بيىل ارميا ويىندارىنا وتاندىق ساربازدارمەن قاتار, ازەربايجان, ارمەنيا, بەلارۋس, ۆەنەسۋەلا, يران, ۆەتنام, زيمبابۆە, قىتاي, قىرعىزستان, مالي, رەسەي, تاجىكستان جانە وزبەكستان قارۋلى كۇشتەرىنىڭ وكىلدەرى قاتىسۋعا نيەت ءبىلدىرىپتى. سالتاناتتى اشىلۋ سالتاناتىندا زيمبابۆە ساربازدارىنىڭ ساحناعا شىعىپ, بيلەگەن ءساتى ەستە قالعان ەدى. ال ناعىز ايقاستا كىم ۇزدىك شىقتى ەكەن؟
«ارتيللەريالىق اتىس شەبەرلەرى», «تاكتيكالىق اتقىش», «مەريديان» كونكۋرستارى جامبىل, قاراعاندى, اقمولا وبلىستارىنداعى ءۇش وقۋ-جاتتىعۋ پوليگونىندا ءوتتى. ۇشەۋىندە دە جارىس قوجايىندارى – قازاقستاننىڭ اسكەري قىزمەتشىلەرى جەڭىسكە جەتتى.
«ارتيللەريالىق اتىس شەبەرلەرى» سايىسىندا رەسەيدىڭ اسكەري قىزمەتشىلەرى ەكىنشى ورىندى يەلەنسە, ءۇشىنشى ورىنعا ازەربايجاننىڭ ارتيللەريستەرى تۇراقتادى. «تاكتيكالىق اتقىش» سايىسىندا ەكىنشى ساتىعا قىتاي كومانداسى جايعاسسا, ءۇشىنشى ورىندى وزبەكستان مەن رەسەي قۇرامالارى ءوزارا ءبولىستى. «مەريديان» سايىسىندا قىتايلىقتار كۇمىسپەن كۇپتەلسە, وزبەكستان مەن بەلارۋس كوماندالارىنا ءۇشىنشى ورىن بۇيىردى.
جارىس جەڭىمپازدارى مەن جۇلدەگەرلەرى مەدالدارمەن جانە ديپلومدارمەن ماراپاتتالدى. سونىمەن قاتار ءار كونكۋرستا جەكە نوميناتسيالار بويىنشا جەڭىمپاز اتانعاندارعا دا ارنايى ماراپاتتار تابىستالدى. ماراپاتتاۋ شاراسىنا قورعانىس ءمينيسترىنىڭ ءبىرىنشى ورىنباسارى – قارۋلى كۇشتەرى باس شتابىنىڭ باسشىسى, گەنەرال-لەيتەنانت مارات قۇسايىنوۆ قاتىسىپ, جىل سايىنعى حالىقارالىق اسكەري-سپورتتىق جارىستاردىڭ اسكەري قىزمەتشىلەردىڭ جاۋىنگەرلىك دايارلىعى مەن شەبەرلىگىن جەتىلدىرۋدەگى ماڭىزى زور ەكەنىن اتاپ ءوتتى.
سوڭعى جىلدارى حالىقارالىق ارميا ويىندارىن وتكىزۋدە وزىندىك يگى ءداستۇر قالىپتاستى. ويىندار شەڭبەرىندە قاتىسۋشى ەلدەردىڭ اسكەري قىزمەتشىلەرى قارىم-قابىلەتىن شىڭداپ, تاجىريبە الماسۋ ارقىلى كاسىبي دەڭگەيىن ارتتىرا تۇسۋدە. جالپى, XXI عاسىر ارمياسىنىڭ نەگىزگى ماقساتى الەمنىڭ ءار تۇكپىرىندە بەيبىتشىلىكتى ساقتاۋ ەكەنى ءسوزسىز. ونىڭ ۇستىنە اسكەري ساراپشىلار حالىقارالىق ويىنداردى اسكەري ديپلوماتيانىڭ جاڭا بەلەسى دەپ سانايدى. ويتكەنى اسكەري-سپورتتىق الاڭداردا تانىسىپ, ءوزارا باسەكەگە تۇسەتىن قاتارداعى اسكەري قىزمەتشىلەردىڭ دوستىق قارىم-قاتىناسى ءاردايىم جوعارى باعالانىپ كەلەدى.
