سۇحبات • 18 تامىز، 2022

ەسكى جۇيەدەن ەستى جۇيەگە كوشۋ ماڭىزدى

755 رەت كورسەتىلدى

ورتا جولدا جوسپارىمىزدى وڭدەپ، جوندەپ، جاڭا قازاقستانعا اياق باستىق. ەندىگى جەردە ەل ەڭسەسى تىك، ءار قادام نىق بولۋعا ءتيىس. ءار سالادا سالماقتى جوبالار جۇزەگە اسىپ، جان-جاقتى جۇمىستار ءوز ناتيجەسىن بەرۋى كەرەك. جاسىراتىنى جوق، قاڭتار وقيعاسىنان كەيىن قۇقىق قورعاۋ سالاسىنداعى جاڭاشىلدىقتاردى كۇتىپ وتىرعاندار كوپ. ءتارتىپ ساقشىلارى ادىلەت جولىندا ەسكى جۇيەنى تارك ەتىپ، ەستى جۇيەنى قۇرۋعا اتسالىسقانى ابزال. وسى جانە سالاداعى وزگە دە وزەكتى ماسەلەلەرگە ءۇڭىلۋ ءۇشىن زاپاستاعى پوليتسيا گەنەرال-مايورى، پروفەسسور ميرلان قىزىلوۆپەن سۇحباتتاسقان ەدىك.

– ميرلان احمەديا ۇلى، ۇزاق جىلدار بويى قۇقىق قور­عاۋ سالاسىندا ءونىمدى ەڭ­بەك ەت­تىڭىز. ءالى كۇنگە دەيىن ءىزىڭىزدى باسقان جاستارعا بار بىل­­گەنىڭىزدى ۇيرەتىپ، باعىت-باع­­دار كورسەتىپ كەلە­سىز. قاي كەزەڭ­­دى الىپ قا­را­ساق تا قۇقىق قورعاۋ­شى­نىڭ كەلبەتى كوز الدى­ڭىز­دا...

– تاعدىر تاڭداۋى ىشكى ىستەر ورگاندارىنىڭ ورتاسىنا تاستاسا، جاۋاپكەرشىلىگى مول جۇكتى ارقالاعانىڭىز. بۇل – ەرلىك پەن باتىرلىقتى، توزىمدىلىك پەن پارا­سات­تىلىقتى، ويدىڭ ۇش­قىر­لى­عىن، دەنەنىڭ مىعىم بولۋىن تالاپ ەتەتىن ماڭىزدى قىزمەت. ءتارتىپ ساقشىسى ءار تۇر­عىن­نىڭ ءوتىنىشىن جەرگە قال­دىر­ماي، شول­دە­گەنگە سۋ ۇسىنىپ، بارىنشا ادى­لەت­تى بولۋعا تىرىسىپ، حالىققا پاي­دالى قىزمەت ەتۋگە ءتيىس.

ىشكى ىستەر ورگاندارى قىزمەت­كەر­لەرىنىڭ ءار ءىس-ارەكەتى زاڭمەن ولشەنەتىنى ءسوزسىز. ءتارتىپ ساق­شى­لارىنا حالىق تاراپىنان قويىلاتىن تالاپ تا وتە جو­عا­رى. بيلىك پەن زاڭ وكىلى – پو­ليتسيا قىزمەتكەرى كاسىبي قىزمە­تى­ندە نەمقۇرايدىلىققا، ۇقىپ­سىز­دىققا، بىلىمسىزدىككە بوي الدىر­ماۋعا ءتيىس. ادامگەرشىلىك تۇر­عى­دان ونىڭ قاتەلىكتەرگە جول بەرۋگە حاقىسى جوق. پوليتسيا قىز­مەتكەرىنىڭ مىنەز-قۇلقى ادام­گەر­شىلىكتىڭ تالابىنا ساي بولۋى شارت. ويتكەنى ول – قازاقستان رەس­پۋب­ليكاسىنىڭ حالقىنا قۇقىقتىق قىزمەت كورسەتۋشى تۇلعا. ولاي ەتپەيىنشە، پوليتسەيدىڭ قوعامداعى سالماعى كەمىپ، بەدەلى مەن ابىرويىنا نۇقسان كەلەرى حاق.

