىرىنشى قاباتىندا 150 ورىندى كورەرمەن زالى, قىزمەتكەرلەر كابينەتتەرى, اسحانا, مەدپۋنكت, كيىم شەشەتىن ورىن قاراستىرىلعان. ەكىنشى قاباتتا بي زالى, وقىرمان زالى بار كىتاپحانا, ۇيىرمەلەر جۇمىسىنا جانە شارۋاشىلىق قاجەتتىلىكتەرىنە ارنالعان بولمەلەر ورنالاسقان. عيماراتتىڭ قاتتى وتىنمەن جىلىتاتىن جەكە قازاندىعى بار. نىساننىڭ ماڭايى اباتتاندىرىلىپ, 30 شىرشا, قاراعاي مەن ەمەن وتىرعىزىلعان. قۇرىلىس جۇمىستارىن «الاكول-اسىل-قۇرىلىس» جشس مەردىگەر مەكەمەسى جۇرگىزدى.
جالپى, اقتۇبەك اۋىلىنداعى تۇرعىنداردىڭ تەڭ جارتىسى – جاستار, ياعني ولاردىڭ سانى 520 ادام. سوندىقتان جاڭا نىسان جاستاردىڭ بوس ۋاقىتىن ءتيىمدى وتكىزۋگە, ولار قوعامنىڭ رۋحاني-مادەني ومىرىنە بەلسەنە قاتىسۋىنا مۇمكىندىك بەرەدى.
جەتىسۋ وبلىسى
