باسقوسۋ كەزىندە ايدوس سارىم بۇل باعىتتاعى جۇمىس بىرنەشە ايدان بەرى جۇرگىزىلىپ كەلە جاتقانىن اتاپ ءوتتى. پارتيانىڭ تۇعىرناما جوباسى وڭىرلىك فيليالداردىڭ كۇن تارتىبىندە بەلسەندى تالقىلانادى.
«جۇمىس توبىنىڭ مىندەتى – بارلىق تالقىلاۋلاردى, پىكىرتالاستاردى, ۇسىنىستاردى, سونىڭ ىشىندە وزگە ساراپشىلاردىڭ, قاتارداعى پارتيالىقتاردىڭ پىكىرىن ەسكەرە وتىرىپ, وزەكتىلىگىن جويمايتىن, ۇزاق مەرزىمدى قۇجات ازىرلەۋ. Amanat-تىڭ جاڭا ساياسي تۇعىرناماسى ونىڭ نەگىزگى قۇندىلىقتارىن, قاعيداتتارىن, پارتيا مۇشەلەرى Amanat پەن جالپى مەملەكەتتى قالاي كورەتىندىگىن ايقىنداۋى ءتيىس», دەدى دەپۋتات.
«ەۋرازيا الەمى» قوعامدىق قورىنىڭ پرەزيدەنتى ەدۋارد پولەتاەۆ ساياسي تۇعىرناما سايلاۋالدى باعدارلاماعا ۇقسامايتىن جاڭا ساياسي قۇرال ەكەنىن اتاپ ءوتتى.
«پارتيا ءۇشىن پارلامەنتتە قاي دەپۋتات وكىلدىك ەتەتىنىنە, وڭىرلىك فيليالداردىڭ قاي باسشىسى ءوز ورنىن ساقتاپ قالاتىنىنا قاراماستان, وسى تۇعىرناما نەگىزىندە قازاقستان حالقى پارتيانىڭ نەگىزگى ماقساتى مەن مىندەتىن بىلگەنى ماڭىزدى», دەپ اتاپ ءوتتى ەدۋارد پولەتاەۆ. ال ساياسي شولۋشى نيكيتا شاتالوۆتىڭ ايتۋىنشا, تۇعىرنامادا ءومىردىڭ بارلىق سالاسىندا قوعامنىڭ ىلگەرىلەۋىنە ىقپال ەتەتىن قۇندىلىقتار بەلگىلەنەدى. «قازىرگى تاڭدا بىرقاتار قاۋىپ-قاتەرمەن بەتپە-بەت كەلىپ وتىرمىز – بۇل شيەلەنىسكەن گەوساياسي جاعداي, الەۋمەتتىك-دەموگرافيالىق
احۋال, پاندەميا. بولجام جاساۋ جانە تۇعىرنامانى ازىرلەۋ كەزىندە مۇنىڭ ءبارىن ەسكەرۋ قاجەت. بارلىعى ناقتى ساندار مەن قولدا بار بازاعا سۇيەنۋى كەرەك. ساياساتتىڭ زاڭى – وسى», دەدى ول.
ساياساتتانۋشى مارات شيبۋتوۆ ساياسي تۇعىرنامانىڭ اۆتورلىق نۇسقاسىن ۇسىندى. ونىڭ نەگىزىندە كونتسەنترلىك شەڭبەر جاتىر: ء«وزىم-وتباسىم-ءۇيىم-جۇمىسىم-شاعىن اۋدانىم-ايماعىم-ورتالىعىم».
«ەڭ باستىسى, باستى نازار ادامعا اۋدارىلۋى ءتيىس. سولاي بولا تۇرا, پارتيا مەملەكەتتى الماستىرماۋى كەرەك. الايدا پارتيا ءوز مۇشەلەرىنىڭ, قوعامنىڭ, سايلاۋشىلارىنىڭ الدىندا جاۋاپتى. ناقتى ىسكە نازار اۋدارۋ قاجەت», دەيدى ساياساتتانۋشى.
ءوز كەزەگىندە «ستراتەگيا» الەۋمەتتىك جانە ساياسي زەرتتەۋلەر ورتالىعىنىڭ پرەزيدەنتى گۇلميرا يلەۋوۆا پارتيانىڭ جاڭا مازمۇن قالىپتاستىرۋى, ال ونىڭ وزەگىندە جالپىعا ورتاق ەڭبەك يدەياسى تۇرۋى ءتيىس ەكەنىن اتاپ ءوتتى. «قازىرگى كۇنى مەملەكەت پەن پارتيانىڭ الدىندا جاڭا الەۋمەتتىك-ەكونوميكالىق سىن-قاتەرلەر تۇر. ونى ەڭسەرۋ ءۇشىن پارتيا ءوزىنىڭ تالدامالىق الەۋەتىن بارىنشا ىسكە قوسۋى ءتيىس», دەدى ول.
قارجى كەڭەسشىسى راسۋل رىسمامبەتوۆ ءوز سوزىندە قازىرگى جاعدايداعى ساياسي پارتيالاردىڭ رولىنە باسا نازار اۋداردى. ساراپشى بۇگىندە الەۋمەتتىك جەلىلەردە اۋقىمدى اۋديتورياسى بار ءتۇرلى بلوگەرلەر مەن بەلسەندىلەر ساياسي پارتيالارعا باسەكەلەستىك جاساي الاتىنىن اتاپ ءوتتى. سوندىقتان پارتيا ءوز مازمۇنىن قالىپتاستىرىپ, ونى اقپاراتتىق كەڭىستىكتە ىلگەرىلەتۋى قاجەت.
الماتىداعى پىكىر الماسۋ سىندارلى جاعدايدا ءوتىپ, كەزدەسۋگە كەلگەن ءاربىر قاتىسۋشىسى ءوز ويىن, ۇسىنىس-تىلەكتەرىن ءبىلدىردى.
ەسكە سالا كەتەيىك, بۇعان دەيىن Amanat توراعاسى ەرلان قوشانوۆ ورتالىق اپپاراتتىڭ جانە وڭىرلىك فيليالداردىڭ باسشىلارىمەن كەڭەس وتكىزىپ, ساياسي تۇعىرنامانى جاڭارتۋ جۇمىستارى تەك «حالىق ۇنىنە قۇلاق اساتىن پارتيا» فورماتىندا جۇرگىزىلۋگە ءتيىس ەكەنىن اتاپ وتكەن بولاتىن. ەركىن پىكىر الماسۋ, كەڭ ساياسي ديالوگ قامتاماسىز ەتىلۋگە ءتيىس.
