جاستار سارايىندا وتكەن ءىس-شاراعا ءوڭىر باسشىسى ارحيمەد مۇحامبەتوۆ, «وتباسى بانك» اق-نىڭ باسقارما ءتورايىمى ءلاززات يبراگيموۆا, سونداي-اق وبلىس اكىمدىگى جانىنداعى جاستار ءىسى جونىندەگى كەڭەس مۇشەلەرى مەن بەلسەندى جاستار قاتىستى.
جاس وتباسىلار مەن جاس مامانداردىڭ باسپانا ساتىپ الۋىنا كومەك كورسەتۋ ماقساتىندا ىسكە قوسىلعان «جاس شاڭىراق» وڭىرلىك باعدارلاماسىن وبلىس اكىمدىگى مەن «وتباسى بانك» اق وبلىستىق فيليالى بىرلەسىپ ازىرلەگەن. باعدارلاما, نەگىزىنەن جوعارى سۇرانىسقا يە سالالاردا ەڭبەك ەتىپ جۇرگەن 35 جاسقا دەيىنگى جاس ماماندارعا ارنالادى. بۇل ورايدا وبلىس اكىمدىگى مەن «وتباسى بانك» اق-نىڭ بىرلەسكەن قاراجاتى ەسەبىنەن جاستارعا تۇرعىن ءۇي ساتىپ الۋعا جەتەتىن قارجى نەسيە رەتىندە بەرىلەتىن بولادى.
– ءبىز جاس وتباسىلار مەن جاس مامانداردى قولداۋعا مۇددەلىمىز. سوعان وراي, وسى ساناتتاعى جاستارعا تۇرعىن ءۇي الۋعا كومەكتەسۋ ءۇشىن «جاس شاڭىراق» وڭىرلىك باعدارلاماسىن ازىرلەدىك. «وتباسى بانك» اق باسشىلىعى بۇل باستاماعا قولداۋ جاسادى, سول ءۇشىن ءبىز ەرەكشە العىس بىلدىرەمىز. «جاس شاڭىراق» باعدارلاماسى ازىرگە قوستاناي قالاسىنىڭ اۋماعىندا قاناتقاقتى جوبا رەتىندە ىسكە اسىرىلاتىن بولادى. بۇل ماقساتتا 700 ملن تەڭگە قارجى قاراستىرىلىپ وتىر. ونىڭ 350 ملن تەڭگەسى «وتباسى بانك» اق قاراجاتى ەسەبىنەن, قالعانى جەرگىلىكتى بيۋدجەتتەن بولىنەتىن بولادى. اتالعان جوبانى ىسكە اسىرۋ بارىسىندا بيىلدىڭ وزىندە 50 جاس وتباسى باسپانا قۋانىشىن سەزىنەتىن بولادى. الداعى ۋاقىتتا ءبىز بۇل باعدارلامانىڭ اۋقىمىن كەڭەيتىپ, بۇكىل وبلىس كولەمىن قامتۋ جاعىن قاراستىرۋدى كوزدەپ وتىرمىز, – دەدى وبلىس اكىمى ارحيمەد مۇحامبەتوۆ.
باعدارلاماعا قاتىسۋعا ءۇمىتتى جاستار قوستاناي قالاسىندا كەمىندە 1 جىل تۇراقتى تىركەۋدە تۇرۋى شارت. سونداي-اق دەنساۋلىق ساقتاۋ, تۇرعىن ءۇي-كوممۋنالدىق شارۋاشىلىق, الەۋمەتتىك قىزمەتتەر سياقتى جوعارى سۇرانىسقا يە سالالاردا كەمىندە 1 جىل جۇمىس ءوتىلى بولۋعا ءتيىس.
ءوتىنىش بەرۋشى جانە ونىڭ وتباسى مۇشەلەرىنىڭ ەل اۋماعىندا سوڭعى 5 جىل ىشىندە تۇرعىن ءۇيى جانە يەلىكتەن شىعارۋ فاكتىلەرى, سونداي-اق مەملەكەتتىك باعدارلامالار بويىنشا الىنعان جالعا بەرىلەتىن تۇرعىن ۇيلەرى بولماۋعا ءتيىس. باعدارلاماعا ەرلى-زايىپتىلاردىڭ بىرەۋى عانا قاتىسا الادى.
ىرىكتەۋ ءراسىمىنىڭ اشىقتىعىن قامتاماسىز ەتۋ جانە تۇرعىندار تاراپىنان تۋىنداۋى مۇمكىن نارازىلىقتى بولدىرماۋ ماقساتىندا قاتىسۋشىلاردى ىرىكتەۋ بالدىق جۇيە بويىنشا جانە تاۋەلسىز كونكۋرستىق كوميسسيانىڭ وتىرىسىن وتكىزۋ ارقىلى جۇرگىزىلەدى.
– جالپى, اعىمداعى جىلدىڭ قورىتىندىسى بويىنشا ءبىز 450,5 مىڭ شارشى مەتر تۇرعىن ءۇي سالىپ, پايدالانۋعا بەرۋدى جوسپارلاپ وتىرمىز, بۇل وتكەن جىلدىڭ كورسەتكىشتەرىنەن الدەقايدا ارتىق, – دەدى وبلىس اكىمى.
ءىس-شارا بارىسىندا ايماق باسشىسى وبلىستاعى جاستار ساياساتىنىڭ جۇزەگە اسىرىلۋ بارىسىنا دا توقتالىپ, جاستارعا مەملەكەت تاراپىنان كورسەتىلىپ جاتقان مەملەكەتتىك قولداۋدىڭ كوپ ەكەنىن تىلگە تيەك ەتتى. اكىمنىڭ ايتۋىنشا, بۇگىندە ءوڭىر تۇرعىندارىنىڭ 18 پايىزىن جاستار قۇرايدى. وبلىستا تۇراتىن جاستاردىڭ سانى شامامەن 152 مىڭنان اسقان. سوڭعى جىلدارى مەملەكەتتىك جاستار ساياساتىن ىسكە اسىرۋ بارىسىندا جاستاردىڭ وزەكتى ماسەلەلەرىنە ەرەكشە كوڭىل ءبولىنىپ, كوپتەگەن يگى جوبالار جۇزەگە اسىرىلعان.
ماسەلەن, «بيزنەستىڭ جول كارتاسى» باعدارلاماسى بويىنشا جىل باسىنان بەرى 100-دەن استام جاس ازامات گرانتتىق قولداۋ مەن سۋبسيدياعا يە بولعان. ونىڭ ىشىندە 7 جوباعا جالپى كولەمى 30 ملن تەڭگەنىڭ گرانتى بەرىلسە, 43 جوبانىڭ اۆتورى 350 ملن تەڭگەگە يە بولىپ وتىر. سونداي-اق جاس كاسىپكەرلەر ازىرلەگەن 51 جوباعا جالپى سوماسى 1 ملرد تەڭگە سۋبسيديا بولىنگەن.
ۇلتتىق كاسىپكەرلىكتى دامىتۋ جوباسى بويىنشا 5 مىڭنان استام جاس ازامات جۇمىسقا ورنالاستىرىلدى.
وڭىردە جاستاردى جۇمىسپەن قامتۋ ماقساتىندا «جاسىل ەل» جوباسى ءتيىمدى جۇزەگە اسىرىلۋدا. جوبا اياسىندا تامىز ايىنىڭ اياعىنا دەيىن كەمىندە 1 800 ازاماتتى جۇمىسقا ورنالاستىرۋ كوزدەلىپ وتىر.
قوستاناي وبلىسى