پوليتسيانىڭ ادامگەرشىلىك بەينەسى ورنىقتى، رۋحى مىقتى بولماسا، قوعامعا قاۋىپ توندىرەتىن زياندى ارەكەتتەرگە قارسى قاۋ­قار كورسەتە المايدى. قازىرگى ۋا­قىت­تا پوليتسيانىڭ تولىققاندى تۇلعاسىنىڭ ءۇش تۇعىرلى نەگىزى بار. بىرىنشىدەن، تالاپكەر پوليتسيا ماماندىعىنا جۇرەك قالاۋىمەن كەلۋى كەرەك. سوندا ول ىشكى ىستەر قىزمەتكەرلەرىنە قويىلاتىن تا­لاپ­تىڭ بارلىعىن قابىلدايدى. ولاردى كاسىبي دەڭگەيدە دا­يىنداۋدى ەكىنشى تۇعىر دەر ەدىك. ءۇشىنشىسى – جاڭا بۋىندى ىشكى ىستەر ورگاندارىنداعى الدىڭعى تولقىننىڭ ۇزدىك تاجىريبەسى مەن قالىپتاسقان داستۇرلەرىنە بوي ۇسىندىرۋ ارقىلى تاربيەلەۋ.

– جاڭا بۋىن دەپ قالدىڭىز. «جاڭا قازاقستاننىڭ» ءتارتىپ ساق­شىلارى قانداي بولۋعا ءتيىس؟ بۇعان دەيىن قاي جەردە وسال­دىق تانىتتىق، ەندىگى جەردە قان­داي جايتقا باسىمدىق بەرىلۋى كەرەك؟

– ەلىمىزدە قولعا الىنعان پوليتسيا رەفورماسىنىڭ نەگىزگى ماق­ساتى – ازاماتتار قۇقىعىن، قوعام جانە مەملەكەت مۇددەسىن شى­نايى قۇقىقتىق تۇرعىدان قور­عاۋعا باعىتتالعان جاڭا پوليتسيا كەلبەتىن قالىپتاستىرۋ. مەم­لە­كەت باسشىسى قاسىم-جومارت توقاەۆتىڭ «جۇرتقا جاقىن پوليتسيا» قاعيداتىنىڭ جۇيەلى ىسكە اسۋىنا باسا ءمان بەرۋى تەگىن ەمەس. حالىقپەن اشىق ديالوگ ورناتۋ ارقىلى باياندى بايلانىس قالىپتاسپاق. ەل پرەزيدەنتىنىڭ: «پوليتسيادا دورەكىلىك پەن بىلىك­سىز­دىككە جول بەرىلمەۋى كەرەك. مۇندا جوعارى دايىندىقپەن كەلگەن جانە ءوز ىسىنە شىنايى بەرىلگەن ما­ماندار جۇمىس ىستەۋى قاجەت. ءتار­تىپ ساقشىلارى ازاماتتارعا ۇلگى بولۋعا ءتيىس» دەپ ايتقانى بار. تۇپتەپ كەلگەندە، بۇل باعىتتاعى شارالار قوعامداعى قىلمىستىڭ، وتباسىنداعى ۇرىستىڭ ازايۋىنا جول اشاتىنى انىق.

ء«بىر قۇمالاق، ءبىر قارىن مايدى شىرىتەدى» دەمەكشى، كەيدە انتىنا ادالدىق تانىتپاي، اشكوزدىلىككە سالىنىپ، ابايشا ايتقاندا اردى ويلاماي، پايدا ويلاعان قىزمەت­كەرلەردىڭ جاعىمسىز ارەكەت­تە­رى­نەن كەيىن پوليتسيا مارتە­بە­سىنە كۇيە جاعىلىپ جاتاتىنى جا­سىرىن ەمەس. تالايى تەمىر تورعا تو­عى­تىلعانىمەن زاڭ بۇزۋ­شى­لىق­قا جول بەرەتىن قىزمەت­كەرلەر قا­تا­رى تىيىلماي تۇر.

