ءالى ەسىمدە قازاقستان ۋەفا قۇرامىنا ەنگەننەن كەيىن قارت قۇرلىقتىڭ ەڭ مارتەبەلى ءتۋرنيرى – چەمپيوندار ليگاسىنا «جەڭىس» اتتاندى. جەرەبە مولدوۆانىڭ «شەريف» كلۋبىمەن تۇسكەن-ءدى. ءبىرىنشى ويىندا سىرت الاڭدا 2:1 ەسەبىمەن جەڭىلگەن ەلوردالىق كوماندا قارىمتا كەزدەسۋدە ەسە قايتاراتىنداي كورىندى. راسىندا, ەكىنشى ماتچتىڭ 58-مينۋتىنا دەيىن قارسىلاستارىنان 3:0 ەسەبىمەن الدا تۇرعان «جەڭىس» اينالدىرعان ەكى مينۋتتىڭ ىشىندە ەكى گول جىبەرىپ, جەڭىستەن ايىرىلىپ قالدى.
بۇدان كەيىن ەلوردالىق كلۋب ەكى رەت ەۋروپاعا اتتانىپ, ەكەۋىندە دە ساتسىزدىككە ۇشىرادى. 2003-2004 جىلدارى ۋەفا كۋبوگى ءۇشىن تالاستا چەحيانىڭ «ۆيكتوريا جيجكوۆ» كومانداسىمەن شەبەرلىك بايقاسىپ, ەكى ويىننىڭ قورىتىندىسى بويىنشا 1:6 ەسەبىمەن ۇتىلدى. كەيىننەن 2007-2008 جىلى «استانا» رەتىندە چەمپيوندار ليگاسىنا قاتىستى. العاشقى كەزەڭدە گرۋزيانىڭ «وليمپي» كلۋبىمەن كەزدەسكەن ەلوردالىقتار ءبىرىنشى ماتچتا تەڭ تارقاسسا, ەكىنشى ويىندا قارسىلاستار قاقپاسىنا جاۋاپسىز ءۇش گول سالدى. وكىنىشكە قاراي, كەلەسى راۋندتا نورۆەگيانىڭ «رۋسەنبورگىنا» قارسى تۇرا العان جوق. قاجىمۇقان مۇڭايتپاس ۇلى ستاديونىندا سكانديناۆتارعا 1:3 ەسەبىمەن ەسە جىبەرىپ, جانكۇيەرلەرىن مۇڭايتتى. ال ترونحەيمدەگى ماتچتا 7:1 ەسەبىمەن وڭباي جەڭىلدى. ءسويتىپ, «استانانىڭ» قارت قۇرلىقتاعى جورىعى اياقتالدى.
جالپى, «جەڭىس» كلۋبى ءوزى ورنالاسقان قالا سەكىلدى تاريحىندا اتاۋىن بىرنەشە رەت وزگەرتكەن. 1964 جىلى, ياعني كوماندانىڭ ىرگەتاسى قالانعاندا ونىڭ اتاۋى «دينامو» بولعان. ون ءبىر جىلدان سوڭ كلۋبتى «تسەليننيك» دەپ اتادى. ەل استاناسى اقمولاعا كوشكەننەن كەيىن 1998 جىلى كوماندا ءبىر جىلعا جۋىق «استانا» اتاۋىمەن ونەر كورسەتتى. 1999 جىلى «جەڭىس» بولىپ وزگەردى. 2006 جىلى كوماندانى قايتادان «استانا» دەپ تىركەۋ تۋرالى شەشىم قابىلداندى. بىراق 2011 جىلى الماتىلىق «لوكوموتيۆ» كلۋبىنىڭ ەلورداعا كوشىپ كەلىپ, ەسىمىن «استانا» دەپ اۋىستىرۋىنا بايلانىستى جەرگىلىكتى كوماندا «استانا-1964» دەپ اتالا باستادى.
