كىرىستەرى مەن مۇلكى تۋرالى دەكلاراتسيا (270.00-نىسان) 2022 جىلعى 15 قىركۇيەككە دەيىنگى مەرزىمدە ەلەكتروندى تۇردە تۇرعىلىقتى جەرى بويىنشا مەملەكەتتىك كىرىستەر ورگانىنا ۇسىنۋ قاجەت. وسى جىلى دەكلاراتسيا تاپسىرۋ بويىنشا مىندەتتەمە كەلەسى ساناتتارعا تيەسىلى: جاۋاپتى مەملەكەتتىك لاۋازىمدى اتقاراتىن ادامدار مەن ولاردىڭ جۇبايلارى (زايىپتارى); مەملەكەتتىك فۋنكتسيالاردى ورىنداۋعا ۋاكىلەتتىلىك بەرىلگەن ادامدار مەن ولاردىڭ جۇبايلارى (زايىپتارى); مەملەكەتتىك فۋنكتسيالاردى ورىنداۋعا ۋاكىلەتتىلىك بەرىلگەن ادامدارعا تەڭەستىرىلگەن ادامدار مەن ولاردىڭ جۇبايلارى (زايىپتارى); «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا جانە «سىبايلاس جەمقورلىققا قارسى ءىس-قيمىل تۋرالى», «قازاقستان رەسپۋبليكاسىنداعى بانكتەر جانە بانك قىزمەتى تۋرالى», «ساقتاندىرۋ قىزمەتى تۋرالى», «باعالى قاعازدار نارىعى تۋرالى» قازاقستان رەسپۋبليكاسىنىڭ زاڭدارىنا سايكەس دەكلاراتسيانى تابىس ەتۋ مىندەتى جۇكتەلگەن ادامدار.
2021 جىلى جەكە تۇلعانىڭ اكتيۆتەرى مەن مىندەتتەمەلەرى تۋرالى دەكلاراتسياسىن (250.00-نىسان) ۇسىنعان ادامدار 2022 جىلى كىرىستەرى مەن مۇلكى تۋرالى دەكلاراتسيانى (270.00-نىسان) ۇسىنۋعا ءتيىس. بۇل مىندەتتەمە مەملەكەتتىك قىزمەتتەن بوساتىلعان تۇلعالارعا جانە دەكلاراتسيا تاپسىرۋعا مىندەتتى ازاماتتار ساناتىنان شىققان تۇلعالارعا دا قاتىستى.
ەگەر سالىق دەكلاراتسياسى مەرزىمىندە تابىس ەتىلمەسە, وندا سالىق ورگاندارى العاشىندا ەسكەرتۋمەن شەكتەلەدى. ەسكەرتۋ بەرىلگەننەن كەيىن ءبىر جىل ىشىندە جەكە تۇلعا تاراپىنان قايتالاپ بۇزۋشىلىق ورىن السا, ون بەس ايلىق ەسەپتىك كورسەتكىش مولشەرىندە ايىپپۇل سالىنادى, ول بۇگىندە 45 945 تەڭگەنى قۇرايدى.