پوليتسەيلەردىڭ انتىنا بەرىك­تىگى مەن كاسىبي بىلىكتىلىگى ارقا­سىن­دا قوعامدا تۇراقتىلىق قالىپ­تا­سىپ، ادامداردىڭ ىشكى ىستەر و­ر­گاندارىنا سەنىمى ارتاتىنى ءسوزسىز. «جاڭا قازاقستاننىڭ» پو­لي­تسەيلەرى اركىمنىڭ ماسەلەسىنە ىستىق ىقىلاسپەن جاۋاپ بەرىپ، ەڭ باستىسى ساۋاتتى ءارى كاسىبي قىز­مەت كورسەتۋ ارقىلى عانا جۇرت­شىلىقتىڭ سەنىمىنە يە بولا الا­تىنىن ەستەن شىعارماعان ءجون.

توق ەتەرى سول، قوعامنىڭ ىشكى ىستەر ورگاندارى قىزمەتكەرلەرىنە دەگەن تولىق سەنىمى اسا ماڭىزدى، سول ماقساتقا پوليتسەيلەر ارقا­شان ۇمتىلۋعا ءتيىس. ەل تۇرعىن­دا­رى ادام مەن ازاماتتىڭ كونس­تي­­تۋتسيالىق قۇقىقتارى مەن بوس­تان­دىقتارىنا قول سۇعىلماي­تىن­دىعىنا، قۇقىقتىق مەملەكەتتە، مادەنيەتتى جانە اشىق قوعامدا، ەركىن جانە قاۋىپسىز ەلدە ءومىر ءسۇرىپ، جۇمىس ىستەيتىنىنە سەنىمدى بولۋى كەرەك.

– ميرلان احمەديا ۇلى، كوپ­شىلىك ءسىزدى ادىلەت ىزدەپ، «تاتيا­نا­نىڭ تاعدىرى» ارقى­لى جەتىم كۋرسانتتاردىڭ ماسە­لەسىن شەشۋگە بەلسەندى اتسا­لىسقان ازامات رەتىندە تاني­دى. اتالعان پروب­لەما «ەگەمەن قازاقستان» گازە­تىندە بىر­نەشە رەت جاريالانىپ، ماقا­لاعا پرەزيدەنت قاسىم-جومارت توقاەۆ نازار اۋدا­رىپ، قۇزىر­لى ورگاندارعا تاپسىرما بەرگەن ەدى. بۇل ءىستىڭ اياعى نە بولدى؟

– بۇل پروبلەمانى ەستىگەن دە، ەستىمەگەندەر دە بار. وقىرمانعا تۇسىنىكتى بولۋ ءۇشىن ماسەلەگە قىس­قا­شا شولۋ جاساعان دۇرىس شىعار. 2021 جىلدىڭ 11 ناۋرىزىندا «ەگەمەن قازاقستان» گازەتىندە «جەتىم كۋرسانتتىڭ جازىعى نە؟» اتتى ماقالام جارىق كوردى. وندا سول ۋاقىتتا رف ءىىم كراسنودار اكادەمياسىنىڭ كۋرسانتى، قر ازاماتى، قاتارداعى پوليتسيا قىزمەتكەرى ت.ۆودولازكينانىڭ ءوز ەلىمىزدىڭ كونستيتۋتسيامەن كەپىلدەندىرىلگەن الەۋمەتتىك كو­مەك­كە 2017 جىلدان بەرى قول جەت­كى­زە الماي جۇرگەنى جازىلعان بولاتىن. جالعىز تاتيانا عانا ەمەس، ەلىمىزدەگى اسكەري جانە ارناۋلى وقۋ ورىندارىندا ءبىلىم الىپ جۇرگەن جەتىم جانە اتا-انا­سى­نىڭ قامقورلىعىنسىز وسكەن كۋر­سانتتار جەتىپ ارتىلادى. ولار دا تاتيانا سەكىلدى مەملەكەتتىڭ بۇل قامقورلىعىنان تىس قالعانى بايان­دالدى.

