«بايقوڭىر» - قازاقستانداعى تۇڭعىش حالىقارالىق قىسقامەتراجدى فيلمدەر كينوفەستيۆالى. ول جەتى جىلدان بەرى قازاقستاندا عانا ەمەس, سونىمەن قاتار شەتەلدىڭ جاس كينەماتوگرافيستەرىنە دە قولداۋ كورسەتىپ كەلەدى.
فەستيۆال جىلدىڭ كوپتەن كۇتكەن پرەمەرالارىنىڭ ءبىرى - ۇلتتىق كينونى قولداۋ مەملەكەتتىك ورتالىعىنىڭ قارجىلاي قولداۋىمەن Aray Media Group كومپانياسى تۇسىرگەن «دوس-مۇقاسان» كينوتۋىندىسىمەن اشىلدى. اتالمىش ءفيلمنىڭ رەجيسسەرى ايدىن ساحامان.
ء«بىزدىڭ ءفيلمنىڭ العاشقى رەسمي كورسەتىلىمى وسىنداي كەرەمەت كينوفەستيۆالدىڭ اياسىندا بولعانىنا قۋانىشتىمىز. «بايقوڭىر» - بۇل جاڭا ەسىمدەردى اشاتىن جانە قازاقستاننىڭ شىعارماشىل جاستارىنا قولداۋ كورسەتەتىن فەستيۆال. ءبىز ءۇشىن بۇل وتە ماڭىزدى, سەبەبى, «دوس-مۇقاسان» توبىنىڭ شىعارماشىلىعى دا ستۋدەنتتىك كەزدەن باستاۋ الدى. جاستىق شاق - شىعارماشىلىق ءۇشىن تاماشا كەزەڭ جانە ءبىزدىڭ فيلم جاس ۇرپاققا جاقسى ۇلگى بولادى دەپ سەنەمىز», دەدى ءفيلمىنىڭ باس پروديۋسەرى ايگۇل بايبەك.
فەستيۆال باعدارلاماسىنا ۇكقمو-عى قولداۋ كورسەتكەن تاعى ءتورت فيلم ەندى. ۇلتتىق بايقاۋعا بەگالى شيبىكەەۆتىڭ «قۇس» قىسقامەتراجدى ءفيلمى, ال ديلشات ءراحماتۋلليننىڭ «بەسىك جىرى» تۋىندىسى انيماتسيالىق بايقاۋعا قاتىسادى. ال رەجيسسەر-انيماتور يۆان ارداشوۆتىڭ «كەنجە قىز» انيماتسيالىق سەريالى مەن Generation سەكتسياسىندا بەرلين حالىقارالىق كينوفەستيۆالىنىڭ گران-پري يەگەرى فارحات ءشارىپوۆتىڭ «سحەما» اتتى ءفيلمى كونكۋرستان تىس باعدارلاما اياسىندا كورسەتىلەدى.
فورۋم سەرىكتەستەرى AlmaU «مەديا جانە كينو مەكتەبى» جانە قازاقستاننىڭ كينوسىنشىلار قاۋىمداستىعى فەستيۆال بارىسىندا ءوزىنىڭ «سىنشىلار تاڭداۋى» جىل سىيلىعىن تابىستايدى دەپ كۇتىلۋدە.
«قازاقستان كينوسىنشىلار قاۋىمداستىعى 2015 جىلى قۇرىلدى. ونىڭ قۇرامىنا 16 وتاندىق كينوسىنشىلار مەن كينوتانۋشىلار كىرەدى. بيىل «سىنشىلار تاڭداۋى» سىيلىعى 2020-2021 جىلدارى شىعارىلعان قازاقستاندىق فيلمدەرگە 13 نوميناتسيا بويىنشا بەرىلەدى, سەبەبى پاندەمياعا بايلانىستى سىيلىق ءبىر جىل بەرىلمەگەن ەدى», دەدى قاۋىمداستىق پرەزيدەنتى, ونەرتانۋ دوكتورى گۇلنار ابىكەەۆا.
