قوعام • 19 تامىز، 2022

«AMANAT» شەنەۋنىكتەردى جاۋاپكەرشىلىككە تارتادى

107 رەت كورسەتىلدى

«AMANAT»-تىڭ پارتيالىق باقىلاۋ كوميتەتى جەرگىلىكتى جەردەگى شەنەۋنىكتەردى باعانىڭ وسۋىنە بايلانىستى جاۋاپكەرشىلىككە تارتۋدى تاپسىردى، دەپ حابارلايدى Egemen.kz.

بۇگىن «AMANAT»-تىڭ ورتالىق اپپاراتىندا پارتيالىق باقىلاۋ كوميتەتىنىڭ وتىرىسى ءوتتى. وتىرىس بارىسىندا پارتيالىقتار 216 قوعامدىق توپتىڭ الەۋمەتتىك ماڭىزى بار ازىق-ت ۇلىك باعالارىنا جۇرگىزىلگەن مونيتورينگ ناتيجەسىن قارادى.

29 شىلدە مەن 12 تامىز ارالىعىندا «AMANAT» پارتياسىنىڭ مونيتورينگ توپتارى ەلىمىزدىڭ بارلىق وڭىرلەرى مەن اۋداندارىنداعى 2522 نىساندا 1200-دەن استام رەيد جۇرگىزدى. سونىڭ ناتيجەسىندە 77 زاڭ بۇزۋ فاكتىسى انىقتالىپ، تۇيتكىلدى ماسەلەلەر ايقىندالدى.

الەۋمەتتىك ماڭىزى بار تاۋارلاردىڭ 19 ءتۇرى بويىنشا ۇكىمەت بەكىتكەن شەكتى باعانىڭ ورەسكەل ءوسىمى 10 وڭىردە: نۇر-سۇلتان جانە الماتى قالالارىندا، اقمولا، اقتوبە، اتىراۋ، شىعىس قازاقستان، باتىس قازاقستان، قاراعاندى، ماڭعىستاۋ جانە سولتۇستىك قازاقستان وبلىستارىندا بايقالىپ وتىر.

پارتيالىق باقىلاۋ كوميتەتىنىڭ توراعاسى، ماجىلىستەگى «AMANAT» فراكتسياسىنىڭ مۇشەسى ارتۋر پلاتونوۆ اتاپ وتكەندەي، وتكەن اپتادا ماكارون ونىمدەرىنىڭ، پياز جانە قىرىققابات باعاسىن كوتەرۋ ءۇردىسى ساقتالىپ وتىر. سونىمەن قاتار، كوپ ايماقتا ۇن، ءسابىز، قاراقۇمىق جارماسى مەن كارتوپ باعاسى قىمبات. نۇر-سۇلتان مەن الماتىدا تاۋىق جۇمىرتقاسىنىڭ باعاسى بەلگىلەنگەن مولشەردەن 30% جوعارى ساۋدالانۋدا.

«ماسەلەن، ماڭعىستاۋ وبلىسىندا ءۇش اپتا بويى قىرىققابات باعاسى شەكتى باعادان 100%، ءسابىز – 55-60%، كارتوپ – 30-36% قىمبات بولىپ وتىر. اقتاۋداعى ءىرى سۋپەرماركەتتەردىڭ سورەسىندە قانت جوق. بىراق قويمالاردا بار. كەيبىر ساۋدا ورىندارىندا سورەدەگى باعا مەن كاسساداعى باعانىڭ ايىرماشىلىعى انىقتالدى. ال دۇكەندەردىڭ بىرىندە قانت ساتىلاتىن ۋاقىت كەستەسى اشىق ءىلىنىپ تۇر. مۇنداي جاعداي حالىقتىڭ نارازىلىعىن تۋدىرادى»، دەدى ارتۋر پلاتونوۆ.

ءوز كەزەگىندە، ۇلتتىق ەكونوميكا ۆيتسە-ءمينيسترى ابزال ابدىكارىموۆ ۇكىمەت 2024 جىلعا دەيىن ينفلياتسيانى باقىلاۋ جانە تومەندەتۋ بويىنشا شارالار كەشەنىن ىسكە اسىرىپ جاتقانىن اتاپ ءوتتى. وسى ماقساتتا، ىشكى نارىقتاعى وتاندىق تاۋارلاردىڭ ۇلەسىن ارتتىرۋ بويىنشا جۇمىس جۇرگىزىلۋدە. تاۋارلاردى ساقتاۋ جانە تاسىمالداۋ، بولشەك ساۋدانى قولداۋ ماسەلەسى ەرەكشە باقىلاۋعا الىندى. شارالار كەشەنىندە بارلىعى 70-كە جۋىق ءىس-شارا بار.

ساۋدا جانە ينتەگراتسيا ۆيتسە-ءمينيسترى ەرلان باتتاقوۆتىڭ مالىمەتىنشە، «اينالىم سحەماسى» قۇرالىن ىسكە اسىرۋ جۇمىسى جالعاسىپ جاتىر. بۇگىندە جەرگىلىكتى بيۋدجەتتەن 86،4 ملرد. تەڭگە ءبولىندى. كاسىپكەرلەرگە قارىزعا 60،8 ملرد. تەڭگە باعىتتالدى. وسى قاراجاتقا شامامەن 220 مىڭ توننا الەۋمەتتىك ماڭىزى بار ازىق-ت ۇلىك تاۋارى اينالىمعا ەنگىزىلدى.

پارتيالىق باقىلاۋ كوميتەتىنىڭ توراعاسى انىقتالعان ماسەلەلەردىڭ ناقتى سەبەپتەرگە بايلانىستى ەكەنىن اتاپ ءوتتى. الايدا ورتالىق جانە جەرگىلىكتى مەملەكەتتىك ورگاندار تاراپىنان قاداعالاۋ مەن جەدەل ءىس-قيمىل جۇرگىزۋ جۇمىستارىنىڭ جەتكىلىكسىزدىگىن، سونداي-اق سىبايلاس جەمقورلىق تاۋەكەلدەرى ورىن العانىن جەتكىزدى.

وتىرىس قورىتىندىسى بويىنشا، پارتيالىق باقىلاۋ كوميتەتى وڭىرلىك فيليالدارعا جەرگىلىكتى جەرلەردەگى بىرقاتار مەملەكەتتىك قىزمەتشىلەردى جۇمىستاعى ولقىلىقتارى ءۇشىن پارتيالىق جاۋاپكەرشىلىككە تارتۋدى تاپسىردى.

سوڭعى جاڭالىقتار

COVID-19: ۆاكتسينا العانداردىڭ سانى ارتتى

كوروناۆيرۋس • بۇگىن، 09:58

ۇقساس جاڭالىقتار