وكىنىشكە قاراي، 2014-2019 جىلدار ارالىعىندا قر ءىىم ش.قابىلباەۆ اتىنداعى قوستاناي اكادەمياسىنىڭ باستىعى لاۋازىمىن اتقارعان ۋاقىتتا اتالعان ماسەلەنى وڭ شەشۋگە ۇلگەرمەدىم. «جەتىمنىڭ اقىسىن جەمەڭىز» دەگەن دانا بابامىزدىڭ اسىل ءسو­زىن باسشىلىققا الىپ، ءىستى ايا­عىنا دەيىن جەتكىزۋگە بەل بۋدىم. بۇل ىسكە قاتىسى بار قۇ­زىر­لى ورگاندارعا سۇراۋ حات جولداپ، ماسەلەنىڭ اق-قاراسىن اجى­راتۋعا تىرىستىم. اتاپ ايتساق، 2017 جىلعى «قازاقستان رەسپۋبليكاسى ىشكى ىستەر ورگاندارى قىزمەتكەرلەرىنە اقشالاي ري­زىق­تى، جاردەماقىلاردى جانە وزگە دە تولەماقىلاردى تولەۋ قاعيدالارىن بەكىتۋ تۋرالى» ءىىم 2014 جىلدىڭ 14 قارا­شا­سىنداعى №808 بۇيرىعىنا وزگەرىس ەنگىزۋدى ۇسىندىم. رەسمي حاتقا كەلگەن سىرعىتپا جاۋاپتار قوعامداعى ادىلەتسىزدىككە جانى اۋىراتىن شەنەۋنىكتەردىڭ قاراسى كورىنبەيتىنىن دالەلدەگەندەي ەدى. «قولدانىستاعى زاڭناماعا وزگەرىستەر مەن تولىقتىرۋلار ەن­گىزۋ ورىنسىز» دەگەن سىڭايداعى جاۋاپتار بەرىلدى. حاتتا الەۋمەت­تىك كومەكتىڭ ءتۇر-مولشەرى جونىندە ەمەس، ەلىمىزدىڭ زاڭى مەن ۇكىمەت قاۋلىسى بەلگىلەگەن سول كومەكتەن كۋرسانتتاردىڭ قۇر قول قالىپ قويعانى تۋرالى ايتىلىپ ەدى عوي؟

ابىروي بولعاندا، «ەگەمەن قازاقستان» گازەتىندە جاريا­لانعان «جەتىم كۋرسانتتىڭ جا­زى­عى نە؟» اتتى ماقالاعا ەل پرەزيدەنتى قاسىم-جومارت توقاەۆتىڭ نازارى ءتۇسىپ، بىلتىر 15 ناۋرىزدا «وزەكتى ماسەلە، جۇيەلى تۇردە شەشۋ كەرەك» دەپ شەكەسىنە نۇسقاۋ جازىلىپ، بىرقاتار مەملەكەتتىك ورگان باسشىسىنا تاپسىرما بەرىلگەن ەدى. وسىلايشا، پرەزيدەنت نۇسقاۋى تۇرتكى بولىپ، بيىل 31 ناۋرىزدا «الەۋمەتتىك كومەك كورسەتىلەتىن ازاماتتارعا الەۋمەتتىك كومەكتىڭ مولشەرىن، كوزدەرىن، تۇرلەرىن جانە ونى بەرۋ قاعيدالارىن بەكىتۋ تۋرالى» قازاقستان رەس­پۋب­­ليكاسى ۇكىمەتىنىڭ 2012 جىلعى 12 ناۋرىزداعى №320 قاۋ­لى­سى­نا وزگەرىستەر ەنگىزۋ تۋرالى ۇكىمەتتىڭ №182 قاۋلىسى شىقتى.

