جۇمىسپەن قامتۋ ورتالىعىنىڭ كومەگىمەن بيىلعى 7 ايدا سولتۇستىك قازاقستان وبلىسىندا بارلىعى 9 548 ادام جۇمىسقا ورنالاستىرىلعان. سونىڭ ىشىندە ورتالىقتار ارقىلى ورنالاسقانداردىڭ سانى 6 مىڭعا جۋىق. الايدا وڭىردە ۇلتتىق جوبالار شەڭبەرىندە جاڭا جۇمىس ورىندارىن اشۋ كورسەتكىشى تومەن, بارلىعى – 596. قىزىلجار جانە تايىنشا اۋداندارىندا بۇل جۇمىس مۇلدەم جۇرگىزىلمەيدى, ەسىل, ايىرتاۋ, شال اقىن اۋداندارىنداعى كورسەتكىش وتە تومەن. جۋىردا وبلىسقا كەلگەن ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا جۇمىسقا ورنالاستىرۋ مىندەتتى زەينەتاقى اۋدارىمدارىمەن راستالاتىنىن ايتا كەلىپ سولتۇستىك قازاقستان وبلىسىندا بۇل كورسەتكىش 59 پايىز عانا ەكەنىن ايتتى. سونىڭ ىشىندە وبلىستىق دەڭگەيدەگى ەڭ تومەنگى كورسەتكىش مامليۋت (37%) پەن قىزىلجار (38,2%) اۋداندارىنا تيەسىلى بولىپ وتىر. «ال كاسىپكەرلىكتى قولداۋ جوباسىن قوسپاعاندا, ۇلتتىق جوبالار شەڭبەرىندە ماعجان جۇماباەۆ, مامليۋت جانە ءۋاليحانوۆ اۋداندارىندا جۇمىسقا ورنالاسقانداردىڭ بىردە-بىرەۋى زەينەتاقى جارنالارىن اۋدارماعان», دەپ اتاپ ءوتتى مينيستر.
بيىلعى 7 ايدا سولتۇستىك قازاقستان وبلىسىنىڭ وڭىرلىك كارتاسىندا جوسپارلانعان 2 166 تۇراقتى جۇمىس ورنىنىڭ تەك 437-ءسى اشىلعان, بۇل 10,7% عانا قۇرايدى. ال ايىرتاۋ, ماعجان جۇماباەۆ, عابيت مۇسىرەپوۆ, ەسىل, قىزىلجار, مامليۋت, تايىنشا اۋداندارىندا ءتىپتى بىردە-ءبىر جاڭا جۇمىس ورنى اشىلماعان.
جەرگىلىكتى اتقارۋشى بيلىك ورگاندارىنىڭ وكىلدەرىمەن كەزدەسكەندە مينيستر مۇگەدەك جانداردى قولداۋ, سونىمەن قاتار زەينەتاقى جانە الەۋمەتتىك قامسىزداندىرۋ ماسەلەلەرىن تالقىلادى. وتباسىنىڭ تسيفرلى كارتاسىن ازىرلەۋ بويىنشا جۇرگىزىلىپ جاتقان جۇمىستار تۋرالى حاباردار ەتتى. سولتۇستىك قازاقستان وبلىسىندا قازىر 208 مىڭنان استام وتباسى بار, ولاردىڭ 99,6 مىڭنان استامىنىڭ تۇرمىس جاعدايى ناشار. بۇل وتە ناشار كورسەتكىش. ەڭبەك جانە الەۋمەتتىك قورعاۋ مينيسترلىگى جۇرگىزگەن ساراپتاماعا قاراعاندا, وزدەرىنە ءتيىستى كومەكتى الا المايتىن وتباسىلار دا بار. مۇنداي وتباسىلار 1 قىركۇيەكتەن باستاپ مەملەكەت تاراپىنان وزدەرىنە كورسەتىلەتىن كومەك تۋرالى سمس-حابارلامالار الاتىن كورىنەدى.
وسى جانە باسقا ماسەلەلەر بويىنشا بىرنەشە اۋداننىڭ جانە سالالىق قىزمەتتەر باسشىلارىنىڭ ۇسىنىس-پىكىرلەرى تىڭدالدى. مينيسترلىكتىڭ قاتىسۋىنسىز شەشىلمەيتىن كەيبىر ماسەلەلەر بويىنشا مينيستر وڭ شەشىمدەر قابىلداناتىنىن جەتكىزدى.
