قوعام • 06 قىركۇيەك، 2022

قايىربەك وسكەنباەۆ گەرمانيالىق ارىپتەستەرىمەن كەزدەستى

43 رەت كورسەتىلدى

يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ گفر-دىڭ ەكونوميكا جانە كليماتتى قورعاۋ فەدەرالدى مينيسترلىگىنىڭ ىشكى ەكونوميكالىق ساياسات دەپارتامەنتىنىڭ ديرەكتورى دومينيك شنيحەلسوممەن كەزدەستى، دەپ حابارلايدى Egemen.kz.

كەزدەسۋ بارىسىندا تاراپتار كولىك-لوگيستيكالىق كەشەنى مەن ونەركاسىپ جانە پايدالى قازبالاردى بىرلەسىپ يگەرۋ سالالارىنداعى ءوزارا ىنتىماقتاستىقتى دامىتۋ جايىن تالقىلادى.

بۇگىنگى تاڭدا گەرمانيا قازاقستاننىڭ نەگىزگى ەكونوميكالىق سەرىكتەسىنىڭ ءبىرى. سونداي-اق اتالعان ەل ينۆەستيتسيا كولەمى بويىنشا دا كوش باستاپ كەلەدى. 2022 جىلدىڭ ءبىرىنشى جارتىجىلدىعىندا مەملەكەتتەر اراسىنداعى تاۋار اينىلىمى 1،6 پايىزعا ارتىپ، 1،2 ملرد اقش دوللارىن قۇرادى. قازاقستاندا گەرمانيالىق كاپيتالدىڭ قاتىسۋىمەن مىڭنان استام زاڭدى تۇلعا قىزمەت اتقارادى.D

قازىر كولىك-لوگيستيكالىق سالاسىندا دا ىنتىماقتاستىق نىعايىپ كەلەدى. اتاپ ايتقاندا، بيىلعى العاشقى التى ايدا گەرمانيانىڭ قازاقستان اۋماعى ارقىلى تاسىمالدانعان ترانزيتتىك جۇك كولەمى 47 پايىزعا ارتىپ، 2،3 ملن توننانى قۇرادى. باسقوسۋدا قر يدم باسشىسى قازاقستاندىق تاراپ ەلدەر اراسىنداعى اۆتوموبيل كولىگى ارقىلى تاۋار اينالىمىن ارتتىرۋعا نەگىزدەلگەن ءوزارا ارىپتەستىكتى ودان ارمەن دامىتۋعا نيەتتى ەكەندىگىن جەتكىزدى.

بۇدان بولەك، بۇگىندە ازاماتتىق اۆياتسيا سالاسىندا دا بىرقاتار جۇمىس جولعا قويىلعان. قوس مەملەكەت اراسىنداعى جولاۋشىلار تاسىمالىن «AirAstana» جانە «Lufthansa» اۋە كومپانيالارى جۇزەگە اسىرۋدا. اۆياكومپانيالار اپتاسىنا 15 رەت تۇراقتى تاسىمالداۋ ورىندايدى.

گەرمانيا – الەمدەگى كولىك قۇراستىرۋ سالاسىنداعى جەتەكشى مەملەكەتتىڭ ءبىرى. كەزدەسۋ بارىسىندا ۆەدومستۆو باسشىسى يندۋستريا جانە ينفراقۇرىلىمدىق دامۋ مينيسترلىگى وسى تاراپتا كووپەراتسيالىق بايلانىستاردى ارتتىرۋعا ىنتالى ەكەندىگىن جەتكىزدى.

«قازاقستان-گەرمانيا كووپەراتسياسى اياسىندا ونەركاسىپ سالاسىندا جالپى سوماسى 719،4 ملن دوللاردى قۇرايتىن 14 جوبا تابىستى ىسكە اسىپ، 2،2 مىڭنان استام جاڭا جۇمىس ورنى پايدا بولدى. جۇزەگە اسىرىلعان جوبانىڭ ءبىرى رەتىندە اۋىل شارۋاشىلىعى تەحنيكالارىن شىعاراتىن «CLAAS» كومپانياسىمەن بىرلەسىپ ورىنداعان جوبانى ايتار ەدىم. بۇگىندە كاسىپورىن تۇراقتى تۇردە جۇمىس ىستەيدى. بيىلدىڭ وزىندە زاۋىت 80-گە جۋىق تراكتور شىعاردى. قازاقستاندىق نارىققا «CLASS» سىندى بەدەلدى كومپانيانىڭ كەلۋى وسى سالانىڭ دامۋىنا وزىندىك سەرپىن بەرگەنىن اتاپ وتكىم كەلەدى. الداعى ۋاقىتتا دا بۇل تاراپتاعى ىنتىماقتاستىقتى ارتتىرا بەرەمىز دەگەن سەنىمدەمىن»، دەپ اتاپ ءوتتى مينيستر.

 

سوڭعى جاڭالىقتار

ۇقساس جاڭالىقتار