پرەزيدەنت ءوز جولداۋىندا بيىل كۇزدە كەزەكتەن تىس پرەزيدەنتتىك سايلاۋ وتكىزۋدى ۇسىندى. وسى ورايدا مارات شيبۇتوۆ سايلاۋدى مەرزىمىنەن بۇرىن وتكىزۋ سەبەپتەرىنە توقتالىپ, وتكىزۋ كەزەڭدەرىن ءتۇسىندىردى. ساياساتتانۋشىنىڭ ايتۋىنشا, سايلاۋدى كۇزدە وتكىزۋ – پرەزيدەنتتىڭ ءوز مانداتىن ناقتىلاۋدان, ياعني ازاماتتاردىڭ سەنىمىنەن تۋعان ۇسىنىس. سونىمەن قاتار بۇل ۇسىنىس «پرەزيدەنت لاۋازىمىنىڭ ماڭىزىن تۇبەگەيلى وزگەرتۋمەن قاتار, سۋپەرپرەزيدەنتتىك رەسپۋبليكادان قاراپايىم پرەزيدەنتتىك-پارلامەنتتىك, بالكىم پارلامەنتتىك رەسپۋبليكاعا وتەتىن ۇلكەن كەزەڭنىڭ ءبىر بولشەگى دە بولۋى مۇمكىن», دەگەن ويىن ءبىلدىردى.
جيىن بارىسىندا قازاقستاننىڭ ۇيعىر جاستارى وداعىنىڭ توراعاسى, قازاقستان حالقى اسسامبلەياسىنىڭ مۇشەسى رۋستام قايرىەۆ «الداعى جىلى ەلىمىزدى ساياسي, ەكونوميكالىق, الەۋمەتتىك سالالارداعى قۋاتتى قايتا جاڭعىرۋلار كۇتىپ تۇر», دەپ اتاپ ءوتتى. ونىڭ ايتۋىنشا, مەملەكەت باسشىسى العا قويعان مىندەتتەرگە ەل بولىپ قولداۋ كورسەتۋ كەرەك. «پرەزيدەنت ق.توقاەۆ ايتقانداي, «ادىلەتتى قازاقستان قۇرۋ ەندى عانا باستالدى». ول وسى جىلدىڭ كۇزىندە پرەزيدەنت سايلاۋىن كەزەكتەن تىس وتكىزۋدى جانە پرەزيدەنتتىڭ وكىلەتتىگىن قايتا سايلانۋ قۇقىعىنسىز 7 جىل مەرزىممەن شەكتەۋدى ۇسىندى. ءوز باسىم بۇل ۇسىنىستى, سونداي-اق ونىڭ اشىق باسەكەلەستىك پەن بارلىعىنا تەڭ مۇمكىندىكتەرگە ۇمتىلۋىن, قازاقستاندا جۇمىس ىستەيتىن پارلامەنت پەن ءماسليحاتتاردى قالىپتاستىرۋدىڭ جاڭا تەتىكتەرىن قولدايمىن», دەيدى ر.قايرىەۆ. وسى ورايدا ول ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزىن بالالار 18 جاسقا تولعانعا دەيىن ارنايى جيناق شوتتارىنا ۇستاۋ تۋرالى ۇسىنىسقا ەرەكشە توقتالىپ: «ۇلتتىق قور – بالالارعا» باعدارلاماسى – بولاشاق ۇرپاققا قامقورلىق. كامەلەتتىك جاسقا جەتكەندە اتا-انالار ءبىلىم بەرۋ, باسپانامەن قامتۋ سياقتى كوپتەگەن ماسەلەمەن بەتپە-بەت كەلەدى. سول كەزدە بۇل جيناقتىڭ ۇلكەن سەپتىگى تيەدى», دەپ اتاپ ءوتتى. سونداي-اق ول ناشاقورلىقپەن كۇرەستىڭ جالپىۇلتتىق سيپات الۋى قاجەتتىگىن ايتىپ, اسىرەسە سينتەتيكالىق ەسىرتكى ماسەلەسىنە نازار اۋدارىپ, ەرىكتىلەر, جوعارى سىنىپ وقۋشىلارى اراسىندا ۇگىت-ناسيحات, اقپاراتتىق جۇمىستاردى كۇشەيتۋ قاجەتتىگىنە توقتالدى.
ال «Adanaz» جشس ديرەكتورى, الماتى قالاسى ءماسليحاتىنىڭ دەپۋتاتى سانا جانداي ەكونوميكا, دەنساۋلىق ساقتاۋ, ءبىلىم بەرۋ, ساياسات, ەڭبەك نارىعىنداعى وزگەرىستەرگە بايلانىستى پىكىر ءبىلدىرىپ, ايەلدەردىڭ 61 جاستا زەينەتكە شىعۋى جانە بالا كۇتىمىنە سايكەس جاڭاشىلدىقتىڭ كوپتەگەن وتباسى ءۇشىن ۇلكەن قولداۋ ەكەنىن اتاپ ءوتتى.
الماتى