پرەزيدەنتتىڭ مەملەكەتتىك ورگاندارعا بەرگەن تاپسىرماسى 1 جىل وتكەننەن كەيىن عانا ىسكە استى. جەتىم كۋرسانتتار بۇل جاڭالىقتى زور قۋانىشپەن قابىلدادى. بىراق ت.ۆودولازكينا الەۋمەتتىك كومەككە تولىعىمەن (بەس جىلدىق ۇلەسى 2 ملن 370 مىڭ 858 تەڭگە) قول جەتكىزسە، قالعان كۋرسانتتارعا ءبىر جىلدىق تولەم (450 مىڭ تەڭگە) عانا ۇلەستىرىلدى. ياعني تولىق تولەنبەدى. قر ۇكىمەتىنىڭ 2022 جىلعى 31 ناۋرىزداعى №182 قاۋلىسىنىڭ 2-تارماعىنداعى «العاشقى رەسمي جاريالانعان كۇننەن باستاپ كۇنتىزبەلىك ون كۇن وتكەن سوڭ قولدانىسقا ەن­گى­زىلەدى جانە 2017 جىلعى 1 قىر­كۇيەك­تەن باستاپ تۋىنداعان قاتى­ناس­تارعا قولدانىلادى» دەگەن يمپەراتيۆتىك نورمانى قر ءىىم وقۋ ورىندارى ەلەمەي، تولىققاندى جۇزەگە اسىرۋعا ق ۇلىقسىزدىق تانىتىپ وتىر. سوندا تاعى دا پرەزيدەنت تاپسىرما بەرۋ كەرەك پە؟! ماسەلە «باياعى جارتاس – ءبىر جارتاس» كۇيىندە قالىپ، اۋرە-سارساڭ اۋەنى اياقتالا ما ەكەن...

مەملەكەتتىك قىزمەت­شى­لەر­دىڭ ادەپ كودەكسىن­دەگى 5 تار­ما­عىن­داعى 6-تارماق­شا­سىنداعى «حالىقتىڭ سۇرانىس­تا­رى­نا تو­لىقتاي باعدارلاي وتىرىپ، جول­دانىمداردى قاراۋ كەزiندە تورە­شiل­دiك كورiنiستەرiنە جانە اۋرە-سارساڭعا سالۋعا جول بەرمەۋ جو­نىن­دە شارالار قابىلداۋ» كەرەك دەگەن قاعيدا تاعى دا بۇزىلعانى وكىنىشتى-اق...

– پرەزيدەنت تاپسىرما بەرمەسە، جەتىم كۋرسانتتاردىڭ ماسەلەسى جابۋلى قازان كۇيىندە قالۋى دا مۇمكىن ەدى عوي...

– ءيا، سۇراعىڭىز ورىندى. قاۋلىنىڭ 2012 جىلى قابىل­دان­عانىن ەسكەرسەك، ءتيىستى تولەم ون جىل وتكەننەن كەيىن عانا ۇلەستىرىلدى. پرەزيدەنت تاپسىرما بەرمەسە، تاعى قانشا جىل سوزىلاتىنىن كىم ءبىلسىن؟ سونىڭ وزىندە تولەم ءالى تولىق بەرىلمەدى.

ەلىمىزدە بۇدان باسقا دا قوردا­لان­عان الەۋمەتتىك ماسەلەلەر جە­تەرلىك. شىندىقتى ايتقان ادام اركەزدە ايىپتى بولاتىنى ءسوز­سىز. مەنىڭ دە سىندى كوتەرىپ، شىن ايتقانىم كوپكە جاقپاعانى بەلگىلى.

ەل پرەزيدەنتى ق.توقاەۆ 2020 جىلعى 1 قىركۇيەكتەگى قازاقستان حال­قىنا «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا: «...ادىلدىكتەن اينىماعان ءجون. ادىلدىك – قوعام دامۋىنىڭ ماڭىزدى شارتى. ادىلەتتىلىك – اسىرەسە، ەل-جۇرتتىڭ تاعدىرىن شەشۋ ءۇشىن اسا قاجەت قاسيەت» دەپ باسا ايتقانىن مەم­لە­­كەتتىك ورگانداردىڭ وكىل­دەرى ءالى دە تۇسىنە قويماعان سەكىلدى. جەتىم بالالار مەن اتا-اناسى­نىڭ قامقورلىعىنسىز قالعان كۋرسانتتارىمىزدىڭ كونستي­تۋ­تسيالىق قۇقىقتارىنا قول جەت­كىزۋىنە الەۋمەتتىك بەلسەندىلىك پەن ازاماتتىق جاۋاپكەرشىلىك تانىتىپ، وسى ماسەلەنىڭ شەشىلۋىنە زور ۇلەس قوسقان ازاماتتارعا ريزامىن.

