ۇرپاعىنىڭ كەلەشەگىن اتامەكەنىمەن بايلانىستىرۋدى قالاعان قانداستارىمىزدىڭ العاشقى توبى اۋەلى پاۆلودار قالاسىنا تابان تىرەپ, وسى جەردە كوشى-قون قىزمەتى مەن جۇمىسپەن قامتۋ ورگاندارىنىڭ ۇيلەستىرۋمەن اۋىل-ايماقتارعا ءبولىندى. ارقا دالاسىنداعى قازاقتىڭ قۇتىن ارتتىرىپ, ءوڭىردىڭ دامۋىنا ءوز ۇلەسىمىزدى قوسامىز دەپ كەلگەن اعايىنعا قالا-اۋدانداردىڭ اتقارۋشى بيلىك وكىلدەرى بوس جۇمىس ورىندارى تۋرالى اڭگىمەلەپ, جەرگىلىكتى جەردەگى باسپانامەن قامتۋ مۇمكىندىكتەرىن ۇسىندى.
دۇنيەجۇزىلىك قازاقتار قاۋىمداستىعى وڭىرلىك فيليالىنىڭ جەتەكشىسى بولات زاۋىتتىڭ ايتۋىنشا, قانداستارىمىز تۇرىكمەنستاننان ارنايى ۆيزامەن كوشىپ كەلگەن.
«كەزدەسۋ بارىسىندا مەملەكەت تاراپىنان كورسەتىلەتىن كومەكتەر تۋرالى تولىق اقپارات بەرىلدى جانە شەتەل ازاماتتارىنىڭ قازاقستاندا بولۋ ءتارتىبى, ولاردىڭ قۇجاتتارىن راسىمدەۋ ماسەلەسى ەگجەي-تەگجەي ءتۇسىندىرىلدى. سونداي-اق قانداستاردىڭ جەكە سايكەستەندىرۋ ءنومىرىن يەلەنۋى, قازاقستان رەسپۋبليكاسى ازاماتتىعىن راسىمدەگەنگە دەيىنگى مەملەكەتتىك قىزمەتتەردى الۋ تارتىپتەرى ايتىلدى. تاۋەلسىزدىك جىلدارى وبلىسقا شەتەلدەردەن كوشىپ كەلگەن قازاقتاردىڭ جەتكەن جەتىستىكتەرىن باياندادىق, ولاردىڭ جاڭا ورتاعا تەز بەيىمدەلۋىنە قاتىستى اقپاراتتىق اقىل-كەڭەسىمىزدى ۇمىتپادىق», دەيدى ول.
جىل باسىنان بەرى پاۆلودار وبلىسىنا رەسەي, موڭعوليا جانە وزبەكستاننان جالپى سانى 216 قانداسىمىز كوشىپ كەلگەن. سىرتتان قونىس اۋدارۋشىلار ءۇشىن بيىل 800 كۆوتا بولىنسە, تەك تۇرىكمەنستاننان 427 ادام ەرتىستىڭ بويىن ەن جايلاعان وڭىرىمىزدەن تۇراق تابادى دەپ كۇتىلۋدە. بۇل ازاماتتار وبلىستا كەمىندە 5 جىل تۇرۋى كەرەك. زاڭعا سايكەس جەكە سايكەستەندىرۋ ءنومىرىن العان سوڭ ولارعا «قانداس» مارتەبەسى بەرىلەدى. ودان سوڭ ورنىققان جەرى بويىنشا تىركەلىپ, قازاقستان ازاماتتىعىن الۋعا قۇجاتتار تاپسىرادى.
وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الميرا ديسيۋپوۆا شەتتەن كەلگەن قانداستاردىڭ پاۆلودار وبلىسىن تاڭداۋى ۇلكەن قۋانىش ەكەنىن ايتىپ ءوتتى. وڭىرگە قانشا ادام كەلسە دە وبلىس بيلىگى ولارعا جاعداي جاساۋعا ءازىر.
– ءبىزدىڭ باستى ماقساتىمىز – وسى كىسىلەردى جۇمىسپەن قامتىپ, وڭىردە تۇراقتاپ قالۋىنا مۇمكىندىك جاساۋ, – دەپ اتاپ ءوتتى باسقارما باسشىسى.
