رەسپۋبليكالىق فورۋم جاس مۇعالىمدەردىڭ بىلىكتىلىگىن ارتتىرۋعا ارنالعان NIS-ءتىڭ اۋقىمدى جوباسىن جالعاستىرىپ, ەلوردا, وسكەمەن, قاراعاندى, الماتى, پاۆلودار جانە قوستانايدا بىرقاتار كەيس-سەسسيا ۇيىمداستىردى.
– تەحنولوگيا مەن ەكونوميكانىڭ قارقىندى دامۋى ءبىلىم سالاسىنا قۋاتتى سەرپىن بەرەدى. بۇگىنگى تاڭدا مۇعالىمدەردىڭ زامان تالابىنا ساي بولۋى ماڭىزدى. مۇعالىم – سۇرانىسقا يە ماماندىق, سوندىقتان ونىڭ دامۋ تراەكتورياسى جەكە, بىراق ارقاشان الەمدىك ءبىلىم بەرۋ ۇردىسىنە ساي بولۋى كەرەك, – دەدى ۇيىمنىڭ باسقارما ءتورايىمى كۇلاش ءشامشيدينوۆا.
TEDTalk-تە ءوز كاسىبىندە تابىسقا جەتكەن ازاماتتار تاجىريبەلەرىمەن ءبولىستى. ماسەلەن, Bilim Media Group ەلەكتروندى ءبىلىم بەرۋ كومپانياسىنىڭ ديرەكتورى راۋان كەنجەحان ۇلى ءبىلىم بەرۋ جۇيەسىندە جۇمىس ىستەۋ – ومىرلىك تاڭداۋى, مۇعالىم – ءار ادام ءۇشىن اتا-انادان كەيىنگى تۇلعا, ال مەكتەپ – ەلدەگى ەڭ ماڭىزدى ينستيتۋت ەكەنىن جەتكىزدى. بەلگىلى تەلەراديو جۇرگىزۋشىسى, اكتريسا مايرا تولەپبەرگەن, تانىمال اكتەر اسقار ءىلياسوۆ وزدەرىنىڭ مۇعالىمدەر وتباسىندا وسكەنىن ماقتانىشپەن اڭگىمەلەسە, «اسسامبلەيا جاستارى» رەسپۋبليكالىق ۇيىمىنىڭ توراعاسى تيمۋر جۇمىرباەۆ جاس پەداگوگتەر قاۋىمداستىعى ولاردىڭ الەۋەتىن كەڭەيتۋگە كاسىبي الاڭ بولاتىنىن اتاپ ءوتتى. ويتكەنى ەلىمىزدە جاس پەداگوگتەرمەن تىكەلەي جۇمىس ىستەيتىن, وزىق تاجىريبەلەرمەن الماسۋعا كومەكتەسەتىن ۇيىم جوقتىڭ قاسى. جاس وقىتۋشىلار قاتارىنداعى ۇلىبريتانيالىق ارىپتەس, كەمبريدج ۋنيۆەرسيتەتىنىڭ ءبىلىم بەرۋ فاكۋلتەتىنىڭ وكىلى ەلەين ۋيلسون ءبىلىمدى ۇدايى جەتىلدىرۋدىڭ ماڭىزىنا توقتالدى.
فورۋم اياسىندا قاتىسۋشىلار وقۋ-اعارتۋ ءمينيسترى اسحات ايماعامبەتوۆپەن كەزدەستى. جاس ۇستازدار ەلەكتروندى ءبىلىم بەرۋ جۇيەلەرىندەگى اقپاراتتىق ينتەگراتسياعا, اۋىلداعى ينتەرنەت جىلدامدىعىنىڭ تومەندىگىنە, مەكتەپتەرگە ارنالعان سەرۆەرلەر مەن پلاتفورمالارداعى ماسەلەلەرگە ۆەدومستۆو باسشىسىنىڭ نازارىن اۋداردى.
