Energyprom زەرتتەۋىنە سايكەس, 2022 جىلعى شىلدەدە قازاقستاندا 11,6 مىڭ جەڭىل اۆتوموبيل جانە جەڭىل كوممەرتسيالىق تەحنيكا ساتىلدى. بۇل وتكەن جىلعى شىلدەمەن سالىستىرعاندا 9,1%-عا ارتىق. ساتۋدىڭ ءوسۋى وتاندىق اۆتوموبيل زاۋىتتارىن قازاقستاندىق تۇتىنۋشىلاردىڭ قاجەتتىلىكتەرى ءۇشىن جەدەل قايتا قۇرۋ جانە رەسەيلىك ماشينالاردىڭ تاپشىلىعى جاعدايىندا ىشكى نارىقتى قانىقتىرۋ ارقىلى قامتاماسىز ەتىلدى.
قازاقستاندا ساتىلعان جاڭا اۆتوموبيلدەر سانى بويىنشا 2022 جىلعى شىلدەدە Chevrolet ماركاسى كوشباسشى بولدى. 4 مىڭ قازاقستاندىق اتالعان ماركانىڭ اۆتوكولىگىن ساتىپ العان. بۇل 2021 جىلعى شىلدەمەن سالىستىرعاندا 29,4%-عا ارتىق. سونداي-اق Hyundai ماركالى 2,6 مىڭ اۆتوكولىك ساتىلدى, مۇنداعى ءوسىم 29,6%-دى قۇرايدى. Kia ماركالى 1,4 مىڭ كولىك كوشباسشىلارىنىڭ ۇشتىگىن 11%-دىق وسىممەن تۇيىقتادى. توپ 5-كە Toyota جانە Lada دا ەندى.
شىلدە ايىندا قازاقستاندىقتار اراسىندا تانىمال جاڭا اۆتوكولىكتەردىڭ توپ 10 قۇرامىنا Hyundai ماركاسىنىڭ بىردەن 5 مودەلى كىردى. ولار: Tucson (810 بىرلىك), Sonata (433 بىرلىك), Santa Fe (414 بىرلىك), Creta (391 بىرلىك) جانە Elantra (373 بىرلىك). بۇدان باسقا, توپ قۇرامىندا Chevrolet Cobalt (2796 بىرلىك) جانە Nexia (957 بىرلىك), سونداي-اق Kia Sportage (917 بىرلىك), Toyota LC Prado (491 بىرلىك) جانە Lada Granta (276 بىرلىك) مودەلى بولدى.
