تىڭ تەحنولوگيانىڭ مۇمكىندىكتەرى
مەديتسينالىق ۇيىمنىڭ ىسكە قوسىلۋ پروتسەسى 3 كەزەڭنەن تۇردى. 1-كەزەڭىندە «وفەكت-كت» ء(بىر فوتوندى ەميسسيالىق كومپيۋتەرلىك توموگرافيا) دياگنوستيكاسىنىڭ جۇمىسى جولعا قويىلدى. بۇل تىڭ تەحنولوگيا ارقىلى ادام اعزاسىنىڭ قۇرىلىمى مەن اناتومياسى زەرتتەلەدى. اناتوميالىق وزگەرىستەر بولسا, اتالعان اپپارات بۇيرەكتىڭ قالاي جۇمىس ىستەيتىنىن انىقتايدى. يادرولىق مەديتسينا جانە ونكولوگيا ورتالىعى ديرەكتورىنىڭ مىندەتىن اتقارۋشى تاتيانا بەليحينانىڭ ايتۋىنشا, بۇل – وتە ساپالى دياگنوستيكالىق ءادىس. قازىر وسى ءادىس كوپتەگەن ەلدە كەڭ تاراعان ۇردىسكە اينالىپتى.
تاياۋ پەرسپەكتيۆادا ورتالىقتىڭ تەك قۇرساق قۋىسىن, باۋىردى جانە بۇيرەكتى زەرتتەۋمەن عانا شەكتەلىپ قالاتىن ويى جوق. قازىر وسى اپپاراتتاردىڭ كومەگىمەن قالقانشا بەز بەن سۇيەكتىڭ قىزمەتىن جانە الەمدىك مەديتسيناداعى ترەندتەردىڭ بىرىنە نەمەسە «التىن» ستاندارتقا اينالعان ميوكارد پەرفۋزياسىن باعالاۋ, ياعني جۇرەكتىڭ جۇمىسىن زەرتتەۋ قولعا الىندى.
راديونۋكليدتى تەراپيانىڭ ارتىقشىلىعى
«ورتالىق قىزمەتىن جولعا قويۋدىڭ كەلەسى كەزەڭى راديونۋكليدتى تەراپيانىڭ اشىلۋىمەن بايلانىستى. بۇل ەلىمىز ءۇشىن كوپتەن كۇتكەن وقيعا بولارى داۋسىز. ويتكەنى ەمدەۋدىڭ مۇنداي ءتاسىلى قازاقستاننىڭ وزگە وڭىرلەرىندە جۇرگىزىلمەيدى. وسى ارقىلى قالقانشا بەزىنىڭ قاتەرلى ىسىگىن راديواكتيۆتى يودپەن ەمدەۋ كوزدەلگەن. پاپيلليارلى قاتەرلى ىسىك اۋرۋىنىڭ 85%-ىن الىپ قاراساق, ونىڭ بارلىعى بىردەي ەمدەلە بەرمەيدى. ال ءبىز ناۋقاستىڭ تولىعىمەن ايىعۋىن ايتىپ وتىرمىز. سونىمەن قاتار اتالعان ەمدەۋ ءادىسىنىڭ بالاماسى جوق. وسى ارقىلى ناۋقاس كۇندەلىكتى ءدارى-دارمەكتەردى قابىلداۋدان قۇتىلادى. تيرەوتوكسيكوز اۋرۋىن ەمدەۋ دە ازىرگە ستاتسيونارلى رەجىمدە جۇرگىزىلىپ كەلەدى. سونداي-اق تاياۋ بولاشاقتا بۇل دەرتتى دە امبۋلاتورلىق نەگىزدە ەمدەۋ كوزدەلىپ وتىر. ياعني پاتسيەنتتەر ەمدەۋ ورتالىقتارىنا يودتى قابىلداۋ ءۇشىن عانا كەلىپ, ۇيلەرىنە ورالادى. الايدا ازىرگە ءبىزدىڭ رادياتسيالىق قاۋىپسىزدىك نورمالارىمىز بۇل ەمدى جۇرگىزۋگە مۇمكىندىك بەرمەي تۇر», دەدى ت.بەليحينا.