ەلوردالىق كوماندا ءۇشىن مىڭجىلدىقتار توعىسى تابىستى بولعانىن ايتا كەتكەن ءجون. 2000 جىلى كلۋب ەل بىرىنشىلىگىندە توپ جاردى. ءسويتىپ, توعىزىنشى تەرريتوريانىڭ چەمپيونى اتانعان بەسىنشى كوماندا بولدى. «جەڭىستىڭ» جەڭىسىنە برازيليالىق نيلتون مەندەس پەن ۆلاديمير نيدەرگاۋس زور ۇلەس قوستى. مارقۇم برازيليالىق فۋتبولشى 21 گول سالسا, قازاقستاندىق شابۋىلشى 15 مارتە قارسىلاس قاقپاسىن ءدال كوزدەدى. ايتا كەتەرلىگى, سول جىلعى بىرىنشىلىكتە ەلوردالىق كوماندا قىزىلجارلىق «اكسەسس-گولدەن-گرەين» كلۋبىنان التىن جۇلدە ءۇشىن وتكەن ويىندا باسىم تۇسكەن-ءدى.
2001 جىلى «جەڭىس» ەكىنشى مارتە توپ جاردى. بۇل جولى 81 ۇپايمەن جەكە-دارا كوش باستاپ, چەمپيوندار ليگاسىنا قاتىسۋ قۇقىعىن جەڭىپ الدى. سونداي-اق قازاقستان كۋبوگى ءۇشىن تارتىستا اقتىق سىنعا دەيىن جەتىپ, كەرەكۋلىك «ەرتىستەن» ايلاسىن اسىردى. 2002 جىلى «جەڭىس» تاعى ءبىر مارتە كۋبوك يەگەرى اتاندى. بۇل جولى ەلوردالىقتار تاعى دا «ەرتىستى» جەرگە قاراتتى.
چەمپيوناتتاعى ءۇشىنشى التىنىن ەلوردالىق كوماندا «استانا» اتاۋىمەن 2006 جىلى جەڭىپ الدى. ال ودان ءبىر جىل بۇرىن ەل كۋبوگى ءۇشىن تالاستا الماتىلىق «قايراتتان» باسىم تۇسكەن ەدى. بۇدان بولەك, «جەڭىس» چەمپيوناتتا ءبىر رەت قولا جۇلدەگەر (2003 جىل) اتانىپ, كۋبوك ءۇشىن تالاستا ەكى رەت اقتىق كەزەڭدە ءسۇرىندى (2001 جىل, 2006 جىل).
«جەڭىس» فۋتبول كلۋبى كەزىندە جاستاردىڭ توماعاسىن سىپىراتىن ەلىمىزدەگى ۇزدىك كوماندالاردىڭ ءبىرى سانالاتىن. ماسەلەن, داۆيد لوريا, ماكسيم جالماعامبەتوۆ, انتون چيچۋلين, يسلامبەك قۋات سەكىلدى فۋتبولشىلار «جەڭىستە» ءجۇرىپ اياقدوپتىڭ قىر-سىرىن مەڭگەردى. سونداي-اق الەكساندر موكين, جامبىل كوكەەۆ, مۇرات تىلەشوۆ سەكىلدى سايىپقىراندار دا ەلوردالىق كوماندانىڭ جەيدەسىندە تەر توكتى.
بىراق قارجىلىق قيىندىقتارعا بايلانىستى كلۋب 2015 جىلى جابىلىپ تىندى. وسىلايشا, قازاقستاننىڭ ءۇش دۇركىن چەمپيونى, ءۇش مارتە كۋبوك يەگەرى تاريح قويناۋىنا كەتتى. بىراق جانكۇيەرلەردىڭ قۋانىشىنا وراي, كوماندا 2021 جىلى قايتا ء«تىرىلدى». كوماندا «جەڭىس» اتاۋىمەن ءبىرىنشى ليگاعا قوسىلىپ, بىلتىر ءۇشىنشى ورىن يەلەندى.
سوندىقتان شىعار, بايىرعى تۇرعىندار ەلوردانىڭ نەگىزگى كلۋبى رەتىندە «جەڭىس» كومانداسىن ەسەپتەيدى. ويىنى جۇرمەي تۇرسا دا, ق.مۇڭايتپاس ۇلى ستاديونىنداعى احۋال ناشار بولسا دا, وڭ جاعالاۋداعى الاڭعا اعىلاتىن جۇرتتىڭ قاراسى قالىڭ. وسىندايدا كەزىندە اتوي سالعان «استانانى» اڭسايتىنىمىز راس. بالكىم, كۇندەردىڭ ءبىر كۇنى ەلوردالىقتار بۇرىنعى اتاۋىن قايتارىپ قالار. ايتەۋىر, «جەڭىستىڭ» كۇندەرىندە جۇزدەسە بەرەيىك.
