مەملەكەتتىڭ باستى قۇندىلىعى – ادام. ال ەلدىڭ تۇراقتى دامۋى ۇلتتىڭ ساۋلىعى مەن ساپالى بىلىمىنە تىعىز بايلانىستى. جولداۋ كوتەرگەن ماڭىزدى باعدار الەۋمەتتىك ساياساتتى جەتىلدىرىپ, ەكونوميكالىق تۇراقتىلىققا قول جەتكىزۋدى كوزدەيدى. وسى ورايدا جيىن مودەراتورى, الماتى قالالىق ءماسليحاتىنىڭ حاتشىسى ستانيسلاۆ كانكۋروۆ ەل دامۋىنىڭ كەلەشەگىن ايقىندايتىن قۇجاتتىڭ ساياسي-ەكونوميكالىق ماڭىزىنا توقتالدى. بەس باعداردان تۇراتىن ستراتەگيالىق قۇجات ەلىمىز ايماقتارىندا قوردالانعان كوكەيكەستى ماسەلەلەردى تاياۋ ۋاقىتتا شەشىپ, رەسپۋبليكا جۇرتشىلىعىنا قولايلى جاعداي جاساۋدى ماقسات ەتەدى. ەلدى مەكەندەردە مەديتسينا مەكەمەلەرىن كوبەيتىپ, قولجەتىمدىلىگىن ارتتىرۋ, سونىمەن قاتار اۋىل شارۋاشىلىعىنا, شاعىن جانە ورتا بيزنەسكە كوڭىل ءبولۋ, سالىق جۇيەسىن جەتىلدىرۋمەن قاتار ۇلتتىق قوردىڭ يگىلىگىن كورۋ, ماكروەكونوميكالىق تۇراقتىلىققا قول جەتكىزىپ, ادامي كاپيتالدىڭ دامۋىنا, زاڭ ۇستەمدىگىن ورناتۋدىڭ ماڭىزىنا نازار اۋدارىپ وتىر. وسى ورايدا س.كانكۋروۆ «ەلىمىزدەگى ساياسي وزگەرىستەردى جۇيەلى ىسكە اسىرۋ مەن تۇراقتى دامۋ جولىنا باعىتتالعان جولداۋدى جۇزەگە اسىرۋعا قولداۋ بىلدىرەمىز», دەپ اتاپ ءوتتى.
ءماسليحاتتىڭ قوعامدىق دامۋ, مادەنيەت, سپورت, ءدىن جانە جاستار جونىندەگى كوميسسياسى توراعاسىنىڭ ورىنباسارى كەنجەحان ماتىجانوۆ جولداۋداعى الەۋمەتتىك باسىمدىقتارعا نازار اۋداردى. نارىقتىق ەكونوميكا جاعدايىندا ماكروەكونوميكالىق تۇراقتىلىققا قول جەتكىزۋ, باسەكەلەستىكتى ارتتىرۋ, سالىق ساياساتى, زاڭنامالاردى جەتىلدىرۋدىڭ ماڭىزدى ەكەندىگىنە توقتالعان ساراپشى ەكونوميكالىق ساياساتتىڭ اشىقتىعى, جەمقورلىقپەن كۇرەستە تسيفرلاندىرۋ سالاسىن دامىتۋدىڭ ماڭىزىن اتاپ ءوتتى. «اسىرەسە «حالىق قاتىساتىن بيۋدجەت» جوباسىندا تسيفرلاندىرۋ ساياساتى تيىمدىلىگىن كورسەتتى. بۇل جوباعا جۇرتشىلىقتىڭ, قوعامدىق ۇيىمداردىڭ ارالاسىپ وتىرعانى قۋانتادى. ال ءبىلىمدى, دەنى ساۋ ۇرپاق – ەلدىڭ كەلەشەگى. جولداۋدا ءبىلىم مەن دەنساۋلىق سالاسىنا ايرىقشا كوڭىل ءبولىنىپ وتىرعانى دا سوندىقتان», دەدى ك.ماتىجانوۆ. مەكتەپكە دەيىنگى ءبىلىم, تاربيە جۇمىسى, تاربيەشىلەرگە كوڭىل ءبولۋ ماسەلەسىنە توقتالعان ساراپشى فينليانديا ەلىندە بالاباقشا تاربيەشىسىنە ماماندانۋدىڭ تالابى جوعارى ەكەندىگىنە نازار اۋداردى. بۇل ەلدە تاربيەشىلەردىڭ جالاقىسى جوعارى, الەۋمەتتىك جاعدايى دا جاقسى. ەكى, ءۇش اۋىسىمدى مەكتەپتەردىڭ ەۋروپا ەلدەرىندە جوق ەكەنىن ايتقان ول جولداۋ جۇكتەگەن مىندەتتەر جۇزەگە اساتىن بولسا, ءبىلىم سالاسىندا قوردالانعان ماسەلەلەر شەشىمىن تاباتىنىن اتاپ ءوتتى.