يادرولىق ورتالىق جۇمىسىنىڭ تاعى ءبىر كەزەڭى پوزيتروندى-ەميسسيالىق توموگرافيا (پەت) دياگنوستيكاسىنا قاتىستى. ونىڭ قاتەرلى ىسىك اۋرۋىن ەرتە انىقتاۋدا پايداسى زور. دارىگەرلەر بۇل دياگنوستيكالىق ءادىستى قولدانۋدان كوپ ءۇمىت كۇتەدى. نەگە دەسەڭىز, قاتەرلى ىسىكتىڭ 80%-عا جۋىعى – ونكولوگيالىق اۋرۋ. ماماندار وسى ءادىستىڭ ىسىكتىڭ دامۋىن باعالاۋعا مۇمكىندىك بەرەتىنىن ايتادى. سونىمەن قاتار پەت دياگنوستيكاسى نەۆرولوگيالىق باعىتتا جانە باسقا دا اۋرۋلاردى زەرتتەپ, ەم-دوم شارالارىن تاعايىنداۋدا سەپتىگى مول.
«قازىر مۇندا ونكولوگيالىق اۋرۋلارعا باسىمدىق بەرىلىپ كەلەدى. سەبەبى يادرولىق ورتالىق سەمەيدەگى ونكولوگيالىق ورتالىقتىڭ بازاسىندا جۇمىس ىستەپ, حالىققا قىزمەت كورسەتۋدە. تاياۋدا وسىنداعى دارىگەرلەر ناتري ءفتوريدىن دە قولدانۋدى تاجىريبەگە ەنگىزبەك نيەتتە. ويتكەنى ونىڭ كومەگىمەن يممۋندىق اۋرۋلاردى مەتاستازالىق ىسىكتەن اجىراتۋعا بولادى. بۇل ناۋقاستار ءۇشىن وتە ماڭىزدى», دەيدى يادرولىق مەديتسينا ماماندارى.
كەلەسى كەزەڭى – تۇتاستاي يادرولىق مەديتسيناعا ءتان تەرانوستيكا. ول مەتاستازانىڭ دامۋىن باسەڭدەتۋ ءۇشىن قاتەرلى ىسىك جاسۋشالارىن ءبىر ۋاقىتتا دياگنوستيكالاۋعا جانە ولارعا اسەر ەتۋگە مۇمكىندىك بەرەتىن اگەنتتەردى قۇرۋدى قامتيدى.
«شارتتى تۇردە قالقانشا بەزىن ەمدەۋگە بىزگە ناۋقاس كەلدى دەلىك. الدىن الا وعان دياگنوستيكالىق ستسينتيگرافيانى جۇرگىزىپ, يودقا تاراپ جاتقان جاسۋشالاردى بايقايمىز. وسى ساتتە ءبىز يودتىڭ ەمدىك دوزاسىن بەرەمىز. سودان كەيىن ءۇشىنشى كۇنى ستسينتيگرافيادان ىسىكتىڭ قالاي جينالعانىن, ەمدەۋدىڭ اسەرى بار-جوعىن قارايمىز. مىنە, تەرانوستيكا دەگەنىمىز – وسى. دەمەك, نەنى كورەمىز سونى ەمدەيمىز. يادرولىق مەديتسينانى دامىتۋدىڭ ۇلتتىق جوباسى شەڭبەرىندە جاڭا راديوفارم ءدارى-دارمەكتەردىڭ ءوندىرىسىن جولعا قويىپ, ارنايى جول كارتاسىن دايىنداۋ جوسپارلانىپ وتىر. وكىنىشكە قاراي, قازاقستاندىق نارىق شاعىن جانە شەكتەۋلى. ايتسە دە ەلىمىزدە يادرولىق فيزيكا ينستيتۋتى جۇمىس ىستەيتىنى قۋانتادى. نەگە دەسەڭىز, ءار ەلدىڭ ءوز ارسەنالىندا عىلىمي رەداكتورى مەن يادرولىق فيزيكا ينستيتۋتى بولا بەرمەيدى», دەدى مەديتسينالىق ورتالىقتىڭ باسشىسى.