جۇمىس كۇشى ارتىق وڭىرلەردەن سولتۇستىككە قونىس اۋدارۋشىلارعا ۇلكەن جەڭىلدىكتەر بەرىلىپ, كوشى-قون شىعىندارى ءۇشىن اقشا تولەنەدى, تۇرعىن ۇيلەر بەرىلەدى, جالعا الۋعا سۋبسيديالار بولىنەدى, كاسىپكەرلىك باستامانى قولداۋ ءۇشىن جەڭىلدەتىلگەن نەسيەلەر بەرىلەدى. الايدا كوش ازىرگە قاۋىرت بولماي وتىر. سولتۇستىكتىڭ سالقىنى وڭتۇستىكتىڭ جايماشۋاق كليماتىنا ۇيرەنگەن جاندار ءۇشىن ءالى دە الىنبايتىن قامال بولىپ تۇر. وتكەن جىلى 4 مىڭعا جۋىق ادامى بار 1 147 وتباسىن كوشىرۋ بەلگىلەنسە, 7 ايدا سونىڭ 47 پايىزى عانا كوشىپ كەلگەن. كۇزدىڭ ىزعىرىعى باستالعاندا قالعان جۇرتتىڭ كوشىپ كەلۋى نەعايبىل. جاس بالالارىن دىردەكتەتىپ جاڭا جەرگە قونىستانۋعا كوپ ادامنىڭ تاۋەكەل ەتپەسى انىق.
جاڭا گەوساياسي جاعدايدى ەسكەرە وتىرىپ, ەڭبەك جانە حالىقتى الەۋمەتتىك قورعاۋ مينيسترلىگى «اشىق قازاقستان 500+» كوشى-قون ساياساتىنىڭ تۇجىرىمداماسىن قالىپتاستىرعان. ول ەلىمىزگە بىلىكتى كادرلاردىڭ كەلۋىن ىنتالاندىرۋدى, شەتەلدە جۇمىس ىستەيتىن قازاقستاندىقتاردىڭ قۇقىقتارىن قورعاۋدى جانە ەل وڭىرلەرى اراسىنداعى دەموگرافيالىق تەڭسىزدىكتى جويۋ تەتىكتەرىنىڭ تيىمدىلىگىن ارتتىرۋدى كوزدەيدى. «جاڭا تاسىلدەردىڭ ماقساتى ازاماتتاردىڭ جۇمىس ورىندارى جوق جەرلەرگە كوشۋىندە عانا ەمەس, ترانسفەرت ارقىلى جۇمىس ورىندارىن قۇرۋ جانە باسقا وبلىستاردا قولدانىستاعى بيزنەس-جوبالاردى سولتۇستىك وڭىرلەردە كەڭەيتۋ بولىپ تابىلادى. سوندىقتان «سولتۇستىك وڭىرلەر ءۇشىن 100 بيزنەس-جوبا» بيزنەس باستاماسىن قۇرۋ بويىنشا بارىنشا الەۋەتى بار ءتيىستى بيزنەس-يدەيالار كونكۋرسى ارقىلى قولداۋ ۇسىنىلادى», دەدى تامارا دۇيسەنوۆا بيزنەس وكىلدەرىمەن كەزدەسكەندە. بۇل حابارلارعا ءبىرشاما بيزنەسمەندەر ەلەڭدەپ, ناقتىلاۋ سۇراقتارىن بەرىپ جاتتى. تۇركىستان وبلىسىنان كەلگەن «امانگەلدى» جشس باسشىسى نۇرلان قۇرالوۆ جەرگىلىكتى بيلىكتىڭ قولداۋىمەن سولتۇستىك قازاقستاندا اۋىل شارۋاشىلىعى ونىمدەرىن قايتا وڭدەۋ ءوندىرىسىن اشۋعا دايىن ەكەنىن ءبىلدىردى. «ەگەر ءبىز سولتۇستىكتە بىرلەسكەن كاسىپورىن نەمەسە ءوز كاسىپورنىمىزدىڭ فيليالىن اشساق جانە بىزگە جەڭىلدەتىلگەن كرەديتتەر مەن بوس عيماراتتار بەرىلسە, وندا سولتۇستىكتە اۋىل شارۋاشىلىعى ونىمدەرىن وڭدەپ, ونى بۇكىل قازاقستانعا عانا ەمەس, رەسەيگە دە ساتۋعا بولادى دەپ سانايمىن. ەگەر جەڭىلدىكتى نەسيە ۇزاق مەرزىمگە بەرىلەتىن بولسا, وندا ءبىز وڭتۇستىكتەن 50-100 ادامدى الىپ كەلىپ, سولتۇستىكتە جۇمىس ورىندارىن اشۋعا دايىنبىز», دەدى ول.
سولتۇستىك قازاقستان وبلىسى
