الماتى قالالىق سوتىنىڭ قىلمىستىق ىستەر جونىندەگى القاسى كەنتاۋ قالاسىنىڭ بۇرىنعى اكىمى داۋرەن ماحاجانوۆتىڭ ادۆوكاتتارىنىڭ اپەللياتسيالىق شاعىمىن قارادى.
سۋديا فەدوتوۆانىڭ توراعالىق ەتۋىمەن القا اشىق سوت وتىرىسىندا ماحاجانوۆقا, تۇمەباەۆقا جانە بوبرىشەۆقا قاتىستى قىلمىستىق ءىستى قاراپ, ولاردىڭ ادۆوكاتتارىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ 13 شىلدەدەگى ۇكىمىنە شاعىمى نەگىزىندە كەلىپ تۇسكەن, قىلمىستىق ءىس جۇرگىزۋ كودەكسىنىڭ 431-بابىنىڭ 1-بولىگىنىڭ 1-تارماعىمەن سوتتالعاندارعا قاتىستى ۇكىم وزگەرىسسىز قالدىرىلدى. قورعاۋشىلاردىڭ اپەللياتسيالىق شاعىمى قاناعاتتاندىرىلعان جوق», دەپ حابارلادى سۋديا يرينا فەدوتوۆا.
ايتا كەتەيىك, پارا الۋ بويىنشا دەلدالدىق جاساعانى ءۇشىن كىنالى دەپ تانىلىپ سوتتالعاندار تۇمەباەۆا مەن بوبرىشەۆاعا قاتىستى ۇكىمنىڭ زاڭدى كۇشىنە ەنگەن بولىگى ناقتىلانىپ, قاماۋعا الىنىپ باس بوستاندىعىنان ايىرىلعانعا دەيىن قاماۋدا بولعان ۋاقىت ءبىر تاۋلىككە ەسەپتەلدى. سوتتىڭ قاۋلىسى زاڭدى كۇشىنە ەندى. ول ءبىر جىل ىشىندە كاسساتسيالىق ساتىدا قارالۋى مۇمكىن.
ەسكە سالايىق, 13 شىلدەدە كەنتاۋ قالاسىنىڭ بۇرىنعى اكىمى داۋرەن ماحاجانوۆقا قاتىستى سوت پروتسەسى اياقتالدى. وعان كەنتاۋ قالاسىنداعى ءمجا جول جوندەۋ سەرىكتەستىگىنىڭ ديرەكتورىنان 42 500 000 تەڭگە كولەمىندە پارا الدى دەپ ايىپ تاعىلدى. سوت ونى كىنالى دەپ تاۋىپ, 10 جىلعا باس بوستاندىعىنان ايىردى.
