مەملەكەت پەن حالىق – ءبىر-بىرىنەن اجىراتىپ قاراۋعا بولمايتىن, ءوزارا بايلانىستى ۇعىمدار. بۇل تۇرعىدان العاندا, مەملەكەت تاراپىنان قابىلداناتىن شەشىمدەر مەن جۇرگىزىلەتىن رەفورمالاردىڭ تۇپكى ماقساتى – حالىقتىڭ ءال-اۋقاتىن جاقسارتۋ, ونىڭ ءومىرى مەن دەنساۋلىعىن ساقتاۋ جانە نىعايتۋ ەكەنى ءسوزسىز.
مەملەكەت باسشىسى ق.توقاەۆتىڭ «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى جولداۋىن حالقىمىزدىڭ زور ىقىلاسپەن جانە اسا ۇلكەن قۋانىشپەن قابىلداعانى ءسوزسىز. ويتكەنى جولداۋدا ەلىمىزدە الداعى ۋاقىتتا جۇرگىزىلەتىن وزگەرىستەردىڭ, ساياسي, الەۋمەتتىك جانە ەكونوميكالىق رەفورمالاردىڭ ناقتى باعىت-باعدارى بەلگىلەندى.
جولداۋ ساياسي جاڭعىرۋ جولىن جالپىۇلتتىق رەفەرەندۋمدا ءبىراۋىزدان قولداعان بارشا قازاقستاندىقتارعا بولاشاققا سەنىممەن قاراپ, ءۇمىت ارتۋعا مۇمكىندىك بەردى. بۇعان ەلىمىزدەگى ساياسي جانە ەكونوميكالىق جاڭارۋ پروتسەستەرىنىڭ ۇلتتىق بايلىقتى تەڭ ءبولۋ, بارشا قازاقستاندىقتارعا بىردەي مۇمكىندىك بەرۋ جانە ادىلدىك ورناتۋ قاعيداتتارىنا نەگىزدەلەتىنى سەبەپ. ادىلەتتى قازاقستاندى قۇرۋ جولىندا حالىقتىڭ, ءاربىر ازاماتتىڭ ءال-اۋقاتى مەن تۇرمىس-تىرشىلىگى ءبىرىنشى ورىنعا قويىلادى.
ەڭ الدىمەن, ەڭ تومەنگى جالاقى دەڭگەيى 60 مىڭ تەڭگەدەن 70 مىڭ تەڭگەگە دەيىن كوتەرىلەدى. بۇل 1,8 ميلليون ازاماتتىڭ تابىسىنا تىكەلەي اسەر ەتەدى. سونىمەن قاتار ەڭ تومەنگى جالاقى مولشەرىن بىرتىندەپ ۇلعايتۋعا مۇمكىندىك بەرەتىن جاڭا ءتاسىل ەنگىزىلمەك.
حالىقتىڭ ءال-اۋقاتىن جاقسارتۋداعى كەلەسى ماڭىزدى قادامنىڭ ءبىرى – اتاۋلى الەۋمەتتىك كومەكتىڭ بىرىڭعاي جۇيەسىن قۇرۋ. 2023 جىلدان باستاپ وتباسىنىڭ تسيفرلىق كارتاسى قالىپتاستىرىلادى. وندا ءاربىر ازاماتقا كورسەتىلەتىن مەملەكەتتىك قولداۋ ءىس-شارالارى بىرىكتىرىلەدى. بۇل مەملەكەتتىك قولداۋ بويىنشا ناقتى, اشىق جانە تۇسىنىكتى اقپارات الۋعا مۇمكىندىك بەرەدى.
تاعى ءبىر ماڭىزدى باستاما – ۇلتتىق بايلىقتى تەڭدەي ءبولۋ قاعيداتىن جۇزەگە اسىرۋ. مەملەكەت باسشىسى جولداۋدا «سامۇرىق-قازىنا» قورى تازا پايداسىنىڭ كەمىندە 7 پايىزى جىل سايىن «قازاقستان حالقىنا» قوعامدىق قورىنا اۋدارىلاتىنىن اتاپ ءوتتى.
حالقىمىز «ۇلت بولامىن دەسەڭ, بەسىگىڭدى تۇزە» دەپ, ۇرپاق تاربيەسىنە ايرىقشا ءمان بەرگەن. تاربيەلى, سانالى ۇرپاق تاربيەلەۋ ىسىندە انالار مەن جاس ۇرپاققا قولايلى جاعداي تۋعىزۋ مەن قولداۋ كورسەتۋدىڭ ماڭىزدى ەكەنى انىق. پرەزيدەنتتىڭ بۇل باعىتتاعى باستامالارى وتباسى قۇندىلىقتارىن باعالاۋعا جانە جاس ۇرپاقتىڭ بولاشاققا سەنىممەن قاراۋىنا نەگىز قالايدى. ءبىرىنشىسى, 2023 جىلعى 1 قاڭتاردان باستاپ بالا كۇتىمى ءۇشىن تولەماقى تولەۋ مەرزىمىن ءسابي ءبىر جارىم جاسقا تولعانعا دەيىن ۇزارتىلادى.