كەمىندە 3 تەحنولوگيا دايىندالادى
ت.بەليحينا سۇيەك مەتاستازاسىن ەمدەۋ ورتالىق ءۇشىن باسىم باعىتتاردىڭ ءبىرى ەكەنىن ايتتى. سەبەبى بۇل – ءبىرىنشى كەزەكتە ناۋقاس ادامدى جاپپاي اۋىرسىنۋ ازابىنان قۇتقارۋ ءارى ءومىر ءسۇرۋ ساپاسىن جاقسارتۋ. سوندىقتان ساماري تەراپياسى ناۋقاستىڭ جاعدايىن جەڭىلدەتىپ قانا قويماي, وستەوبلاستيكالىق مەتاستازادان قۇتقارۋعا سەپتەسەدى. سۇيەكتەردەگى مەتاستازا – ناۋقاس ادام ءۇشىن بىتپەيتىن اۋىرسىنۋ مەن ازاپقا تولى ۋاقىت. سول سەبەپتى يادرولىق مەديتسينا ورتالىعى ەلورداداعى مەديتسينالىق ورتالىق پەن يادرولىق فيزيكا ينستيتۋتى, سونداي-اق سەمەيدەگى مەديتسينا ۋنيۆەرسيتەتىمەن بىرلەسىپ, ارنايى عىلىمي جوبانىڭ اياسىندا 2025 جىلعا دەيىن يادرولىق مەديتسيناعا ارنالعان كەم دەگەندە 3 تەحنولوگيانى دايىنداپ شىعۋدى مەجەلەپ وتىر.
«جىل سايىن وسىنداعى راديونۋكليدتى تەراپيا بولىمىندە قازاقستاننىڭ ءار تۇكپىرىنەن 500-دەن ارتىق ادام ەمدەلىپ شىعادى. يادرولىق ورتالىقتىڭ قاجەتتى ماماندارمەن قامتىلۋى – 100% دەڭگەيدە. ويتكەنى مەديتسينالىق ۇيىم اشىلماي تۇرىپ, 10 جىل كولەمىندە ءتيىستى مامانداردى دايىنداۋ جۇمىستارى جۇرگىزىلىپتى. بۇعان قوسا ولاردىڭ كوبى الەمنىڭ ۇزدىك مەديتسينالىق ورتالىقتارىندا بىلىكتىلىگىن ارتتىرعان جانە كاسىبي ءبىلىمدى شىڭداۋعا ورتالىق تاراپىنان ۇدايى كوڭىل ءبولىنىپ كەلەدى», دەدى يادرولىق مەديتسينا جانە ونكولوگيا ورتالىعى ديرەكتورىنىڭ مىندەتىن اتقارۋشى.
ورتالىق تۇتاستاي العانداي 600 مىڭنان اسا ادامعا قىزمەت كورسەتۋگە قاۋقارلى. كەيىنگى جىلدارى 80 قىزمەتكەر الەمنىڭ 20 ەلىندە (اۋستراليا, پولشا, يتاليا, كورەيا, شۆەيتساريا, ەستونيا, حورۆاتيا, پورتۋگاليا, دانيا, جاپونيا, رەسەي جانە ت.ب.), ونىڭ ىشىندە ماگاتە جوبالارى شەڭبەرىندە تاعىلىمدامادان وتۋگە مۇمكىندىك الىپتى.
يادرولىق مەديتسينا جانە ونكولوگيا ورتالىعىندا تاۋلىك بويى ستاتسيونارلىق ەمگە شاقتالعان 155 ورىن, ونىڭ ىشىندە: 86 ونكولوگيالىق, 9 حيرۋرگيالىق, 53 راديولوگيالىق بەيىندەگى ورىن (ونىڭ ىشىندە:15 رنت), 7 پاللياتيۆتىك كومەك جانە 40 كۇندىزگى ستاتسيونار ورنى قاراستىرىلعان.
اباي وبلىسى
