ايدوس ءوز ءىسىنىڭ مامانى رەتىندە ارىپتەستەردىڭ ەسىندە ماڭگى قالادى. تجم قايتىس بولعان ءورت ءسوندىرۋشىنىڭ وتباسىنا جان-جاقتى كومەك پەن قولداۋ كورسەتەدى. اباي وبلىسى تج دەپارتامەنتىنىڭ پسيحولوگتارى ءورت ءسوندىرۋشىنىڭ تۋىستارىنا كومەك كورسەتۋدە.
2022 جىلدىڭ 7 قىركۇيەگىندە 13 ساعات 35 مينۋتتا 112 كەزەكشى پۋلتىنە اباي وبلىسى جارما اۋدانىنىڭ بوجىعۇر اۋىلدىق وكرۋگى ءبىرىنشى اۋىلىنىڭ ۋچاسكەسىندە قۇرعاق ءشوپ جانىپ جاتقانى تۋرالى حابارلاما كەلىپ ءتۇستى. شاقىرۋ ورنىنا №22 ءورت ءسوندىرۋ بەكەتىنىڭ قىزمەتكەرلەرى جىبەرىلدى.
شاقىرۋ ورنىنا كەلگەن ءورت سوندىرۋشىلەر دەرەۋ ءورتتى سوندىرۋگە كىرىستى.
تابيعي ءورتتى ءسوندىرۋ كەزىندە ءورت ءسوندىرۋ اۆتوتسيستەرناسى باقىرشىق تاۋ-كەن ءوندىرۋ كاسىپورنىنىڭ ءورت سوندىرۋگە سۋ جەتكىزەتىن كاماز (12 تەكشە مەتر) سۋ الدى. وسى كەزدە جەل باعىتىنىڭ وزگەرۋى سالدارىنان ءورت اۆتوتسيستەرناعا قاراي اۋماقتى شارپىدى. تەحنيكاعا ارنالعان ەۆاكۋاتسيالاۋ جولدارى بارلىق جاعىنان وتقا ورانىپ, بيىكتىگى ەكى مەتر قاراعاي اعاشى ورتەندى.
ءورت سوندىرۋشىلەر جاعدايدى باعالاپ, ءورت-تەحنيكالىق قارۋ-جاراقتى جيناۋدى توقتاتىپ, شۇعىل ەۆاكۋاتسيالاۋعا كىرىستى. اۆتوتسيستەرنا مەن كاماز سۋ تاسىمالداۋشى كولىگى تولىعىمەن جانىپ كەتتى.
ناتيجەسىندە ءورت ءسوندىرۋ بەكەتىنىڭ بولىمشە كومانديرى امانگەلدى تۇرلىبەكوۆ پەن ءورت ءسوندىرۋ بەكەتىنىڭ جۇرگىزۋشى-قىزمەتكەرى ايدوس توعىزباەۆ, ءورت ءسوندىرۋشى-قۇتقارۋشى نۇرلان ساليمجان ءتۇرلى دارەجەدەگى كۇيىك الىپ, جارما اۋدانى شار قالالىق اۋرۋحاناسىنا جاتقىزىلدى.
ءورت اۋماعى 500 گا قۇرادى, ءورت 8 قىركۇيەكتە ساعات 5.40-تا ءسوندىرىلدى. ءورتتى سوندىرۋگە توتەنشە جاعدايلار دەپارتامەنتى مەن جەرگىلىكتى اتقارۋشى ورگانداردىڭ جەكە قۇرامىنان 14 ادام مەن 5 بىرلىك تەحنيكا جۇمىلدىرىلدى. قازىرگى ۋاقىتتا وقيعانىڭ ءمان-جايى انىقتالۋدا.
ايدوس قاتتى كۇيىك الىپ, جاراقاتىنان اۋرۋحانادا كوز جۇمدى. قىزمەتتىك بورىشىن ورىنداۋ كەزىندە كورسەتكەن باتىلدىعى مەن جانقيارلىق ەرلىگى ءۇشىن ازاماتتىق قورعاۋ سەرجانتى ايدوس ەرۇلان ۇلى توعىزباەۆ قازا تاپقاننان كەيىن ءىىى دارەجەلى «ايبىن» مەملەكەتتىك ناگراداسىنا ۇسىنىلدى.
ايدوس 36 جاستا ەدى. ازاماتتىق قورعاۋ ورگاندارىندا 2019 جىلدان باستاپ قىزمەت ەتكەن. ونىڭ ارتىندا ايەلى مەن 5 بالاسى قالدى.