كەلەسى باستاما – «ۇلتتىق قور – بالالارعا» باعدارلاماسى. بۇل باعدارلاما اياسىندا ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن بالالاردىڭ ارناۋلى جيناقتاۋشى ەسەپشوتىنا اۋدارۋ ۇسىنىلادى. قارجى ءار بالا 18 جاسقا تولعانعا دەيىن اۋدارىلىپ تۇرادى, ونى مەرزىمىنەن بۇرىن ەسەپشوتتان شىعارىپ الۋعا بولمايدى. جيناقتالعان قارجى بالالار كامەلەت جاسىنا تولعاننان كەيىن ولاردىڭ باسپانا نەمەسە ءبىلىم الۋىنا جۇمسالماق. بۇل قاراجات وسكەلەڭ ۇرپاقتىڭ ۇلكەن ومىرگە قادام باسۋىنا مۇمكىندىك بەرەدى. جوبا 2024 جىلعى 1 قاڭتاردان جۇزەگە اسىرىلادى.
دۇنيەگە كەلگەن ءاربىر بالاعا ەسەپشوت اشىپ, قوماقتى قارجى سوماسىمەن تولىقتىرۋ بىرقاتار دامىعان مەملەكەتتەردە, اسىرەسە اراب ەلدەرىندە كەڭىنەن قولدانىلاتىن وزىق تاجىريبە ەكەنى بەلگىلى. مۇنداي باستامانىڭ وڭ ناتيجە بەرەتىنى ءسوزسىز.
مەملەكەت باسشىسى ق.توقاەۆتىڭ قازاقستان حالقىنا جولداۋىندا كورىنىس تاپقان بىرقاتار باستاما اۋىل تۇرعىندارىنىڭ تۇرمىس-تىرشىلىگى مەن ءال-اۋقاتىن جاقسارتۋعا باعىتتالعان. ەگەر دە «اۋىل – ەل بەسىگى» ەكەنىن, اۋىل حالقىنىڭ ۇلەسى قازاقستاندىقتاردىڭ 40,7 پايىزىن قۇرايتىنىن ەسكەرسەك, بۇل ۇسىنىستار ەلىمىزدەگى تۇراقتىلىق پەن بىرلىكتى نىعايتۋعا ىقپال ەتەدى.
وسى ورايدا, مەملەكەت باسشىسى جاريا ەتكەن باستامالاردىڭ باسىم بولىگى قالالىق جانە اۋىلدىق تۇرعىندار ءۇشىن دەنساۋلىق ساقتاۋ جانە ءبىلىم بەرۋ سالاسىندا تەڭدەي مۇمكىندىكتەر تۋعىزادى.
پرەزيدەنت جاريا ەتكەن دەنساۋلىق ساقتاۋ سالاسىنداعى ۇلتتىق جوبانىڭ ماڭىزى زور. اتالعان جوبا اياسىندا 32 اۋداندىق اۋرۋحانا زامانعا ساي جاڭارتىلىپ, اۋدانارالىق كوپبەيىندى مەكەمەگە اينالادى. وندا ينسۋلتتەن ەمدەۋ ورتالىقتارى, حيرۋرگيا, جانساقتاۋ جانە وڭالتۋ بولىمدەرى اشىلادى. بۇل اۋىل حالقىنا كورسەتىلەتىن مەديتسينالىق قىزمەتتىڭ ساپاسىن جانە قولجەتىمدىلىگىن ارتتىرۋعا مۇمكىندىك بەرەدى. سونىمەن قاتار تەلەمەديتسينا باعىتىن دامىتۋ ارقىلى شالعايدا تۇراتىن حالىققا ساپالى مەديتسينالىق قىزمەت كورسەتىلەدى.
اۋىل جانە قالا مەكتەپتەرى اراسىنداعى ايىرماشىلىق ازايتىلىپ, ولاردىڭ مازمۇندىق جانە تەحنيكالىق دەڭگەيى تەڭەستىرىلەدى. 2025 جىلعا دەيىن 800 مىڭ بالانىڭ زاماناۋي مەكتەپتە وقۋىنا جاعداي جاسالماق. وسىلايشا, اپاتتى جاعدايداعى جانە ءۇش اۋىسىممەن وقيتىن مەكتەپ ماسەلەسى تولىق شەشىلەدى.
بۇدان باسقا, حالىقتىڭ ايرىقشا كوڭىلىنەن شىققان باستامالاردىڭ ءبىرى رەتىندە ء«سان-سالتاناتقا سالىقتىڭ» ەنگىزىلەتىنىن ايتۋعا بولادى. جولداۋدا سالىق رەفورماسى اياسىندا وسىنداي سالىق تەك اسا قىمبات جىلجىمايتىن م ۇلىك جانە اۆتوكولىك ساتىپ العان كەزدە سالىناتىنى ايتىلدى. بۇل – بايلار مەن كەدەيلەر اراسىنداعى تابىس الشاقتىعىن شەكتەۋگە مۇمكىندىك بەرەتىن شارالاردىڭ ءبىرى ەكەنى ءسوزسىز. جوعارىدا اتالعان قادامدار جولداۋدا جاريا ەتىلگەن باستامالاردىڭ ءبىر بولىگى عانا. بۇدان باسقا, ماڭىزدى قۇجات اياسىندا قوعام ءومىرىنىڭ بارلىق سالاسىندا جۇرگىزىلەتىن اۋقىمدى جانە ماڭىزدى باستامالار جاريا ەتىلدى.
ينفوگرافيكانى جاساعان امانگەلدى قياس, «ەQ»
عاني تاشقاراەۆ,
ءماجىلىس دەپۋتاتى