«بۇگىندە ەلىمىزدە 650 ەلدى مەكەندە ەمدەۋ مەكەمەسى جوق. قازىرگى جاعدايدا ەلىمىزدىڭ شالعاي ايماقتارىندا دەنساۋلىق سالاسىن دامىتۋ, مەديتسينالىق مەكەمەلەردىڭ سانىن ارتتىرا وتىرىپ, تۇرعىندارعا ساپالى مەديتسينالىق كومەك كورسەتۋ ۋاقىت كۇتتىرمەيدى». پرەزيدەنت جولداۋىندا ايتىلعان باسىمدىقتار جۇزەگە اساتىن بولسا, ەلدى مەكەندەردە قولجەتىمدى مەديتسينا دامىپ, زاماناۋي جاراقتالعان ەمحانالار مەن اۋرۋحانالار بوي كوتەرەدى. «بۇل جاڭا قازاقستاندى قۇرۋعا باعىتتالعان ماڭىزدى قادام», دەپ اتاپ ءوتتى ءماسليحاتتىڭ دەنساۋلىق ساقتاۋ, ءبىلىم جانە جۇمىسپەن قامتۋ جونىندەگى كوميسسيا توراعاسى بولات سادىقوۆ.
كاسىپكەرلىك, ينۆەستيتسيالار, تۋريزم, جەر قاتىناستارى جانە ەكولوگيا جونىندەگى كوميسسيا توراعاسى فەدور كونستانتينوۆ, كوممۋنالدىق ينفراقۇرىلىم, قالالىق موبيلدىك, قۇرىلىس, ساۋلەت جانە ۋربانيستيكا, ەنەرگەتيكا جانە سۋمەن جابدىقتاۋ جونىندەگى كوميسسيا توراعاسى نۇرسۇلتان شوقانوۆ, ەكونوميكا, قارجى, اكتيۆتەر, مەملەكەتتىك باسقارۋدى دامىتۋ جانە قوعامدىق قاۋىپسىزدىك جونىندەگى كوميسسياسى توراعاسىنىڭ ورىنباسارى, «اۋىل» پارتياسىنىڭ الماتى قالاسى بويىنشا فيليالىنىڭ جەتەكشىسى ماحامبەت حاسەنوۆ بولاشاققا ارنالعان ماڭىزدى قۇجاتتا شاعىن جانە ورتا كاسىپكەرلىكتى, اۋىل شارۋاشىلىعىن دامىتۋعا, حالىققا قىزمەت كورسەتۋ جۇيەسىنە قاتىستى ايتىلعان ماسەلەلەرگە وراي وي-پىكىرلەرىمەن ءبولىستى.
قوعامدىق دامۋ, مادەنيەت, سپورت, ءدىن جانە جاستار جونىندەگى كوميسسيا توراعاسى اسيا اقانوۆا جولداۋداعى الەۋمەتتىك ماسەلەلەردى تارقاتا كەلىپ, مەملەكەتتىك تىلدە ساپالى وقۋلىقتار شىعارۋ, جاستارعا قولجەتىمدى نەسيە بەرۋمەن قاتار ستۋدەنتتەردى قولداۋ, وقۋ ورىندارىمەن تىعىز بايلانىستى دامىتۋعا بايلانىستى پىكىرىن ءبىلدىردى. Amanat پارتياسى فراكتسياسىنىڭ جەتەكشىسى سەرىك ەسماتوۆ «جولداۋدا ايقىندالعان ماڭىزدى باعىتتار «حالىق ۇنىنە قۇلاق اساتىن مەملەكەتتە» جۇزەگە اساتىن جارقىن جوبالار» دەپ اتاپ وتسە, دەنساۋلىق ساقتاۋ, ءبىلىم جانە جۇمىسپەن قامتۋ جونىندەگى كوميسسيا توراعاسىنىڭ ورىنباسارى ارايلىم شاموۆا ءبىلىم سالاسىنداعى وزەكتى ماسەلەلەرگە توقتالدى. «بۇگىندە الماتىنىڭ الاتاۋ, ناۋرىز اۋداندارىندا مەكتەپ جەتىسپەيدى. سوندىقتان تاياۋ كەلەشەكتە زاماناۋي مەكتەپتەردىڭ بوي كوتەرەتىندىگى شاعىن اۋداندارداعى مەكتەپ ماسەلەسىنىڭ شەشىلۋىنە زور ىقپالىن تيگىزەدى. ال الەۋمەتتىك قولداۋعا مۇقتاج وتباسىلاردىڭ بالالارىنا تۇراقتى قولداۋ كورسەتىپ وتىرۋ, ءبىلىم الۋىنا جاعداي جاساپ, دەنساۋلىعىنا كوڭىل ءبولۋ ۇرپاق بولاشاعىنا الاڭداۋشىلىقتى بىلدىرەدى. سوندىقتان جولداۋدا كوتەرىلگەن ماسەلەلەر ەلىمىزدىڭ بولاشاعى ءۇشىن جاۋاپكەرشىلىگى جوعارى», دەدى ا.شاموۆا.
الماتى
