جاڭا قۇجاتتا پوليتسيا, ءبىلىم بەرۋ ۇيىمدارى, مەديتسينا قىزمەتكەرلەرى جانە قورعانشىلىق ورگاندارىنىڭ جاۋاپكەرشىلىك اياسى ناقتى ايقىندالدى. ەندى بالا قۇقىعىنىڭ بۇزىلۋى تۋرالى كەز كەلگەن اقپارات بويىنشا بەلگىلەنگەن مەرزىمدەرگە ساي مىندەتتى ءىس-قيمىلدار تىزبەگى اۆتوماتتى تۇردە ىسكە قوسىلادى.
جۇيەدەگى نەگىزگى جاڭاشىلدىقتاردىڭ ءبىرى – كەيس-مەنەدجەرلەر ينستيتۋتىنىڭ ەنگىزىلۋى. ءاربىر وقيعا بويىنشا جەكە جاۋاپتى مامان بەكىتىلەدى. ول بارلىق مۇددەلى قىزمەتتەردىڭ جۇمىسىن ۇيلەستىرىپ, بالانىڭ قۇقىعى تولىق قالپىنا كەلگەنگە دەيىن سۇيەمەلدەۋ جۇرگىزەدى. بۇل ءتاسىل ۆەدومستۆولار اراسىنداعى جاۋاپكەرشىلىكتىڭ بولىنبەي قالۋ تاۋەكەلىن ازايتادى.
قازاقستاندا بالا قۇقىعىن قورعاۋ كوميسسيالارىنىڭ قىزمەتى قايتا جۇيەلەندى
الگوريتمدە ارەكەت ەتۋ مەرزىمدەرى دە ناقتى بەلگىلەنگەن. اقپارات دەرەۋ ءتيىستى ورگاندارعا جەتكىزىلەدى, 1 ساعات ىشىندە مالىمەت بالا قۇقىقتارىن قورعاۋ ورگاندارىنا جولدانادى, 1 جۇمىس كۇنى ىشىندە كەيس-مەنەدجەر تاعايىندالىپ, بالانىڭ ءومىر ءسۇرۋ جاعدايى تەكسەرىلەدى. ال ماتەريالداردى كامەلەتكە تولماعاندار ىستەرى جونىندەگى كوميسسياعا جولداۋ مەرزىمى 3 جۇمىس كۇنىنەن اسپايدى.
بۇدان بولەك, ارەكەت ەتۋ نەگىزدەرىنىڭ اۋقىمى كەڭەيتىلدى. ەندى رەسمي وتىنىشتەرمەن قاتار, بالالاردىڭ ءوز سيگنالدارى, «111» بايلانىس ورتالىعىنىڭ حابارلامالارى, سونداي-اق الەۋمەتتىك جەلىلەر مەن باق-تاعى مونيتورينگ ناتيجەلەرى دە ەسكەرىلەدى. بۇل باعىتتا ءموبيلدى توپتار مەن پسيحولوگيالىق قولداۋ ورتالىقتارى دا جۇمىلدىرىلعان.
دينارا زاكيەۆا: جاڭا كونستيتۋتسيادا وتباسى مەن بالا قۇقىعىن قورعاۋ كۇشەيتىلەدى
بالالارعا كومەك بىرىڭعاي ستاندارت بويىنشا كورسەتىلەدى. وعان مەديتسينالىق, پسيحولوگيالىق, پەداگوگيكالىق, الەۋمەتتىك جانە قۇقىقتىق قولداۋدىڭ تولىق كەشەنى كىرەدى. سونداي-اق جاڭا تارتىپكە سايكەس, مەملەكەتتىك قورعاۋ تەك زورلىق-زومبىلىققا ۇشىراعان بالالارعا عانا ەمەس, وعان كۋا بولعان كامەلەتكە تولماعاندارعا دا ۇسىنىلاتىن بولادى.
