ۇلتتىق ەكونوميكا ءمينيسترى الىبەك قۋانتىروۆ وسى جىلدىڭ 7 ايىنىڭ قورىتىندىسى بويىنشا نەگىزگى كاپيتالعا سالىنعان ينۆەستيتسيالار كولەمى 6,9 ترلن تەڭگەنى قۇراعانىن حابارلادى. جىلجىمايتىن م ۇلىكپەن وپەراتسيالار, تاۋ-كەن ونەركاسىبى جانە مۇناي ءوندىرۋ, كولىك جانە قويمالاۋ, اۋىل, ورمان جانە بالىق شارۋاشىلىعى, ەنەرگەتيكا جانە وڭدەۋ ونەركاسىبى سياقتى سالالار بويىنشا ايتارلىقتاي ءوسىم بايقالادى.
پرەمەر-مينيستر بيىل نەگىزگى كاپيتالعا قۇيىلعان ينۆەستيتسيالار بويىنشا 4,5% دەڭگەيىندە وڭ ديناميكا بايقالىپ وتىرعانىن, بۇل رەتتە 12 ءوڭىردىڭ بەلگىلەنگەن نىسانالى ينديكاتورلاردى ورىنداماعانىن اتاپ ءوتتى. ەڭ تومەنگى كورسەتكىشتەر شىمكەنت قالاسى, تۇركىستان جانە ۇلىتاۋ وبلىستارىندا.
ء«ىرى كومپانيالار وندىرىسكە ينۆەستيتسيا سالىپ, جاڭا جۇمىس ورىندارىن اشۋعا دايىن. ولارمەن جۇمىس ىستەپ, ينۆەستيتسيالىق كەلىسىمشارتتار جاساۋ, جاڭا جوبالار بويىنشا – سالىق زاڭناماسىنىڭ تۇراقتىلىعىنا كەپىلدىك بەرۋ قاجەت. وبلىستار مەن مەملەكەتتىك ورگانداردىڭ باسشىلىعى ينۆەستيتسيا تارتۋ جۇمىستارىن كۇشەيتىپ, بۇل ماسەلەنى ەرەكشە باقىلاۋدا ۇستاۋى ءتيىس», دەدى ءاليحان سمايىلوۆ.
ءوز كەزەگىندە سىرتقى ىستەر ءمينيسترىنىڭ ورىنباسارى الماس ايداروۆ 2022 جىلدىڭ ءى توقسانىندا ەلىمىزگە $6,8 ملرد كولەمىندە تىكەلەي شەتەلدىك ينۆەستيتسيا تارتىلعانىن باياندادى.
وسى كەزەڭدەگى العاشقى ينۆەستورلار وندىعىنا نيدەرلاند, اقش, شۆەيتساريا, رەسەي, قىتاي, وڭتۇستىك كورەيا, بەلگيا, ۇلىبريتانيا, فرانتسيا جانە تۇركيا ەلدەرى كىردى.
ينۆەستيتسيالىق جوبالاردىڭ جالپىۇلتتىق پۋلى حيميا ونەركاسىبى, تمك, ەنەرگەتيكا, كولىك جانە لوگيستيكا, تاماق ونەركاسىبى, تۋريزم, اقپاراتتىق-كوممۋنيكاتسيالىق تەحنولوگيالار, مۇناي-گاز حيمياسى, اۋىل شارۋاشىلىعى جانە ت. ب. سالالاردا 30,2 ترلن تەڭگەگە 797 جوبانى قامتيدى.
پۋل جوبالارىن تولىق ىسكە اسىرۋ شامامەن 130 مىڭ جۇمىس ورنىن قۇرۋعا مۇمكىندىك بەرەدى. 2022 جىلى 24 مىڭ جۇمىس ورنىن قۇرا وتىرىپ, 2,98 ترلن تەڭگەگە 272 جوبانى ىسكە قوسۋ جوسپارلانعان.
سونىمەن قاتار قازىرگى ۋاقىتتا شەتەلدىك كومپانيالاردى قازاقستانعا كوشىرۋ جۇمىستارى جۇرگىزىلىپ جاتىر. ماسەلەن, تارگەتتەلەتىن 310 كومپانيانىڭ 51-ءى ەلىمىزدە ءوندىرىستى شوعىرلاندىرۋ بويىنشا كەلىسسوزدەر جۇرگىزۋدە. ولاردىڭ ىشىندە Honeywell, Skoda, Youngsan, EMAG, Carlsberg, Fortescue جانە ت. ب.. ال Canon, Philips, Kronospan, GE Healthcare, Alstom, Haier كومپانيالارى جانە ت. ب. الدىن الا كەلىسسوزدەر ساتىسىندا.
پرەمەر-مينيستر I توقساننىڭ قورىتىندىسى بويىنشا تىكەلەي شەتەلدىك ينۆەستيتسيالار اعىنىنىڭ 54%-عا وڭ ديناميكاسى تىركەلگەنىن اتاپ ءوتتى.
«قازىرگى كەزدە بىرقاتار ينۆەستورلاردىڭ ەلىمىزگە ءوز وندىرىستەرىن كوشىرۋ نيەتىمەن بايلانىستى مۇمكىندىكتەر اشىلۋدا. مينيسترلەر مەن اكىمدەر وسى باعىتتا تۋىندايتىن ماسەلەلەردى جەدەل شەشۋ ءۇشىن بار كۇش-جىگەرىن جۇمساسىن», دەدى ءاليحان سمايىلوۆ.
وتىرىستى قورىتىندىلاي كەلە, پرەمەر-مينيستر مەملەكەتتىك ورگاندار مەن اكىمدىكتەر بارلىق جوسپارلانعان ينۆەستيتسيالىق جوبالاردى ىسكە قوسۋ بويىنشا تۇبەگەيلى شارالار قابىلداۋى ءتيىس ەكەنىن اتاپ ءوتتى.
ء«بىز ينۆەستيتسيالار بويىنشا وڭ ديناميكا بولۋى ءۇشىن الداعى جىلدارعا بەرىك نەگىز قالاۋىمىز كەرەك. بۇل جۇمىس ورىندارىن قۇرۋ جانە ەكونوميكامىزدى ءارتاراپتاندىرۋ تۇرعىسىنان وتە ماڭىزدى. ءتيىستى جۇمىستار ءار وڭىردە جۇرگىزىلۋى ءتيىس», دەپ تۇيىندەدى ءاليحان سمايىلوۆ.
