28 ماۋسىمدا وتكەن مادريد سامميتىندە تۇركيا, فينليانديا جانە شۆەتسيا قول قويعان ۇشجاقتى مەموراندۋم اياسىندا تۇراقتى بىرلەسكەن مەحانيزم قۇرىلدى. وتكەن جۇما كۇنى ونىڭ العاشقى وتىرىسى فينليانديانىڭ استاناسى حەلسينكيدە ءوتتى.
حەلسينكيدە وتكەن كەزدەسۋدە تۇركيا, شۆەتسيا جانە فينليانديا اراسىندا ەكى ەلدىڭ ناتو-عا مۇشەلىك ۇدەرىستەرى تۋرالى ۇشجاقتى مەموراندۋمعا قول قويىلدى. ناتو باس حاتشىسى يەنس ستولتەنبەرگ تۇركيا قولداۋىمەن فينليانديا مەن شۆەتسيانىڭ ناتو-عا مۇشە بولۋعا ءوتىنىشىن ماقۇلدايتىنىن تىلگە تيەك ەتتى.
ناتو ءسامميتى اياسىندا تۇركيا, شۆەتسيا جانە فينليانديا اراسىنداعى كەزدەسۋدەن كەيىن جۋرناليستەرگە بەرگەن سۇحباتىندا ستولتەنبەرگ «فينليانديا مەن شۆەتسيانىڭ ناتو-عا مۇشەلىگىنە جول اشاتىن كەلىسىمگە قول قويعانىمىزدى قۋانا حابارلايمىن. مۇنداعى نەگىزگى ەلەمەنتتەردىڭ ءبىرى تۇركيا, شۆەتسيا جانە فينليانديانىڭ بىرىگىپ, لاڭكەستىكپەن كۇرەستە جاقىنىراق جۇمىس ىستەيتىن مەحانيزم قۇرۋ بولدى. ءبىز بارلىق وداقتاستىڭ قاۋىپسىزدىك ماسەلەلەرىن ەسكەرۋىمىز قاجەت. اسىرەسە تۇركيانىڭ تەرروريزمگە قاتىستى قاۋىپسىزدىك ماسەلەلەرىن دە نازارعا الۋىمىز كەرەك», دەدى.
ەكى سكانديناۆيا ەلىنىڭ ناتو-عا مۇشەلىگىن بۇگىنگە دەيىن 30 مۇشە ەلدىڭ 23-ءى رەسمي قولداعانىن ايتىپ, «شۆەتسيا مەن فينليانديانىڭ ناتو-عا قوسىلۋىنا ۇلكەن قولداۋ بار. ءبىز رەسمي مالىمدەمە جاساماعان ەلدەرمەن مۇمكىندىگىنشە تەزىرەك بايلانىسىپ, تاباندى جۇمىستى جالعاستىراتىن بولامىز», دەدى ستولتەنبەرگ. سونداي-اق ستولتەنبەرگتىڭ ايتۋىنشا, ء«ۇش ەل تۇركيانىڭ قاۋىپسىزدىككە قاتىستى الاڭداۋشىلىعىن ەسكەرە وتىرىپ, قارۋ-جاراق ەكسپورتى مەن لاڭكەستىكپەن كۇرەسۋ تۋرالى مەموراندۋمعا قول قويدى», دەدى ول.
كەزدەسۋ بارىسىندا تۇراقتى بىرلەسكەن ۇشتىكتىڭ جۇمىس قاعيداتتارى ايقىندالىپ, ۇشجاقتى مەموراندۋمدا جازىلعان مىندەتتەمەلەردىڭ ورىندالۋ بارىسى قارالىپ, الداعى ۋاقىتتا اتقارىلاتىن ناقتى جۇمىستارعا توقتالدى.
ۇشجاقتى مەموراندۋمدا فينليانديا مەن شۆەتسيا تۇركياعا تەرروريزمنىڭ بارلىق تۇرىمەن كۇرەسۋدە تولىق ىنتىماقتاستىق پەن قولداۋ كورسەتەدى. سونىمەن قاتار تۇركيانىڭ ۇلتتىق قاۋىپسىزدىگىنە تونگەن بارلىق قاۋىپكە, اسىرەسە PKK تەررور ۇيىمىنا قارسى بىرگە ارەكەت ەتەتىن بولادى. كەلىسىمدە PYD/YPG جانە فەتو-نى قولداماۋ جونىندەگى مىندەتتەمەلەر دە قامتىلعان.
كەزدەسۋ بارىسىندا تالقىلانعان ماسەلەلەر بويىنشا ناقتى ناتيجەلەرگە قول جەتكىزۋ ءۇشىن تاراپتار ءتيىستى مەكەمەلەر اراسىنداعى تەحنيكالىق دەڭگەيدە ىنتىماقتاستىقتى جانداندىرۋعا ۋاعدالاستى.
فينليانديا سىرتقى ىستەر ءمينيسترى پەككا حااۆيستو كەزدەسۋدىڭ ناتيجەلى بولعانىن ءبىلدىرىپ: «بۇل مادريد سامميتىنەن كەيىنگى ءبىرىنشى كەزدەسۋ بولدى. مەن قاتىسپادىم, بىراق ماعان كەلىسسوزدەر وڭ بولعانى تۋرالى حابارلاندى», دەدى. ال فينليانديا سىرتقى ىستەر مينيسترلىگىنىڭ تۇراقتى مەملەكەتتىك حاتشىسى يۋككا سالوۆاارا كەلىسىمدە كورسەتىلگەن ىنتىماقتاستىق مەحانيزمىن قۇرۋ جۇمىسىنا دەرەۋ كىرىسكەندەرىن العا تارتىپ: «تۇركيامەن كوپتەگەن ماسەلە بويىنشا ورتاق پىكىرگە كەلدىك دەپ ويلايمىز», دەدى.
شۆەتسيا سىرتقى ىستەر مينيسترلىگى جاساعان جازباشا مالىمدەمەسىندە ء«ۇش ەلدىڭ وكىلدەرى بۇگىنگى العاشقى رەسمي كەزدەسۋدە مادريدتە وتكەن ناتو سامميتىنە بايلانىستى قول قويىلعان ۇشجاقتى كەلىسىمنىڭ جۇزەگە اسىرىلۋىن تالقىلادى» دەپ جازدى.
ەستەرىڭىزگە سالا كەتەيىك, بۇعان دەيىن تۇركيا پرەزيدەنتى رەجەپ تايپ ەردوعان سكانديناۆيا ەلدەرىنىڭ ناتو-عا مۇشە بولۋىنا توسقاۋىل قويعان ەدى. بۇل شەشىمىنە فينليانديا مەن شۆەتسيانىڭ انكارا ۇلتتىق قاۋىپسىزدىككە قاتەر توندىرەدى دەپ ەسەپتەيتىن توپتارعا, ونىڭ ىشىندە كۇردىستان جۇمىسشى پارتياسى مەن ونىڭ سيرياداعى فيليالىنا قاتىستى ۇستانىمى سەبەپ بولعان ەدى.
