بۇعان دەيىن قازاقستان پرەزيدەنتىنىڭ جولداۋى جىلىنا ءبىر-اق رەت جاريالانىپ كەلسە, قاسىم-جومارت كەمەل ۇلى بيىل ەل نازارىنا ەكى جولداۋ ۇسىندى. مۇنىڭ ءوزى تاريحي رەفورمالار الدىندا تۇرعان ەلىمىزدىڭ ساياسي سامارقاۋلىقتان ارىلۋعا بەت بۇرعانىن كورسەتسە كەرەك. ويتكەنى الەمدى ابدىراتىپ وتىرعان گەوساياسي احۋالدىڭ سالقىنى ءبىزدىڭ ەلدى اينالىپ ءوتۋى مۇمكىن ەمەس. بۇگىنگى جولداۋ وسىناۋ سىن-قاتەرلەر ىقپالىنا قارسى تۇرۋ شارالارىن قامتۋىمەن دارالاندى.
ادىلەتتى قازاقستان قۇرۋدىڭ سارا جولىن سالماقتاعان پرەزيدەنت جولداۋى ەل ەكونوميكاسىنىڭ تاريحي مۇمكىندىكتەرىن تامىرىنان تالداپ, دامۋ ناتيجەلەرىن قاراپايىم حالىق كورۋى كەرەكتىگىن ناقتىلاپ بەردى. ماسەلەن, ۇلتتىق قورداعى ينۆەستيتسيالىق ءتۇسىمنىڭ 50 %-ىن 2024 جىلدان باستاپ ەلىمىزدىڭ 18 جاسقا تولماعان ازاماتتارىنىڭ جەكە ەسەپشوتىنا اۋدارۋى, ايەلدەردىڭ زەينەتكە شىعۋ جاسى 61 بولىپ بەلگىلەنۋى ەلدەگى الەۋمەتتىك تەڭسىزدىكتى جويۋعا, ەل بايلىعى يگىلىگىن بارلىق ازاماتتار كورۋىنە سەپتىگىن تيگىزەرى داۋسىز.
سونداي-اق سوت جۇيەسى مەن قۇقىق قورعاۋ سالاسىن, اۋىل شارۋاشىلىعى سەكتورىن رەفورمالاۋ بويىنشا ۇسىنىلعان نەگىزگى باعىتتار ادىلەتتى قازاقستان قۇرۋ جولىنداعى تاريحي قادامدار بولعانىن باسا ايتۋىمىز كەرەك.
تۇيىندەي ايتقاندا, پرەزيدەنتتىڭ وسى جولعى جولداۋى ەل كۇتكەندى ەڭسەردى. مەملەكەت باسشىسىنىڭ وكىلەتتى مەرزىمىن جەتى جىلعا ۇزارتا وتىرىپ, سايلانۋ مەرزىمىن ءبىر مەرزىممەن شەكتەۋ باستاماسى دا بيلىكتى مونوپوليالاۋ ءۇردىسىن رەتكە كەلتىرۋ مۇمكىندىگىن تاريح ساحناسىنا الىپ شىقتى. جەتى جىل – از مەرزىم ەمەس. رەفورمالار مەن باعدارلامالاردى جۇزەگە اسىرۋ مۇمكىندىگىنە جەتكىلىكتى مەرزىم. سونىمەن قاتار پرەزيدەنت سايلاۋى مەن پارلامەنت سايلاۋىن مەرزىمىنەن بۇرىن وتكىزۋ ماسەلەسى دە قوعام مەن بۇقارا حالىق كۇتكەن ساياسي رەفورمالاردىڭ العاشقى قادامى.
ينفوگرافيكانى جاساعان امانگەلدى قياس, «ەQ»
ەسكى مەن جاڭانىڭ ورتاسىنان جاڭعىرۋ جولىن ايقىنداپ, جارقىن ساتتەردىڭ جارشىسىنا اينالعان جولداۋ بيلىك تارماقتارىنا عانا ەمەس, بارشا قازاقستاندىقتارعا تاريحي جاۋاپكەرشىلىك جۇكتەيدى. سايلاۋداعى تاڭداۋ ەركىندىگىن پايدالانۋ, ناشاقورلىق جانە ەسىرتكى ساۋداسىنا توسقاۋىل بولۋ, جەمقورلىقتىڭ جولىن كەسۋ سەكىلدى قوعام سەرپىلىسىنىڭ ناتيجەلەرى بارشامىزعا ورتاق قۇندىلىق. مەملەكەت باسشىسى وسىنشا اۋقىمدى مىندەتتەر مازمۇنىن ۇلتتىق دەڭگەيدەگى جاۋاپكەرشىلىك ساناي وتىرىپ, ءوزى ءۇشىن دە وتاننىڭ دامۋى مەن يگىلىگىنەن اسقان قۇندىلىق جوق ەكەنىن قاداپ ايتتى.
جاڭعىرۋ, جاڭارۋ تابالدىرىعىندا تۇرعان قازاقستاننىڭ گۇلدەنۋى – بارشامىزدىڭ باقۋاتتى تىرلىگىمىز. ەندەشە, پرەزيدەنت ايتقانداي, ء«بىر جاعادان – باس, ءبىر جەڭنەن – قول شىعارا» وتىرىپ, جارقىن بولاشاق ءۇشىن جۇمىلا كۇرەسەيىك!
بەكزات التىنبەكوۆ,
Amanat پارتياسى قاراعاندى وبلىستىق فيليالىنىڭ اتقارۋشى حاتشىسى
قاراعاندى وبلىسى
