پرەزيدەنت بالالار جىلىندا, ءبىلىم كۇنىندە جاريالانعان جولداۋىندا مەكتەپكە دەيىنگى ءبىلىم بەرۋ جۇيەسىنە ايرىقشا كوڭىل ءبولىپ, مەكتەپكە دەيىنگى تاربيە جۇمىسى باستى نازاردا بولۋى كەرەك ەكەنىن ايتتى. ءبىز «بالاپان» باعدارلاماسى ارقىلى 3 پەن 6 جاستاعى بالالاردى بالاباقشامەن 100 پايىز قامتي الدىق. وسىنداي كورسەتكىشكە مەملەكەت-جەكەمەنشىك ارىپتەستىك نەگىزىندە قول جەتكىزدىك. بىراق مەملەكەت باسشىسى ماسەلە رەتىندە كوتەرگەندەي, ەكىدەن التى جاسقا دەيىنگى بالالاردىڭ جارتىسىنان كوبى عانا بالاباقشاعا بارادى. ءسوزسىز, مۇنداي ولقىلىققا جول بەرۋگە بولمايدى. سول سەبەپتى دە قاسىم-جومارت كەمەل ۇلى بالالاردى بالاباقشامەن قامتاماسىز ەتۋ ماسەلەسىن تۇپكىلىكتى شەشۋدى تاپسىردى. مەملەكەتتىڭ مۇددەسى بارىمىزگە ورتاق مىندەتكە اينالادى. بۇل رەتتە ءبىزدىڭ «قارلىعاش» بالاباقشاسى مەملەكەتتىك ساياساتپەن ۇندەستىكتە جۇمىس ىستەپ وتىر دەپ ايتا الامىن, ويتكەنى ءبىز بالالاردى 2 جاستان باستاپ قابىلدايمىز. ارينە, ەل كولەمىندە وسى ماسەلەنى شەشۋ ءۇشىن كاسىپكەرلىك تاراپىنان دا جاناشىرلىق پەن قولداۋ قاجەت.
كەز كەلگەن سالانىڭ دامۋى ونداعى كادرلاردىڭ كاسىبيلىگىنە تىكەلەي تاۋەلدى. بالالاردى 2 جاستان باستاپ تولىعىمەن مەكتەپكە دەيىنگى بىلىممەن قامتاماسىز ەتىپ, بالاباقشالاردى كوپتەپ اشۋعا قول جەتكىزەرمىز. دەگەنمەن سالاعا بىلىكتى كادرلار تارتپايىنشا جۇيەنى لايىقتى جەتىلدىرۋ قيىنعا سوعادى. ماسەلەنىڭ وسىنداي ەكىنشى جاعىن دا ەسكەرگەن مەملەكەت باسشىسى وسى جولعى جولداۋىندا تاربيەشىلەردىڭ الەۋمەتتىك مارتەبەسىن ارتتىرىپ, جالاقىسىن كوبەيتۋ كەرەگىن, وسى سالاداعى ماماندارعا قويىلاتىن ناقتى تالاپتار بەكىتىلۋگە ءتيىس ەكەنىن ايتىپ, ولاردىڭ جۇمىس جۇكتەمەسىن دە بىرتىندەپ ازايتقان ءجون بولاتىنىن جەتكىزدى. ءبىزدىڭ بالاباقشا بيىل وقۋ-اعارتۋ مينيسترلىگى قولعا العان «ەكى تاربيەشى» قاناتقاقتى جوباسىن اپپروباتسيادان وتكىزۋگە اتسالىستى. بۇل جوبا پرەزيدەنتتىڭ جوعارىدا ايتقان تالاپتارىن ناتيجەلى ورىنداۋعا مۇمكىندىك بەرەدى. سەبەبى وسى جوبا ەنگىزىلسە, ءبىر توپتا 2 تاربيەشى كۇنى بويى جۇمىس ىستەيدى. مۇنداي جۇيە تاربيەشىلەردىڭ جۇمىس جۇكتەمەسىن ازايتادى ءارى توپتاعى ءار بالاعا كوبىرەك كوڭىل بولۋگە جاعداي جاسايدى. ال تاربيەشىلەردىڭ الەۋمەتتىك مارتەبەسى ارتىپ, جالاقىسى وسسە, كاسىبي كادرلار كوپتەپ تارتىلادى. وسىنداي جۇيەلى جۇمىستىڭ ناتيجەسىندە عانا مەكتەپكە دەيىنگى تاربيە مەن وقىتۋ ساپاسى ارتادى.
بەيبىتگۇل قازاقپاەۆا,
پرەزيدەنت ءىس باسقارماسى مەديتسينالىق ورتالىعىنا قاراستى «قارلىعاش» بالاباقشاسىنىڭ ديرەكتورى
