ايماقتار • 08 قىركۇيەك، 2022

جۇرتىم دەپ جۇمىلدى

قوستانايداعى تابيعي اپاتتان زارداپ شەككەن جۇرتقا پاۆلودارلىقتار دا ەلدىڭ الدى بولىپ جاردەمدەسۋدە. جەرلەستەرىمىز گۋمانيتارلىق كومەك جىبەرۋدى سوڭعى ەكى كۇندە بارىنشا ەسەلەدى. جەرگىلىكتى حالىقتان جينالعان ازىق-ت ۇلىك پەن ءتۇرلى كەرەك-جاراقتاردى، قۇرىلىس ماتەريالدارىن ەرىكتىلەر مەن ازاماتتار ەكى جۇك ماشيناسىنا تيەپ جونەلتتى.

مۇرات قاپان ۇلى

پاۆلودارلىقتار سوڭعى ەكى تاۋلىكتىڭ ىشىندە قوستاناي وبلىسىنا 55 توننادان استام گۋمانيتارلىق كومەك جىبەردى. Amanat پارتياسى وڭىرلىك فيليالىنىڭ مالىمەتىنشە، جاستار گۋمانيتارلىق كومەك جيناۋعا جانە ولاردى توپتاستىرۋعا بار كۇشتەرىن سالۋدا.

– ءبىزدىڭ فيليالدا ورنالاسقان قابىلداۋ پۋنكتىنە گۋمانيتارلىق كومەكتەرىن اكەلىپ جاتقان جۇرتتا ەسەپ جوق. كوبى – قاراپايىم تۇرعىندار. ادامدار مۇندا كەلىپ تەگىن كومەك كورسەتۋگە دايىن ەكەندەرىن، نە قاجەت بولاتىنىن سۇرايدى. مىسالى، ءبىز تۇرمىستىق تەحنيكا ساتىپ الۋدى سۇراعان ەدىك، بىرەۋ شاينەك، ەندى بىرەۋ ميكروتولقىندى پەشتەرىن قۇشاقتاپ جەتتى. وتانداستارىمىز تاپ بولعان قيىن جاعدايعا جاۋاپكەرشىلىكپەن قاراپ، ءسال دە بولسا جاقسىلىعىن تيگىزگىسى كەلەدى. ءبىزدىڭ ءبارىمىز ۇلكەن ەلدە، ءبىر شاڭىراق استىندا ءومىر ءسۇرىپ جاتىرمىز. وسىنداي قيىن ساتتە ۇيىسقان جەرلەستەرىمىزدىڭ بەلسەندىلىگى قۋاندىردى، – دەپ اتاپ ءوتتى ساياسي ۇيىمنىڭ پاۆلودار وبلىستىق فيليالىنىڭ اتقارۋشى حاتشىسى يليا تەرەنچەنكو.

قابىلداۋ پۋنكتتەرىندە گۋمانيتارلىق كومەك جيناۋ ءبىر مەزەتكە توقتاعان ەمەس. بەلسەندىلەر العاشقى كەزەكتە قۇرىلىس ماتەريالدارىن، بالالارعا ارنالعان كەڭسە تاۋارلارىن جانە تۇرمىستىق تەحنيكانى قابىلداۋعا دەن قويۋدا. بۇرناعى كۇنى ازىق-ت ۇلىك، تۇرمىستىق تەحنيكا جونەلتىلدى. «قوستاناي وبلىسىنىڭ شتابى بىزگە قۇرىلىس ماتەريالدارىن، مەكتەپ جانە كەڭسە تاۋارلارىن جيناۋ تۋرالى ءوتىنىش ءبىلدىردى. جەرگىلىكتى قۇرىلىس دۇكەندەرى قولداۋ كورسەتىپ جاتىر. «12 مەسياتسەۆ» قۇرىلىس دۇكەنى قۇرعاق قوسپالار، قىش پليتكالار بەردى، جاڭا لينولەۋم ورامىن اكەلدى. بۇل رەتتە كومەكتى اقشالاي جيناۋ مىندەتى قويىلعان جوق، تەك دەمەۋشىلەردەن جەتكىزۋشى كولىك قىزمەتتەرىنە اقى تولەۋدى وتىندىك. بۇگىن ءبىز كەم دەگەندە ەكى جۇك كولىگىن جىبەرۋدى جوسپارلاپ وتىرمىز. كوپتىڭ جاردەمى تولاستار ەمەس، اعىلىپ كەلىپ جاتىر. جاقىن ارادا اۋدانداردان قوسىمشا گۋمانيتارلىق كومەك كەلەدى»، – دەيدى يليا تەرەنچەنكو.

اتقارۋشى حاتشى وبلىستىق، قالالىق، اۋداندىق ءماسليحاتتار دەپۋتاتتارىنىڭ دا ەرەكشە بەلسەندىلىگىن اتاپ ءوتتى. جەكسەنبىدەن باستاپ حالىق قالاۋلىلارى ازىق-ت ۇلىك، كيىم-كەشەك پەن تەحنيكانى جيناۋعا بەلسەنە كىرىسكەن. پارتيالىقتار كومەكتەسۋگە شەشىم قابىلداعان بارلىق پاۆلودارلىقتارعا العىس ءبىلدىردى.

پاۆلودار وبلىسى