قازاقستان اسكەري دەلەگاتسياسىن قورعانىس ءمينيسترى, گەنەرال-پولكوۆنيك رۋسلان جاقسىلىقوۆ باسقارىپ باردى.
قورعانىس ۆەدومستۆولارىنىڭ باسشىلارى قارۋلى كۇشتەر اراسىنداعى ىنتىماقتاستىقتى ودان ءارى دامىتۋعا نيەت بىلدىرە وتىرىپ, شىۇ-عا مۇشە مەملەكەتتەر اراسىنداعى دوستىق پەن تاتۋ كورشىلىك قاتىناستاردى نىعايتۋعا, وڭىردەگى بەيبىتشىلىك پەن تۇراقتىلىقتى جانە سەنىمدى ورنىقتى دامىتۋدى قامتاماسىز ەتۋ ماقساتىندا ءوزارا ىنتىماقتاستىقتى كەڭەيتۋگە ۋاعدالاستى.
كەڭەسكە قاتىسۋشىلار اۋعانستانداعى تۇراقسىز جاعداي ەرەكشە الاڭداۋشىلىق تۋدىرىپ وتىرعانىن دا اتاپ ءوتتى.
قازاقستان قورعانىس ءمينيسترى شىۇ حارتياسىنا نەگىزدەلگەن جانە ۇزاق مەرزىمدى تاتۋ كورشىلىك, دوستىق پەن ىنتىماقتاستىق تۋرالى شارتتى جانە باسقا دا قۇجاتتاردى ءسوز ەتە كەلە, ۇيىمعا مۇشە مەملەكەتتەر اراسىنداعى قارىم-قاتىناستىڭ وڭ سيپاتى بەيبىتشىلىك پەن تۇراقتىلىقتى ساقتاۋعا, سونداي-اق شىۇ كەڭىستىگىندە قاۋىپسىزدىك سالاسىنداعى وزەكتى ورتاق پروبلەمالاردى شەشۋ جولدارىن ىزدەۋگە ىقپال ەتەتىنىن اتاپ ءوتتى.
سونداي-اق, قازاقستان قورعانىس ۆەدومستۆوسىنىڭ باسشىسى, گەنەرال-پولكوۆنيك رۋسلان جاقسىلىقوۆ شانحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرى كەڭەسى اياسىندا وزبەكستاندىق ارىپتەسى گەنەرال-لەيتەنانت باحودير قۇربانوۆ جانە ءۇندىستان قورعانىس ءمينيسترى رادجناتح سينگحپەن كەزدەستى.
كەزدەسۋ بارىسىندا قازاقستان مەن وزبەكستاننىڭ اسكەري سالاداعى ەكىجاقتى ىنتىماقتاستىعىنىڭ قازىرگى جاي-كۇيىنىڭ اسپەكتىلەرى تالقىلاندى. كادر دايارلاۋ, بىرلەسكەن جاۋىنگەرلىك دايارلىق ءىس-شارالارىن وتكىزۋ, اسكەري-تەحنيكالىق ىنتىماقتاستىق ماسەلەلەرى توڭىرەگىندە اڭگىمەلەستى. مينيسترلەر ورتالىق ازيا وڭىرىندەگى سىن-تەگەۋرىندەر مەن قاۋىپ-قاتەرلەرگە قاتىستى پىكىر الماستى.
ال رادجناتح سينگحپەن ەكىجاقتى كەزدەسۋدە تاراپتار اسكەري-تەحنيكالىق ىنتىماقتاستىق, بىتىمگەرشىلىك قىزمەت, كادرلار دايارلاۋ جانە اسكەري ءبىلىم بەرۋ ماسەلەلەرىن تالقىلادى.
قورعانىس ۆەدومستۆولارىنىڭ باسشىلارى ەكى جاقتى نەگىزدە دە, حالىقارالىق فورماتتار شەڭبەرىندە دە ەكى ەل اراسىنداعى ءوزارا قارىم-قاتىناس دەڭگەيىن جوعارى باعالاپ, قورعانىس سالاسىنداعى ىنتىماقتاستىقتى نىعايتۋعا مۇددەلى ەكەنىن ءبىلدىردى.
