بۇگىن يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ ۇكىمەت وتىرىسىندا قر پرەمەر-ءمينيسترى ءاليحان سمايىلوۆقا الداعى جىلىتۋ ماۋسىمىنا دايىندىق بارىسى تۋرالى ايتىپ بەردى.
«ەلىمىزدەگى بىلىم بەرۋ نىساندارىنىڭ 99%-ى بيىلعى جىلىتۋ ماۋسىمىنا دايىن», دەدى مينيستر.
سونداي-اق ول نۇر-سۇلتان قالاسىندا, جامبىل جانە سولتۇستىك قازاقستان وبلىستارىندا 25 نىسان ازىرگە قىسقا دايىن ەمەس ەكەنىن مويىندادى.
ال دەنساۋلىق ساقتاۋ نىساندارىنىڭ 98 پايىزى, تۇرعىن ۇيلەردىڭ 88%-ى, اۆتونومدى قازاندىقتاردىڭ 97%-ى, جىلۋ جەلىلەرىنىڭ 94%-ى, سۋمەن جابدىقتاۋ جانە سۋ بۇرۋ جەلىلەرىنىڭ 86%-ىنىڭ دايىندىق دەڭگەيى ويداعىداي كورىنەدى.
قايىربەك وسكەنباەۆتىڭ ايتۋىنشا, بىرقاتار ءوڭىردىڭ, اسىرەسە جاڭادان قۇرىلعان وبلىستاردىڭ اكىمدىكتەرى ينجەنەرلىك ينفراقۇرىلىمدى, الەۋمەتتىك سالا وبەكتىلەرىن جانە تۇرعىن ۇيلەردى جىلىتۋ ماۋسىمىنا ۋاقىتىلى دايىنداۋ بويىنشا شارالاردى كۇشەيتۋلەرى قاجەت.
