بەينەبايلانىس فورماتىنداعى جيىنعا سونداي-اق وتاندىق شاعىن جانە ورتا بيزنەس وكىلدەرى مەن «قازاقستان ماشينا قۇرىستىرۋ» زتب باسشىلارى دا قاتىستى.
كەزدەسۋ بارىسىندا مۇناي-گاز سالاسىنداعى ماشينا قۇرىستىرۋدى دامىتۋ تەتىكتەرى تارازىلانىپ, وسى تاراپتاعى قوردالانعان ماسەلەلەردى شەشۋ جولدارى تالقىلاندى. اتاپ ايتقاندا, باسقوسۋدا مۇناي-گاز ماشيناسىن جاساۋدى دامىتۋدىڭ حالىقارالىق ورتالىعىنىڭ 2021-2022 جىلدارداعى اتقارعان جۇمىستارى ەكشەلىپ, جەرگىلىكتى مۇناي-گاز سەكتورىنداعى وپەراتورلار (KPO, NCOC, TCO) ءۇشىن قاجەتتى مۇناي-گاز ماشينا قۇرىلعىلارى ايقىندالدى.
قازىرگى كۇندە قازاقستاندا مۇناي-گاز سالاسىنداعى ماشينا قۇراستىرۋمەن اينالىساتىن 91 كاسىپورىن جۇمىس ىستەيدى. ءوندىرىس وشاقتارىنىڭ 12-ءى – ءىرى, 15-ءى – ورتا جانە 64-ءى – شاعىن. 2021 جىلدىڭ قورىتىندىسى بويىنشا اتالعان كاسىپورىندار قۇنى 68,5 ملرد تەڭگەنىڭ ءونىمىن وندىرگەن. ال بيىلعى العاشقى 7 ايدا شىعارىلعان ءونىمنىڭ جالپى سوماسى 37,5 ملرد تەڭگەگە جەتكەن. 2022 جىلدىڭ 6 ايىندا ەكسپورتتالعان ءونىم 40,8 اقش دوللارىنا ارتقان (وتكەن جىلدىڭ سايكەس كەزەڭىندەگى كورسەتكىش – 31,6 اقش دوللارى).
اتاپ ءوتۋ كەرەك, سالاداعى قازاقستاندىق ءونىمنىڭ ۇلەسى ايتارلىقتاي از. شامامەن 3,7 پايىز كولەمىندە. مۇناي-گاز ماشينالارىنىڭ باسىم بولىگى شەتەلدەن اكەلىنەدى.
وسى ماسەلەنى وڭتايلى شەشۋ ماقساتىندا وتاندىق كاسىپورىنداردىڭ وكىلدەرى سالاداعى بىرقاتار تۇيىتكىلدى جايتتى جەتكىزىپ, ۇسىنىستارىن ايتتى. ونىڭ ىشىندە ءىرى مۇناي-گاز وپەراتورلارىنان تاپسىرىستار قابىلداۋ تەتىكتەرى دە تارازىلاندى.
باسقوسۋ قورىتىندىسى بويىنشا يدم يندۋستريالىق دامۋ كوميتەتى بىرقاتار شەشىم قابىلدادى. اتاپ ايتقاندا, مۇناي-گاز سالاسىنداعى كومپانيالارمەن كەلىسسوزدەر جۇرگىزىلىپ, شەۆرون قورىنىڭ جەرگىلىكتى جەرلەردى دامىتۋ باعدارلاماسى شەڭبەرىندە كوتەرىلگەن ماسەلەلەردى تۇبەگەيلى شەشۋ جولدارى قاراستىرىلماق. سونداي-اق جيىن قاتىسۋشىلارى ماشينا قۇراستىرۋ سالاسىنىڭ دامۋىنا كەدەرگىسىن تيگىزەتىن توسقاۋىلداردى بىرلەسە شەشۋ باعىتىنداعى جۇمىستاردى ودان ارمەن جالعاستىرۋعا ۋاعدالاستى.
