اشىق اسپان استىنداعى Ertis Promenade ساحناسىندا رەسپۋبليكالىق اقىندار ايتىسى ءوتتى. وت اۋىزدى، وراق ءتىلدى ءسوز سۇلەيلەرى جەرگىلىكتى جۇرتتىڭ ءشولىن قاندىرىپ، رۋحاني كەش سىيلاپ قانا قويعان جوق، دودا سوڭىندا العان جۇلدەلەرىن تولىعىمەن قوستانايداعى الاپات ورتتەن زارداپ شەككەن اعايىندارىمىزعا اۋداردى.
اشىق اسپان استىنداعى ايتىسقا كەرەكۋلىك اقىندار، اتاپ ايتقاندا، «التىن دومبىرا» يەگەرى اسپانبەك شۇعاتاەۆ، بەيبىت بوجەن، راۋان قايدار، التاي قادىربەك، ورازبەك ساياحات جانە قىزىلوردالىق مۇحتار نيازوۆ، اقتوبەلىك نارتاي تىلەۋقۇل، الماتىلىق شۇعايىپ سەزىمحان، ورالدىق مۇرادىم ميرلانوۆ، كوكشەتاۋلىق نۇرماحان جاقىپبەك قاتىستى. الامان ايتىس باستالماس بۇرىن ەرتىس-بايان ءوڭىرىنىڭ تانىمال ايتىسكەرى، «اقتوعايدىڭ قارا نارى» اتانعان بەيسەنبى مۇقاجان قاتىسۋشىلارعا باتاسىن بەرىپ، ساتتىلىك تىلەدى.
بۇعان دەيىن رەسپۋبليكالىق ايتىستارعا قاتىسىپ، جۇلدەلى ورىندارعا يە بولىپ جۇرگەن پاۆلودارلىق التاي قادىربەك قارسىلاستارىنىڭ بارلىعى مىقتى دايىندىقپەن كەلگەندىگىن اتاپ ءوتتى. ءبىر-بىرىمىزگە سوزبەن شابۋىل جاساپ، تاريحى تەرەڭ وقيعالاردى قوزعاپ، قارسىلاسىمىزعا ادەمى ازىلمەن جاۋاپ بەرۋگە تىرىستىق دەيدى ول.
ال ايتىسكەر اقىن بەيبىت بوجەن مۇنداي سايىستار وبلىستاعى جاس اقىنداردىڭ ۇشتالىپ، تاجىريبە جيناۋىنا زور مۇمكىندىك ەكەنىن جەتكىزدى. وبلىس باسشىلىعىنىڭ ءتول مادەنيەتىمىزگە دەگەن كوزقاراسى دۇرىس. بىلتىر تاۋەلسىزدىك كۇنىنە وراي وڭىردە ۇلكەن الامان وتسە، مىنە، اراعا ءبىراز ۋاقىت سالىپ تاعى ءبىر ءدۇبىرلى دودانىڭ كۋاسى بولدىق.
«اسىل دومبىرا» يەگەرى، بەلگىلى اقىن رينات زايىتوۆ، كەرەكۋلىك ۇلت جاناشىرلارى، اقىندار اسىل ءابىش پەن جارقىنبەك امانتاي ادىلقازىلار القاسى تاراپىنان مادەني ءىس-شارانىڭ جوعارى دەڭگەيدە ۇيىمداستىرىلعانىن اتاپ ءوتتى.
– كەزىندە پاۆلودار وڭىرىندە سەرىك قۇسانباەۆ پەن اسىعات تۇرعانبەكتەن وزگە ايتىسكەر اقىندار بار ەكەنىن بىلمەدىك. كەيىن اسپانبەك شۇعاتاەۆ توپ جارىپ شىقتى. بۇگىندە راۋان قايدار، بوكەن جىگەر سياقتى جاقسى ەكپىنمەن كەلە جاتقان جىر سۇلەيلەرى بار. مۇنىڭ بارلىعى پاۆلودار ءوڭىرىنىڭ ۇلتتىق مادەنيەتكە دەن قويعانىنىڭ ناتيجەسى. اۋقىمى كەڭ ءدۇبىرلى دودالاردىڭ كوبىرەك ءوتۋى جاستاردىڭ اراسىندا ۇلتتىق مادەنيەتكە دەگەن قىزىعۋشىلىقتى وياتادى، – دەدى رينات زايىتوۆ.
ايتىس قورىتىندىسىندا مۇحتار نيازوۆ جەڭىمپاز اتاندى. جۇلدەلى ءبىرىنشى ورىندى اسپانبەك شۇعاتاەۆ، ەكىنشى ورىندى ورالدان كەلگەن مۇرادىم ميرلانوۆ يەلەنسە، ۇزدىك ۇشتىكتى تاعى ءبىر جەرلەسىمىز راۋان قايدار تۇيىندەدى. اقىندار ءبىراۋىزدان ءوز جۇلدەلەرىن قوستاناي وبلىسىنداعى ورتتەن زارداپ شەككەن وتباسىلارعا اۋدارۋ تۋرالى شەشىم قابىلدادى.
پاۆلودار وبلىسى
اقپاتەردەگى يننوۆاتسيالىق جوبا
ءونىم • كەشە
عالىم • كەشە
تۇلعا • كەشە
ءبىلىم • كەشە
قوعام • كەشە
قازاقستان • كەشە
ۇقساس جاڭالىقتار
ونلاين 
