جيىنعا قاتىسۋشىلار تاريحي ماڭىزدى قۇجاتتاعى بارلىق قازاقستاندىق قوعام الدىندا تۇرعان ناقتى مىندەتتەردى كەڭىنەن سارالادى. وتىرىستا ءسوز العان اكادەميك ديحان قامزابەك ۇلى: «پرەزيدەنتتىڭ جولداۋى – ەل دامۋىنىڭ نەگىزگى قوزعاۋشى كۇشى, ءبىز ءۇشىن جاڭا بەلەس. بۇل ماڭىزدى قۇجات مەملەكەتىمىزدىڭ كەلەشەگىن باعدارلايتىن, دۇنيەجۇزىلىك باسەكەلەستىكتە ىسكەرلىگىن باعامدايتىن, نەگىز جانە ول قازاقستاننىڭ دامۋىنىڭ جاڭا كوكجيەكتەرىن بەلگىلەۋمەن قۇندى», دەدى.
ەۇۋ «ساياساتتانۋ» كافەدراسىنىڭ مەڭگەرۋشىسى باعىش عابدۋللينا پرەزيدەنت قاسىم-جومارت توقاەۆتىڭ قازاقستان حالقىنا ارناعان جولداۋى بۇل ەلدىڭ بولاشاعىن ايقىندايتىن تەرەڭ تاريحي قۇجات ەكەنىن اتاپ ءوتتى. «جولداۋدا ادام كاپيتالىنا جاقسى ءمان بەرىلگەن. ءبىز بۇرىن ارمانداعان, بىراق ورىندالۋى مۇمكىن ەمەستەي كورىنگەن ەلدىڭ ۇلتتىق بايلىعىن ءاربىر وتباسىنىڭ پايدالانۋى ىسكە اسادى. ۇلتتىق قورداعى كىرىستىڭ 50 پايىزى 18 جاسقا دەيىنگى بالالادىڭ شوتىنا اۋدارىلادى. سونىمەن قاتار پەداگوگيكالىق جوعارى وقۋ ورىندارىن اككرەديتتەۋدىڭ جاڭا ستاندارتى قابىلدانادى جانە پەداگوگتىڭ قۇزىرەتتىلىك شەڭبەرى ازىرلەنەدى, ياعني جوعارى قۇزىرەتتى پەداگوگتەر قالىپتاسادى. بۇل تاپسىرمالار ىسكە اسسا, وندا ەلىمىزدەگى ءبىلىم-عىلىمنىڭ ودان ءارى دامۋىندا ۇلكەن وزگەرىستەر بولاتىنىنا سەنىمدىمىن», دەدى كافەدرا مەڭگەرۋشىسى.
ال جاستار ۇيىمدارىنىڭ وكىلدەرى جولداۋ ەلىمىزدەگى جاستاردىڭ دامۋىنا جانە ءبىلىم الۋىنا ۇلكەن سەرپىن بەرەتىنىن ايتتى. بۇل تۋرالى «Qazaqstan Team» رەسپۋبليكالىق قوعامدىق جاستار بىرلەستىگىنىڭ جەتەكشىسى ولجاس سۇلەيمەن: «مەملەكەت جاستارعا جان-جاقتى قولداۋ كورسەتىپ جاتقانى قۋانتادى. پرەزيدەنت جولداۋدا ەڭبەكپەن قامتيتىن ءتۇرلى شارالار ارقىلى كەلەسى جىلى 100 مىڭ جاسقا جۇمىس بەرۋ كەرەكتىگىن, ولاردىڭ كاسىپكەرلىك باستامالارىن قولداپ جانە جەڭىلدەتىلگەن تارتىپپەن جىلدىق ءوسىمى 2,5 پايىز بولاتىن شاعىن نەسيە بەرىلەتىنىن ايتتى. تاۋەلسىزدىگىمىزدى ساقتاپ, مەملەكەتىمىزدى وركەندەتۋ جولىندا پرەزيدەنت ايقىنداعان ستراتەگيالىق باعىتتى ءاردايىم ۇستانساق, ۇلى جەتىستىكتەردى كەيىنگى ۇرپاققا ۇلگى ەتىپ جالعاستىرارىمىز اقيقات. بۇل – قازاقستان رەسپۋبليكاسىنىڭ ءاربىر ازاماتىنىڭ مىندەتى دەپ ويلايمىن», دەدى.