– گەنەرال-لەيتەنانت شىراقبەك قابىلباەۆتىڭ ونە­گەلى ءومىرىن ناسيحاتتاۋ ماقسا­تىندا اتقارعان ەڭبەگىڭىز دە مول. بۇل – جاستاردى پاتريوتتىق تۇر­عىدا تاربيەلەۋدىڭ تەتىگى عوي...

– 1954-1959 جانە 1967-1974 جىلدار اراسىندا قازاق كسر-ءنىڭ ىشكى ىستەر ءمينيسترى بولعان، ىشكى ىستەر گەنەرال-لەيتەنانتى اتاعىن تۇڭعىش العان قازاق، 2014 جىلى قوستاناي اكادەميا­سىنا ەسىمى بەرىلگەن شىراقبەك قابىلباەۆتىڭ ءومىرى مەن قىزمەتى تۇتاسىمەن بۇگىنگى جاس پوليتسەيلەرگە ۇلكەن مەكتەپ دەر ەدىم. مينيسترلىككە سوعىستان كەيىنگى قيىن جىلدارى كەلگەن ول ىشكى ىستەر سالاسىنىڭ بارلىق پروبلەمالارىن بەس ساۋساقتاي ءبىلىپ، جۇيەلى رەفورما جاساعان، 30-شى جىلداردان كەيىن قۇلدىراپ كەتكەن ميليتسيا بەدەلىن قايتا كوتەرگەن ازامات ەدى. ول تەك ىسكەر ۇيىمداستىرۋشى، بىلىكتى باسشى عانا ەمەس، حالقىنىڭ ءانى مەن كۇيىن، مادەنيەتى مەن ادەبيەتىن، سالتى مەن ءداستۇرىن جەتىك بىلگەن كوكىرەگى التىن ادام بولاتىن. ونىڭ قا­زاق جانە دۇنيە ءجۇزى ادەبيەتى كلاسسيكتەرىنىڭ شىعارمالارىنان تۇراتىن باي كىتاپحاناسى قوستا­ناي قالاسىنداعى اكادەميادا ساقتاۋلى.

2015 جىلدىڭ 6 ناۋرىزىندا شىراقبەك اعامىزدىڭ كەلىنى مارقۇم راۋشان قاليقىزى قوي­شىباەۆا كەزىندە ءوزى جيناعان قىزىقتى دا تانىمدىق جەكە كىتاپ­حاناسىن قوستاناي اكادەمياسىنا سىيعا تارتتى. شىراقبەك قابىلباەۆتىڭ جەكە كىتاپحاناسى 332 ادەبي باسىلىمنان جانە 460 دانا كىتاپتان تۇرادى. بۇل ونىڭ جان-جاقتى ءبىلىمدى، «سەگىز قىرلى ءبىر سىرلى» جان بولعانىن كورسەتەدى. مىنەزى قۇقىق قورعاۋ ورگاندارىنىڭ قىزمەتكەرلەرىنە ءتان قىزمەتكە قاتال، تارتىپكە مىقتى جان بولىپ كورىنگەنىمەن، جانى جايساڭ ازامات ەدى. ول كوپتەگەن وتاندىق پوەزيا جانە پروزا جارىق جۇلدىزدارىمەن جەكە تانىس بولىپ ارالاستى، ولاردىڭ ادەبي ويلارى مەن قول­جازبالارىن قوسا تالقىلادى.

عابيت مۇسىرەپوۆ شىراقبەك قابىلباەۆتىڭ ادەبيەتكە دەگەن ەرەكشە ىقىلاسىن جوعارى باعالاپ: «مەن ەڭبەك جولىمدى ميليتسيونەر بولىپ باستاپ، جازۋشى بولدىم. ال ءسىز، رۋحىڭىزبەن جازۋشىسىز، بىراق ميليتسيونەر بولدىڭىز»، دەپ ايتقان ءسوزى كوپ نارسەنى اڭعارتقانداي.