ايتا كەتسەك, فەستيۆالدىڭ كونكۋرستىق باعدارلاماسىنا قاتىسۋعا 306 كينوجوبا ۇمىتكەر بولدى. ونىڭ ىشىندە باعدارلامالىق قىزمەت جەتى ەلدەن: قازاقستان, وزبەكستان, قىرعىزستان, ازەربايجان, تاجىكستان, ارمەنيا جانە رەسەيدەن 48 ءفيلمدى ىرىكتەپ الدى. ءۇش كونكۋرستا – حالىقارالىق, ۇلتتىق جانە انيماتسيالىق بايقاۋلاردا ۇسىنىلعان كارتينالاردى بەدەلدى كينوەكسپەرتتەردەن قۇرالعان قازىلار القاسىنىڭ ءۇش كومانداسى باعالايدى. ال حالىقارالىق بايقاۋدىڭ قازىلار القاسىن گۇلنار ابىكەەۆا باسقاردى. ۇلتتىق بايقاۋدىڭ قازىلار القاسىنىڭ توراعاسى - ساحا رەسپۋبليكاسىنىڭ تانىمال رەجيسسەرى ەدۋارد نوۆيكوۆ. انيماتسيالىق بايقاۋدىڭ قازىلار القاسىنىڭ جۇمىسىن توبىن باتۋميدەگى Tofuzi حالىقارالىق انيماتسيا فەستيۆالىنىڭ ديرەكتورى زۋراب دياساميدزە باسقارادى.
«بيىل فەستيۆال باعدارلاماسىنا اتاقتى كينوتانۋشىلاردىڭ دارىستەرى مەن بەلگىلى رەجيسسەردىڭ شەبەرلىك ساباعىن ەنگىزدىك. ءبىزدىڭ ساراپشىلار كۇن سايىن بايقاۋ باعدارلاماسىنىڭ فيلمدەرىن, سونداي-اق كونكۋرستان تىس كورسەتىلەتىن تۋىندىلاردى تالقىلايدى», دەيدى كينوفەستيۆال پرەزيدەنتى ءانۋار كەنجەباەۆ.
سونداي-اق, بيىلعى فەستيۆالگە قىرعىزستاننان «ەكسپەديتسيا» قوزعالىسىنىڭ وكىلدەرى كەلەدى. بۇل قوزعالىس ءوز ەلىنىڭ بۇگىنگى ءومىرى تۋرالى قىسقامەتراجدى فيلمدەر تۇسىرەتىن 50-گە جۋىق رەجيسسەردى بىرىكتىرگەن.
«بايقوڭىر» فەستيۆالى 11 قىركۇيەك كۇنى دارەجان ومىرباەۆتىڭ «سوڭعى سەانس» اتتى ءفيلمىنىڭ كورسەتىلىمىمەن اياقتالادى, ونىڭ الەمدىك پرەمەراسى لوكارنوداعى 75-ءشى مەرەيتويلىق فەستيۆالدە ءوتتى.
ءداستۇرلى تۇردە Baiqonyr فەستيۆالىنىڭ ۇيىمداستىرۋشىسى ەلىمىزدىڭ جەتەكشى كينوپورتالى – «برودۆەي» (brod.kz). فەستيۆال تمد-عا قاتىسۋشى مەملەكەتتەردىڭ مەملەكەتارالىق گۋمانيتارلىق ىنتىماقتاستىق قورىنىڭ قولداۋىمەن وتەدى. اقپاراتتىق قولداۋدى «Kazakh Tourism» ۇلتتىق كومپانياسى» اق كورسەتەدى.
فەستيۆالدىڭ اقپاراتتىق سەرىكتەستەرى «حابار» جانە El Arna تەلەارنالارى, «جۇلدىز FM» جانە «ەلدوراديو الماتى» راديوستانتسيالارى, Tengrinews.kz, Massaget.kz, Baribar.kz, 365 Info.kz, «ەكسپرەسس ك» ينتەرنەت پورتالدارى, Egemen Qazaqstan, «كازاحستانسكايا پراۆدا», Almaty Aqshamy, «ۆەچەرني الماتى» جانە «كومسومولسكايا پراۆدا كازاحستان» باسىلىمدارى.
