ازاماتتىق اۆياتسيا كوميتەتىنىڭ توراعاسى تالعات لاستاەۆ «نۇرسۇلتان نازارباەۆ حالىقارالىق اۋەجايى» اق ديرەكتورلار كەڭەسى مۇشەلەرىمەن وتىرىس وتكىزدى.
وتىرىس بارىسىندا قر يدم ىشكى اۋديت قىزمەتىنىڭ بيىلعى تامىز ايىندا ەلوردا اۋەجايىنا جاساعان تەكسەرىس قورىتىندىسى تالقىلاندى.
اۋديتورلىق ءىس-شارالاردىڭ قورىتىندىسى بويىنشا اۋەجاي باسشىلىعى تاراپىنان جاسالعان كوپتەگەن كەمشىلىكتەر مەن بىرقاتار زاڭ بۇزۋشىلىقتار انىقتالدى. اتاپ ايتقاندا, ساتىپ الۋ راسىمدەرىنىڭ مەملەكەتتىك ساتىپ الۋ پورتالىنان تىس جۇرگىزىلۋى, كەلىسىمشارتتاردى جاساۋ بارىسىندا اشىقتىقتىڭ بولماۋى, ەڭبەكاقى تولەۋ جۇيەسىندەگى بۇزۋشىلىقتاردىڭ ورىن الۋى, جانار-جاعار ماي ماتەريالدارىن زاڭسىز بوساتۋ, ۇيىمدىق قۇرىلىمدى قۇرۋداعى بەي-بەرەكەتسىزدىك, قوعام باسشىلىعى اراسىنداعى قىزمەتتىك مىندەتتەمەلەردى زاڭسىز ءبولۋ سىندى زاڭدىلىققا قايشى ارەكەتتەر جاسالعانى انىقتالعان.
سونىمەن قاتار ديرەكتورلار كەڭەسى اۋەجايداعى بىرقاتار قىزمەتتەردى اۋتسورسينگكە بەرۋ كەزىندە قاجەتتى تالاپتاردىڭ ساقتالماعانىن انىقتاعان. ءوز كەزەگىندە بۇل اتالعان قىزمەتتەردىڭ تيىمسىزدىگىنە اكەپ سوققان.
وتىرىس قورىتىندىسى بويىنشا اۋەجاي باسقارماسىنا ارنايى تالداۋ جۇرگىزىپ, اۋديت ناتيجەسىندە انىقتالعان بۇزۋشىلىقتاردى قايتا قالپىنا كەلتىرۋگە باعىتتالعان جوسپار قۇرۋ جۇكتەلدى. سونداي-اق ۇيىم قۇرىلىمىن قايتا قاراۋ, مەملەكەتتىك ساتىپ الۋلار كەزىندە زاڭ تالاپتارىن قاتاڭ ساقتاۋ, جانار-جاعار ماي ماتەريالدارى شىعىندارىنا باقىلاۋدى كۇشەيتۋ, قىزمەت كورسەتۋ بويىنشا كەلىسىمشارتتاردىڭ تيىمدىلىگىنە رەۆيزيا جۇرگىزۋ مىندەتتەلدى.
بۇدان بولەك, زاڭسىزدىققا جول بەرگەن جاۋاپتى تۇلعالاردى جاۋاپكەرشىلىككە تارتۋ ماسەلەسى دە تاپسىرىلدى.
بۇعان دەيىن حابارلانعانداي, بىردەن ءبىر اكتسيونەر – قر يندۋستريا جانە ينفراقۇرىلىمدىق دامۋ مينيسترلىگىنىڭ شەشىمىمەن 2022 جىلعى 6 قىركۇيەكتە «نۇرسۇلتان نازارباەۆ حالىقارالىق اۋەجايى» اق باسقارما توراعاسى عابيت قالي ۇلى ءتاجىمۇراتوۆتىڭ وكىلەتتىگى مەرزىمىنەن بۇرىن توقتاتىلدى. باسقارما توراعاسىنىڭ مىندەتىن ۋاقىتشا اتقارۋشى بولىپ توراعانىڭ ورىنباسارى مۇحيدەن ءابىلدينوۆ تاعايىندالدى.