قازىرگى جانە بولاشاق پوليتسيا قىزمەتكەرلەرىنە داڭقتى گەنەرالدىڭ ومىرباياندىق دەرەك­تەرى، ۇلت ءۇشىن اتقارعان ىستەرى مەن ەرەن ەڭبەگى ۇلكەن مەكتەپ. ونىڭ ءومىر قيىنشىلىقتارىنا مويىماي، ادامگەرشىلىكتىڭ بيى­گىن­دە بولعانىن كورسەتە وتىرىپ، عيبراتتى عۇمىرى بولاشاق ۇرپاقتى پاتريوتتىق رۋحتا ازامات ەتىپ تاربيەلەۋگە وڭ اسەرىن تيگىزەدى دەگەن ماقساتپەن فوتودەرەكتى البوم جيناقتى دا قۇراستىرىپ قويدىم. ءساتى تۇسسە، جارىق كورەر كۇنى الىس ەمەس.

– قۇقىق قورعاۋ سالاسى اردا­گەرلەرىنىڭ عيبراتتى عۇ­مىرى ارقىلى پوليتسيا قىز­مەتكەرلەرىنىڭ ءيميدجىن قالىپتاستىرۋعا جول اشىلاتىنى تۇسىنىكتى. بۇل رەتتە، بىلىكتى كادر دايارلاۋ ماسەلەسىن اينالىپ ءوتۋ مۇمكىن ەمەس...

– پوليتسيا قىزمەتكەرىنىڭ ءيميدجىن قالىپتاستىرۋ، ەڭ الدىمەن مادەني-قۇقىقتىق تۇرعىدان بى­لىكتى كاسىبي دايىنداۋعا، تۇل­عانىڭ ادامگەرشىلىك-مورال­دىق قاسيەتتەرىن دامىتۋعا نەگىزدەلۋى كەرەك. بۇل باعىتتاعى جۇمىستار Iشكi iستەر مينيسترلiگi جۇيەسiنiڭ ارناۋلى وقۋ ورىندارىندا وقىتۋ پروتسەسiندە جۇيەلى قولعا الىنۋعا تيiس. 3-6 اي ىشىندە كاسىبي مامان شىعارامىز دەۋ بوس اۋرەشىلىك. ونداي شالا شارۋانىڭ ناتيجەسىن كوردىك تە، ەستىپ تە ءجۇرمىز. مەن بۇل ماسەلەنى بيىل ماۋسىم
ايىندا Qazaqstan ۇلتتىق تەلەارناسى ۇيىمداستىرعان «جەدەل جەلى» باعدارلاماسىنىڭ تىكەلەي كور­سەتىلىمىندە ىشكى ىستەر ءمي­نيسترى مارات احمەتجانوۆقا ساۋال رەتىندە جولداعان ەدىم. ول: «ايتىلعان ماسەلە ورىندى. بۇگىندە قىزمەتتەن كەتىپ جات­قان­دار­دىڭ 90 پايىزى ازاماتتىق وقۋ ورىندارىن تامامداعاندار. بۇل رەتتە، بىزگە ارناۋلى وقۋ ورىندارىندا شىڭدالعان ماماندار قاجەت. ياعني تەك ءبىلىم ساپاسى عانا ەمەس، دەنساۋلىعى مىعىم، جۇيكە جۇيەسى مىقتى كادرلاردىڭ قاتارعا قوسىلۋى ماڭىزدى. بۇل ماسەلەنى القا ماجىلىسىندە قاراس­تى­رىپ، ۇكىمەتكە ءتيىستى ساۋال جولداي­مىز»، دەگەن ەدى. ەندەشە، الداعى ۋاقىتتا شىن مىقتىلار شىڭدالىپ، قاتارعا ءبىلىمدى دە بىلىكتى كادرلار قوسىلادى دەگەن سەنىم مول.

قايعىلى قاڭتار وقيعاسىنان كەيىن قۇقىق قورعاۋ ورگانى قىز­مەتكەرى ءيميدجىنىڭ: شەكسىز بيلىككە يە كۇشتى بەينەدەن سانالى زاڭ قورعاۋشىسى، ءادىل، ءوز مامان­دىعىنىڭ زيالىسى بەينە­سىنە وزگەرۋىن تالاپ ەتتى. ىشكى ىستەر ورگانى قىزمەتكەرىنىڭ زاما­ناۋي كەلبەتى ەڭ الدىمەن جو­عارى كاسىبيلىكپەن، بەلگىلى ءبىر مادەني دەