نومينالى 500 تەڭگەلىك كۇمىستەن, نومينالى 100 تەڭگەلىك مەلحيوردان جانە نومينالى 100 تەڭگەلىك نەيزيلبەردەن جاسالعان مونەتالار «قازاقستاننىڭ ادەت-عۇرىپتارى, ۇلتتىق ويىندارى» سەرياسىن جالعاستىرادى.
ءتىلاشار – ءار وتباسىنىڭ ومىرىندە كورىنىس تاباتىن ەرەكشە وقيعالاردىڭ ءبىرى. بۇرىن بۇل عۇرىپ بالا العاشقى سوزدەردى ايتا باستاعاننان باستاپ جاسالعان. بۇگىنگى تاڭدا بۇل ءداستۇر ءبىلىم الۋ جولىنداعى العاشقى قادامدى بىلدىرەدى.
«مونەتانىڭ نەگىزگى بەتىندە, ورتا تۇسىندا ويۋ-ورنەك ۇستىندە قازاقستان رەسپۋبليكاسىنىڭ مەملەكەتتىك ەلتاڭباسى, جيەگىندە QAZAQSTAN RESPÝBLIKASY • REPUBLIC OF KAZAKHSTAN دەگەن جازۋ, تومەنگى جاعىندا مونەتا نومينالىن بىلدىرەتىن ساندار ورنالاسقان. مونەتالاردىڭ ەكىنشى بەتىندە (رەۆەرسىندە) مەكتەپ اتريبۋتى ەلەمەنتتەرى بار بالالار سۋرەتىنىڭ بەينەسى بەرىلگەن, سونىمەن بىرگە, مونەتا جاسالعان مەتالدىڭ سىناماسى مەن ماسساسى, سوعىلعان جىلى كورسەتىلگەن», دەپ سيپاتتالعان ءباسپاسوز قىزمەتى تاراتقان حابارلامادا.
سونداي-اق كۇمىستەن, مەلحيوردان جانە نەيزيلبەردەن جاسالعان مونەتالاردىڭ بەت جاعى مەن سىرت كەلبەتىندەگى بەينەلەر بىردەي. كۇمىستەن جاسالعان مونەتالار ءتۇرلى-ءتۇستى ەمال جاعۋ تەحنولوگياسىن قولدانا وتىرىپ جاسالعان, مەلحيوردان جاسالعان مونەتالاردا ينتەرفەرەنتسيالىق قۇبىلمالى بەت قاباتىن جاعۋ تەحنولوگياسى قولدانىلعان.
كوللەكتسيالىق مونەتالار قازاقستان تەڭگە سارايىندا دايىندالعان.
