ءماجىلىس دەپۋتاتى يرينا سميرنوۆانىڭ ايتۋىنشا, زاڭ جوباسىنا سايكەس پسيحولوگيالىق قىزمەتپەن تەك مەملەكەتتىك رەەسترگە ەنگىزىلگەن ماماندار عانا اينالىسا الادى.
سونىمەن قاتار, ول مەملەكەتتىك تىزىمگە كىرمەگەن پسيحولوگتىڭ قىزمەت كورسەتۋ جاعدايلارى تۋىنداۋى مۇمكىن ەكەنىن اتاپ ءوتتى. دەپۋتاتتار مۇنداي جاعدايدا, ەگەر كورسەتىلگەن پسيحولوگيالىق كومەك ادامنىڭ دەنساۋلىعىنا زيان كەلتىرسە, قانداي جاۋاپكەرشىلىك قاراستىرىلاتىنىن سۇرادى. ءماجىلىس دەپۋتاتى اينا مۋسراليموۆا بۇل ماسەلەگە قاتىستى قازىرگى زاڭنامادا ءتيىستى جاۋاپكەرشىلىك قاراستىرىلعانىن ءتۇسىندىردى.
ونىڭ ايتۋىنشا, ەگەر دەنساۋلىققا زيان كەلتىرىلگەنى دالەلدەنسە, كىنالى ادام قىلمىستىق كودەكس اياسىندا جاۋاپقا تارتىلادى. زياننىڭ اۋىرلىعىنا قاراي ايىپپۇلدان باستاپ تۇزەۋ جۇمىستارىنا دەيىن ءتۇرلى جازالار قولدانىلادى, ال اۋىر جاعدايلاردا باس بوستاندىعىنان ايىرۋ جازاسى دا قاراستىرىلۋى مۇمكىن.
زاڭ جوباسىن تالقىلاۋ بارىسىندا دەپۋتاتتار پسيحولوگيالىق كومەك كورسەتۋ سالاسىنداعى تالاپتاردى بۇزعانى ءۇشىن بولەك اكىمشىلىك جاۋاپكەرشىلىك ەنگىزۋ قاجەتتىگىن دە ايتتى.
«قازىرگى ۋاقىتتا ءبىز پسيحولوگيالىق كومەك كورسەتۋ ءتارتىبىن بۇزعانى ءۇشىن ايىپپۇل سانكتسيالارىن قاراستىراتىن تۇزەتۋلەردى تالقىلاپ جاتىرمىز. ايىپپۇلداردىڭ مولشەرى ازىرگە ناقتىلانعان جوق, ولاردى ەكىنشى وقىلىمعا دەيىن پىسىقتايمىز», دەدى ا. مۋسراليموۆا.
ايتا كەتەيىك, بۇل زاڭ جوباسى 2025 جىلدىڭ اقپان ايىنان بەرى تالقىلانىپ كەلەدى. قۇجات قازاقستاندا پسيحولوگيالىق كومەك سالاسىن رەتتەيتىن جەكە زاڭ قابىلداۋدى كوزدەيدى.
