...جۇمىسقا بارماق بولىپ ۇيدەن شىققان جىگىتتى شىر ەتە قالعان بەلگىسىز ءنومىر سەلك ەتكىزدى. وعان سامارقاۋ كوز تاستاپ, كەرەناۋلاۋ كوڭىلمەن باسىپ ەدى, ار جاقتان مۇنىڭ اتى-ءجونىن جاڭىلماي ايتقان بىرەۋ باستىرمالاتىپ كەتتى. جاڭا عانا ەسكە العان دەپوزيتتەگى اقشاسىن بىرەۋ قولدى قىلماق بولعان ەكەن. حابارلاسىپ تۇرعان مىنا كىسى بانكتىڭ قاۋىپسىزدىك قىزمەتىنەن بولعاندىقتان دەر كەزىندە ۇستاپتى. بىراق دەپوزيتتى تولىق قاۋىپسىزدەندىرۋ ءۇشىن اقشاڭىزدى مىنا شوتقا دەرەۋ اۋىستىرۋىڭىز كەرەك دەپ بۇل جاۋاپ بەرگەنشە, ۆاتساپپەن جاڭا شوتتىڭ ءنومىرىن دە جىبەرىپ ۇلگەردى.
جولامان اڭقاۋ جىگىت ەمەس ەدى, ءتىپتى كەيبىر الاياقتاردىڭ قىلىقتارىن دا ەستىپ جۇرەتىن. الايدا 15 ملن تەڭگە دەپوزيتىڭىزدەن ايىرىلىپ قالعالى تۇرسىز دەگەن ءسوزدىڭ قۇدىرەتى ونىڭ وي-ساناسىن تۇمشالاپ تاستادى. قاۋىپتى جەتكىزگەن ادامنىڭ سەنىمدى سوزدەرى, بانككە ءتان تەرميندەر مەن سوزدەردى جەتكىزۋى دە سەنىم تۋدىرعان. سوندىقتان جولامان ءوزىنىڭ بانكىن اشىپ, قوسا بەرىلگەن نۇسقاۋلىقتىڭ ايتقانىن تولىق ىستەپ, بار اقشاسىن «قاۋىپسىز» ەسەپشوتقا اۋدارا سالىپ, ءبىر «ۋھ» دەگەن ەدى.
بىراق الدەنەدەن جۇرەگى دۇرسىلدەپ, مازاسى كەتە بەرگەن سوڭ جاڭا ەسەپشوتىنداعى دەپوزيتىنىڭ اماندىعىن ءبىلىپ قويايىنشى دەپ بانكتەگى شوتىن اشسا... ونداعى سوما «0»-ءدى كورسەتىپ تۇر. تۇسكەن اقشانى بەس مينۋت بۇرىن عانا بىرەۋ تولىعىمەن باسقا جاققا اۋدارىپ جىبەرىپتى... دەنساۋلىعى قانشا مىقتى بولسا دا, جوكەڭ سول جەردە تالىپ قالا جازدايدى. تەك ۇيدەن شىققان ايەلىنىڭ كومەگىمەن عانا ەسىن جيناپ, پوليتسياعا ارىز بەرۋگە كەلەدى.
سولتۇستىك قازاقستان وبلىسى پد باستىعىنىڭ ورىنباسارى رۋسلان نازاروۆ مۇنداي وقيعالاردىڭ سوڭعى كەزدەرى ءتىپتى جيىلەپ كەتكەنىن جەتكىزدى. سوڭعى جەتى ايدا عانا ءدال وسىنداي شاعىمنىڭ 129-ى تىركەلگەن ەكەن. «مۇنداي قىلمىستاردى اشۋ وتە قيىن, ويتكەنى الاياقتار كوبىنەسە ەلدىڭ باسقا ايماقتارىندا وتىرادى. ءتىپتى باسقا مەملەكەتتەردە وتىرۋى دا مۇمكىن. ءبىز تەك قىلمىستىڭ الدىن الۋدى تۇرعىندارعا ۇنەمى ايتىپ وتىرامىز. ەشقاشان «بانك قىزمەتكەرىمىن» دەپ حابارلاسقان ادامنىڭ سوزىنە سەنبەڭىزدەر. ەگەر بانكتەگى شوتىڭىزدا ءبىر كۇدىك بولسا, ونى دەرەۋ كەلىپ تەكسەرىڭىزدەر. قۇپيا دەرەكتەرىڭىزدى ەشكىمگە بەرمەڭىزدەر دەگەن ەسكەرتۋلەردى بانكتەردىڭ ەسىگىنە, بانكوماتتارعا ءىلىپ قويدىق جانە باق ارقىلى حابارلاۋدامىز», دەدى ول.
دەگەنمەن وسىنداي الاياقتاردىڭ كەيبىرى ۇستالىپ تا جاتىر. پوليتسيا ولاردىڭ قىلمىس جاساۋ تاريحىن جيناقتاپ, بىرىزدەندىرىپ, شىعۋ تەگىن انىقتاسا عوي. بىزدىڭشە, مۇنداي الاياقتىقتى, نەگىزىنەن, بۇرىن بانكتە ىستەپ, ونداعى تەرميندەردى, سويلەۋ مانەرلەرىن جاقسى بىلەتىن ادامدار عانا جاسايدى. سوندىقتان قازىر دە, بۇرىن دا بانكتە ىستەگەن جانە ىستەيتىن ادامداردىڭ داۋىس ىرعاعىن, دىبىسىن جازىپ, ساقتايتىن ارناۋلى كارتوتەكا جاساعان دۇرىس بولار ەدى. ەگەر وندايلار كومپيۋتەردە تۇرسا, جاپا شەگۋشى ولاردى ەستىگەندە كىم ەكەنىن كورسەتىپ بەرەر ەدى.
بۇرىن قىلمىسكەرلەردىڭ فوتولارى, ساۋساقتارىنىڭ تاڭبالارى وسىلاي ساقتالاتىن. ەندى بانك قىزمەتكەرلەرىنىڭ دىبىستارى كومپيۋتەردە وسىلاي ساقتالسا دۇرىس بولار ەدى. ويتكەنى الاياق قىلمىسكەرلەر الىستان ەمەس, ناق ءوزىمىزدىڭ بانكتە بۇرىن نەمەسە قازىر ىستەيتىن قىزمەتكەرلەردىڭ وزدەرىنىڭ اراسىنان شىعادى. سوندا پوليتسيا دا الاياقتى الىستان ىزدەپ سابىلماي, جاقىننان تابار ەدى. ارينە, الاياق ءوزىنىڭ قۇرباندىعىنا ءوز داۋسىن كورسەتپەي, سىبايلاسىن سويلەستىرۋى مۇمكىن. بىراق وندايلاردىڭ داۋىسى ءبارىبىر سەزىك تۋدىرماي قويمايدى... سوندىقتان دا كۇننەن-كۇنگە ۇلعايىپ بارا جاتقان بانكىلەرمەن بايلانىستى الاياقتىقتى قۇرىقتاۋ ءۇشىن پوليتسيا قىزمەتى «زامانىڭ تۇلكى بولسا – تازى بوپ شال» دەگەندەي وسىنداي جاڭا ادىستەر تاپقانى ءجون.
ارينە, ادامنىڭ قۇقىعىنا قول سۇعۋ دەپ مۇندايعا كوپتەگەن ادام قارسى بولۋى مۇمكىن, بىراق قاۋىپسىزدىك ءۇشىن حالىقتىڭ وزىنە پايدالى بولاتىنىن تۇسىنسە, ەشكىم قارسى بولا قويماس.
سولتۇستىك قازاقستان وبلىسى