جەكە شەبەرلىك ساباقتار وتكىزگەن جاس ماماندار ساباقتى ۇيىمداستىرۋ جانە جەكە كاسىبي دامۋدا وتە وزەكتى سانالاتىن تسيفرلى مۇعالىم, ساباق فورسايتى, پەداگوگيكالىق انگاجەمەنت, ديففەرەنتسيا جانە وقىتۋداعى لايفحاكتار سياقتى كرەاتيۆتى كەيستەرىمەن تاڭعالدىردى. ايتالىق, قوستاناي وبلىسىنان كەلگەن تاريح ءپانىنىڭ مۇعالىمى دامير سۇلتانوۆ ساباقتى جوسپارلاۋدا YouTube پەن Google-داعى ءبىلىم جەتكىلىكسىز بولعان سوڭ گيدتەردى دايىنداۋ جانە تسيفرلاندىرۋ بويىنشا ءتۇرلى كۋرسقا قاتىسۋ ارقىلى مەڭدىقارا اۋدانى بويىنشا اۆتورلىق تۋريستىك باعدارلامانى قۇراستىرعانىن اڭگىمەلەدى. ال رۋدنىي قالاسىنىڭ №1 ورتا مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى گۇلدانا بۇحارباەۆا پەداگوگيكالىق انگاجەمەنت شەبەرلىك ساباعىندا ءبىلىم ورداسىندا قۇرىلعان تەاتر جايىندا بايانداپ, كرەاتيۆتى تاسىلدەر قازاق تىلىندە سويلەۋ داعدىلارىن دامىتىپ, پانگە دەگەن قىزىعۋشىلىقتى ارتتىراتىنىن ايتتى. الماتىلىق ماتەماتيكا ءپانىنىڭ مۇعالىمى تەمىربەك ساعىندىقوۆتىڭ سوزىنە قاراعاندا, بۇگىنگى تاڭدا ءار مۇعالىمنىڭ تسيفرلى بولۋى قاجەتتىلىككە اينالدى. تik-توk-تا 14 مىڭ جازىلۋشىنى ەسەپتەردى تەز شەشۋگە ۇيرەتكەن جانە بالالاردىڭ ماتەماتيكاعا دەگەن قىزىعۋشىلىعىنا قولداۋ كورسەتىپ جۇرگەن تەمىربەكتىڭ ۇلگىسى جاس مۇعالىمدەردىڭ شابىتىنا قوزعاۋ سالعانى انىق. فورۋمعا قوستاناي وبلىسىنان كەلگەن بوتاگوز ماقاتوۆا بيولوگيا ساباعىنا تسيفرلى تەحنولوگيانى ەنگىزۋ ءۇشىن ساباقتى STEAM زەرتحاناسىندا وتكىزۋدى قولعا العانىن, وعان Mozaik Web باعدارلاماسىن تاڭداپ, ROQET ينتەراكتيۆتى پانەلىن قولدانعانىن جەتكىزدى. ال پاۆلودارلىق اسەت سەرىكباەۆ بىرنەشە جىل بۇرىن قولىنا اقش كونستيتۋتسياسى تۇسكەنىن, سول كەزدەن باستاپ مەملەكەتتىك قۇرىلىسقا قىزىعۋشىلىق تانىتا باستاعانىن, كەيىن قازاقستان كونستيتۋتسياسىنا قوسىمشا جاساۋدى ۇيعارعانىن اڭگىمەلەدى. بيىل ماۋسىم ايىندا اسەت قازىر سۇرانىسقا يە «PRO100 كونستيتۋتسيا» جوباسىنا پاتەنت الدى. قاراعاندىلىق ولەگ تيو مەن ەرجان اكيجانوۆ وقۋشىلاردىڭ ساباققا قىزىعۋشىلىعىن وياتۋ تاجىريبەلەرىمەن ءبولىستى. ەرجان جەكە ءبىلىم بەرۋ باعىتتارىن ازىرلەپ, قوسىمشالاردى ىلكىمدى پايدالانۋدى العا تارتتى. Wooclap اۋقىمدى اۋديتوريامەن جۇمىس ىستەۋ كەزىندە ءتيىمدى بولسا, Formative باعدارلاماسى قالىپتاستىرۋشى جانە جيىنتىق باعالاۋدى جۇرگىزۋگە كومەكتەسەدى. ولەگ «توڭكەرىلگەن سىنىپتىڭ» نەگىزگى قاعيدالارىن ءتۇسىندىرىپ, ساندىق ادىستەردىڭ, اتاپ ايتقاندا, ISpiring Learn, Anchor fm قوسىمشالارىنىڭ وقۋشىلارمەن ءساتتى ىنتىماقتاستىق قۇرۋداعى ماڭىزىن جەتكىزدى. وسكەمەندىك الەنا راحيموۆا توپتىق جۇمىستا وقۋشىنى باعالاۋ ءاردايىم قيىن ەكەنىن, وبەكتيۆتىلىك بالانىڭ وقۋعا دەگەن قىزىعۋشىلىعىن ساقتايتىنىن ەرەكشە اتاپ ءوتتى. شىعىس قازاقستان وبلىسى ۇلان اۋدانىنىڭ اعىلشىن ءتىلى ءپانىنىڭ مۇعالىمى ءادىل اناربەكوۆ باعالاۋ كەزىندە بالانىڭ پسيحولوگيالىق جاي-كۇيى شەشۋشى مانگە يە ەكەنىن, شاكىرت پەن ۇستاز اراسىنداعى التىن كوپىر – سەنىم, سۇيىسپەنشىلىك پەن ۇمىتتەن قۇرالاتىنىن ايتتى.
پەداگوگيكالىق شەبەرلىك ورتالىعىنىڭ ديرەكتورى جانبوتا قابدىقارىموۆا online.cpm.kz پلاتفورماسىندا جۇمىس ىستەيتىن «جاس مۇعالىم مەكتەبى» اشىق ونلاين كۋرسى ازىرلەنگەنىن, جاڭا رەسۋرس ءتۇرلى باعىتتاعى وقۋ ماتەريالدارىن بىرىكتىرگەنىن اتاپ ءوتتى. سونداي-اق ءار وڭىردە «جاسامپاز جاس ۇستاز» جاس مۇعالىمدەر كلۋبى قۇرىلدى, «شامشىراق» ونلاين پلاتفورماسى اۋىل مەكتەپتەرىنەن كەلگەن ۇزدىك جاس مۇعالىمدەردىڭ تاجىريبەسى تۋرالى بەينەماتەريالدار جاريالاۋدى باستادى.
جاھاندىق ءبىلىم بەرۋ كوميسسياسىنىڭ ازيا حاب كوميسسارى, «نازارباەۆ زياتكەرلىك مەكتەپتەرى» دببۇ باسقارما ءتورايىمى كۇلاش ءشامشيدينوۆا ءار دەلەگاتقا ءۇمىت ارتاتىنىن جانە وتاندىق ءبىلىمنىڭ باسەكەگە قابىلەتتى ءارى تابىستى بولاتىنىنا سەنىم ءبىلدىردى.
