بەلگىلى بولعانداي, جەڭىل كولىك كاماز كولىگىنىڭ تىركەمەسىنە سوعىلىپ, سونىڭ سالدارىنان جەڭىل كولىك بىردەن جانىپ كەتكەن. مارالدى اۋىلىنىڭ تۇرعىنى ەركەبۇلان جۇزباەۆ ورتەنىپ جاتقان كولىكتە ەس-ءتۇسسىز جاتقان 4 ادامدى بايقاپ, ويلانباستان قۇتقارۋعا بەل بۋعان.
«سول كۇنى كەشكە جۇمىستان قايتىپ كەلە جاتقان بەتىم ەدى. جولدا كولىك اپاتى بولعانىن بايقادىم. ءبىر شەتتە كاماز كولىگى تۇردى, ال ودان ءسال ارى قاراي «اۋدي» اۆتوكولىگى ورتەنىپ جاتتى. سول كەزدە ورتەنىپ جاتقان كولىككە تۇرا جۇگىردىم. كولىك ورتكە ورانىپ ۇلگەرىپتى. ىشىندە ادامدار جاتىر ەكەن. باسقا جۇرگىزۋشىلەر جاقىنداۋعا قورقىپ, قاراپ تۇردى», دەدى ەركەبۇلان جۇزباەۆ.
ول ادامداردى دەرەۋ الىپ شىقپاسا, كولىك كەز كەلگەن ۋاقىتتا جارىلۋى مۇمكىن ەكەنىن ايتتى.
«قولىمدى جەيدەمە وراپ الدىم, سەبەبى ىستىق مەتالدى جاي قولمەن ۇستاۋ مۇمكىن بولمادى. ەسىكتى تارتىپ كورىپ ەدىم, اشىلا كەتتى. الدىمەن ءبىر ادامدى سۇيرەپ شىعاردىم. ونى ءارى قاراي اپارىپ تاستاعان سوڭ ەكىنشىسىنە كومەككە جۇگىردىم. ەكىنشى جولاۋشىنى دا سۇيرەي باستاعانىمدا, قاسىما كۋاگەرلەردىڭ ءبىرى جۇگىرىپ كەلىپ كومەكتەسە باستادى. جالىنمەن ارپالىسىپ ءجۇرىپ تاعى ەكى ادامدى شىعارىپ ۇلگەرگەردىك. ارتىنشا وتقا ورانعان كولىك جارىلىپ كەتتى», دەپ باياندادى ول.
جول اپاتىنان زارداپ شەككەن ادامدار اۋرۋحاناعا جەتكىزىلدى. قازىرگى ۋاقىتتا ءۇش ازاماتتىڭ جاعدايى اۋىر.
