بيىل بالالار جىلى ەكەنى بەلگىلى. ءار جىلدا ەلىمىزدە بالالاردى قورعاۋعا, ساپالى بىلىممەن قامتۋعا, اسىرەسە مۇمكىندىگى شەكتەۋلى بالالاردىڭ دەنساۋلىعىن نىعايتۋعا, ينفراقۇرىلىمدى دامىتۋعا ەرەكشە كوڭىل ءبولىنىپ كەلەدى. الايدا جامبىل وبلىسى, مويىنقۇم اۋدانىنىڭ ورتالىعىنداعى 700 ورىندىق ت.رىسقۇلوۆ اتىنداعى تىرەك مەكتەبى جاڭا وقۋ جىلى باستالىسىمەن-اق كۇردەلى جوندەۋگە كەتكەنى كوپتىڭ كوڭىلىن كۇپتى ەتىپ وتىر. كۇردەلى جوندەۋ جۇمىستارىنىڭ جوبالىق-سمەتالىق قۇجاتىنىڭ جالپى قۇنى – 270 ملن تەڭگە. العاشىندا كونكۋرس ناتيجەسى بويىنشا جەڭىمپاز «سەرۆيس تسەنتر-2007» جشس بولىپ انىقتالعانىمەن, ەكىنشى مەردىگەردىڭ شاعىمدانۋىنا بايلانىستى كونكۋرس قورىتىندىسى 20 كۇنگە قايتا قارالۋعا جىبەرىلگەن. كونكۋرس ناتيجەسىمەن «سەرۆيس تسەنتر -2007» جشس 223 ملن تەڭگەگە مەردىگەر اتانىپ, كۇردەلى جوندەۋ جۇمىستارى 2 قىركۇيەك كۇنى باستالىپتى.
ال اۋىل تۇرعىنى گاۋھار ايتيموۆا: «2022 جىل بالالار جىلى ەكەنى جىل باسىنان بەلگىلى. سونى بىلە تۇرا وبلىس باسشىلارى قاراجات بولۋدە نەگە ويلانباعان؟ ساتىپ الۋ كونكۋرس مەرزىمى دە كەش بەلگىلەنگەن. باستالعان جۇمىس حالىقتىڭ نارازىلىعىنا تاپ بولارى ءسوزسىز ەدى عوي. بۇل – بالالاردىڭ ساپالى ءبىلىم الۋىنا نەمقۇرايلى قاراۋشىلىق», دەپ بىلەدى. سونداي-اق گاۋھاردىڭ مەكتەپتىڭ ۋاقىتشا جابىلۋىنا بايلانىستى ءۇش ءىنىسى بالالار شىعارماشىلىق ورتالىعى, №8 مويىنقۇم كوللەدجى جانە ونەر مەكتەبىنە قاتىناپ وقيدى. الىستان قاتىناپ وقۋ بىرىنشىدەن ۋاقىت, ەكىنشىدەن جول-پۇل جاعىنان دا جەڭىل تيمەيدى. قوعامدىق كولىك ۋاقىتى دا ساي كەلە بەرمەيدى. كەش باستالعان كۇردەلى جوندەۋ جۇمىستىڭ بىتەر كۇنى دە بەلگىسىز.
ال اۋىل بەلسەندىسى قانات كوشەرباەۆ: ء«بىر ۇيدە ءۇش-ءتورت بالاسى بارلار ءۇشىن الىستان قاتىناپ وقۋ تىم قيىن. قوعامدىق كولىك بار بولعانىمەن, سىيىمدىلىعى از ءارى سيرەك جۇرەدى. مەكتەپكە كۇردەلى جوندەۋ جۇمىستارىن جاڭا وقۋ جىلىندا جۇرگىزۋ نە ادەت؟ اۋىل تۇرعىندارى بۇعان تۇبەگەيلى قارسىمىز», دەيدى.
بالانى تاكسيمەن تاسۋعا قاراجات قاجەت. ءبىر وتباسىندا ەكى اۋىسىممەن وقيتىن بالالار بار. اسىرەسە جۇمىسسىز, ايلىقسىز جۇرگەندەردىڭ جايى نە بولماق؟ جوندەۋ جۇمىستارىن كەلەسى جازعى دەمالىسقا قالدىرۋعا بولمادى ما؟ بولىنگەن قارجىنى يگەرۋ ءۇشىن جوندەۋ جۇمىستارى جالعاسا بەرە مە؟ بالالاردى ءبىلىم بەرۋ مەكەمەلەرىنە تاسىمالدايتىن قوسىمشا كولىكتەر قاراستىرىلا ما, ول كولىكتەر بۇزىلعان جاعدايدا نە ىستەيمىز؟ جاۋاپسىزدىققا كىم جاۋاپتى؟ مويىنقۇمدىقتاردىڭ ساناسىن سان-ساققا جۇگىرتكەن ساۋالدار, مىنە, وسى. ەل كوكەيىندەگى ساۋالدارعا جاۋاپ ىزدەپ كورگەن ەدىك.