قونىس اۋدارۋشىنىڭ ارقايسىسىنا مەملەكەت تاراپىنان 214 مىڭ تەڭگە كولەمىندە كومەك بەرىلەدى. بۇل كەلۋشىلەردىڭ كوشىپ-قونۋ شىعىنىنا ارنالعان قاراجات. ودان سوڭ ءبىر جىلعا دەيىن باسپانا جالداپ تۇرۋىنا قاراجات بولەدى. ول سوما ءبىر وتباسى ءۇشىن اي سايىن شامامەن 45-91 مىڭ تەڭگە ارالىعىندا, مولشەرى قونىستانۋشىنىڭ قالا, اۋدان ورتالىعىن نەمەسە اۋىلدى تاڭداۋىنا بايلانىستى بەكىتىلەدى. ال باسپانانى بىردەن ساتىپ الۋعا مۇمكىندىگى بارلارعا جالداۋعا بەرىلەتىن قاراجاتتىڭ ءبىر جىلدىق جيىنتىعى بىردەن تولەنەدى. ودان بولەك, جەكە كاسىپپەن اينالىسقىسى كەلەتىن ازاماتتارعا ارنايى گرانت قاراستىرىلعان. ياعني كاسىپكەر ارنايى بيزنەس كۋرسىن وقىپ, بيزنەس جوسپارىن ازىرلەپ ۇسىنعان جاعدايدا 1,2 ملن تەڭگە كولەمىندە قايتارىمسىز گرانت بەرىلەدى. بۇل – مەملەكەت تاراپىنان بەكىتىلگەن رەسمي قولداۋ تۇرلەرى. بۇدان بولەك ەڭبەككە قابىلەتتىلەرىن جۇمىسپەن قامتۋ, اۋىل شارۋاشىلىعىمەن اينالىسامىن دەۋشىلەرگە جەر تەلىمدەرىن راسىمدەۋ, شاعىن كاسىپپەن شۇعىلدانۋشىلارعا قاجەتىنە قاراي عيماراتتار مەن ارنايى ورىندار تاۋىپ بەرۋ سەكىلدى جۇمىستار دا جۇرگىزىلەدى.
بۇگىندە پاۆلودار وبلىسىندا سىرتتان كوشىپ كەلۋشىلەرگە ارنالعان بولجالدى كارتا ازىرلەنگەن. وندا 111 ەلدى مەكەن بەلگىلەنگەن جانە مىڭنان استام بوس جۇمىس ورىندارى بار. قانداستارىمىز قاي ەلدى مەكەنگە باراتىنىن وزدەرى تاڭداپ, جەرگىلىكتى جەردە ماماندىعى بويىنشا ەڭبەك ورنىنا ورنالاسادى. تۇرىكمەنستاننان كوشىپ كەلىپ جاتقانداردىڭ باسىم بولىگى – تەحنيكالىق ءبىلىمدى يگەرگەندەر. قازىر ءوڭىردىڭ دەنساۋلىق ساقتاۋ جانە ءبىلىم بەرۋ سالالارىنا ماماندار اسا قاجەت. بولاشاقتا بۇل كەم-كەتىكتىڭ ورنى دا سىرتتان ءالى دە كەلەتىن قانداستاردىڭ كۇشىمەن تولتىرىلادى دەگەن سەنىم زور.
بۇعان دەيىن تۇرىكمەنستاننان وڭىرگە كوشىپ كەلگەن ءبىر وتباسى اقسۋدىڭ اۋىلدىق ايماعىنا قونىستانعان بولاتىن. اۋلەت ۇلكەنى, 67 جاستاعى ەسكەندىرحان سۇيىقۇلوۆ قارتايعان شاقتا اتامەكەننىڭ توپىراعىنا تابان تىرەگەندى ءجون كورگەنىن ايتادى. بۇل جاقتا جىلى جۇزبەن, ۇلكەن قامقورلىقپەن قارسى العانىن, باسپانا بەرىپ, بارلىق كومەكتى كورسەتىپ جاتقانىن جەتكىزدى.
ء«بىر بالام اتىراۋ وڭىرىندە قالىپ قويدى. نەمەرەلەرىم ءوسىپ قالدى, ولار قازاقستاندا جەتىلىپ, انا تىلىندە ءبىلىم السا دەپ ارمانداعان ەدىم. ارمانىم جۇزەگە اسقانىنا ايرىقشا قۋانىپ تۇرمىن. قۇدايعا شۇكىر, ءوز جۇرتىما كەلىپ قوسىلعانىمىز ۇلكەن باقىت بولدى», دەپ وي ءبولىستى قاريا.
قانداسىمىزدىڭ ءبىرى ماقسات سۇيەسىنوۆ اۋىلدىق جەرگە بارىپ, مال ءوسىرۋدى ويعا الىپتى.
– تۇرىكمەنستانداعى بالقانابات ولكەسىنەن كوشىپ كەلدىك. وتباسىمىزدا ءتورت جان بار, زايىبىم ەكەۋىمىز ءبىر ۇل, ءبىر قىز تاربيەلەپ وتىرمىز. قىزىم بيىل 8-سىنىپقا بارادى. ءوز ماماندىعىم ەلەكتريك, ال ايەلىم ءۇي شارۋاشىلىعىمەن اينالىسادى. بۇل وڭىردەگى ماي نەمەسە اققۋلى اۋداندارىنىڭ بىرىنە بارامىز دەپ شەشىم قابىلدادىق. ول جەردە مال ءوسىرىپ, شارۋاشىلىق قۇرساق پا دەيمىز. بالقاناباتتا ءبىز ءتورت ت ۇلىك ءوسىرىپ, سونىمەن كۇنەلتكەن ەدىك, – دەيدى وتاعاسى.
ايتىپ وتەيىك, بۇگىندە تۇرىكمەنستاندا 20 مىڭداي قازاق تۇرادى.
پاۆلودار وبلىسى