جامبىل وبلىسى اكىمدىگىنىڭ ءبىلىم باسقارماسى: «مويىنقۇم اۋىلى «اۋىل – ەل بەسىگى» باعدارلاماسىنا ەنگەن. وسىعان وراي, كۇردەلى جوندەۋ جۇمىستارى 2022 جىلعا جوسپارلاندى. ت.رىسقۇلوۆ ورتا مەكتەبىنىڭ كۇردەلى جوندەۋ جۇمىستارىنىڭ قارجىسى وسى جىلدىڭ ماۋسىم ايىندا ءبولىندى. سونىمەن قاتار, مەملەكەتتىك ساتىپ الۋ كونكۋرسىنىڭ راسىمدەۋ جۇمىستارىنا سايكەس, بيىل تامىز ايىنىڭ سوڭىندا كونكۋرس ناتيجەسى بەلگىلى بولدى. جوندەۋ جۇمىستارىن اعىمداعى جىلى اياقتاۋ جوسپارلانۋدا» دەپ سەندىرەدى.
ءيا, اۆتوبۋستا ورىندىق از, وقۋشى كوپ. ءار ۋاقىتتا وقيتىن ءار بالانى قوعامدىق كولىكپەن تاسىپ ۇلگەرۋ مۇمكىن ەمەس. جول ءجۇرۋ باعاسى قولجەتىمدى بولا ما دەگەن سۇراق تاعى بار. كۇردەلى جوندەۋ جۇمىستارىنىڭ تاپسىرىس بەرۋشىسى, ياعني اۋداندىق ءبىلىم ءبولىمىنىڭ باسشىسى جايدار جازىقباەۆ, ءبولىم تاراپىنان بۇگىندە اۆتوبۋس تاسىمالى ۇيىمداستىرىلعانىن (اۆتوبۋس ماركاسى پاز 32053/052-001) جانە وقۋشىلار وقۋىن قاۋىپسىز جالعاستىرىپ جاتقانىن ايتادى.
«مەملەكەتتىك ساتىپ الۋ پروتسەسىن جۇرگىزۋ وتە قيىن. كونكۋرسقا بىرنەشە فيرما تۇسەدى, ءتۇرلى كەلىسپەۋشىلىك بولادى. سودان كونكۋرس قايتا ويناتىلىپ, قورىتىندىسى كەش شىقتى. قاراجات بولىنگەن سوڭ يگەرۋ كەرەك. مەكتەپكە قايتا-قايتا قارجى قارالا بەرمەيدى. ءتۇسىنىپ وتىرمىز, قاتىناۋ قيىن. العاشىندا قيىن بولعانىمەن ءبارى ۋاقىتپەن رەتتەلەدى. اۋدان اكىمدىگىندەگى باسشىلارمەن كەلىسە وتىرىپ, اۆتوبۋستىڭ كەستەسىن قاراپ, قوسىمشا مارشرۋت ەنگىزدىك. قانشاما جىلدان بەرى اتالعان مەكتەپتى كۇردەلى جوندەۋدەن وتكىزۋگە ارەڭ قول جەتكىزدىك. ءبىر جوندەتىپ الساق, كوپتەگەن ماسەلە شەشىمىن تابادى. بالالارىمىز زاماناۋي مەكتەپتە وقيتىن بولادى», دەپ تۇسىنىستىكپەن قاراۋعا شاقىرادى.
2010 جىلى اۋدان ورتالىعىنداعى جامبىل مەكتەپ-گيمنازياسىندا جۇرگىزىلگەن كۇردەلى جوندەۋ جۇمىستارى دا شالا ءبىتىپتى. بۇل تۋرالى اتالعان مەكتەپ-گيمنازياسىنىڭ مۇعالىمى سۆەتلانا ايكەنوۆا سانتەحنيكالىق جۇمىستاردىڭ دۇرىس اتقارىلماعانىن, كابينەتتەردىڭ جاراقتاندىرىلۋىندا كىلتيپان بار ەكەنىن جەتكىزدى. سوندىقتان مەزگىلسىز باستالعان ت.رىسقۇلوۆ مەكتەبى قۇرىلىسىنىڭ ەڭ باستىسى ساپالى بولۋىن تىلەپ وتىرعاندار دا بار.
ءۋاليحان جايلاۋ
جامبىل وبلىسى
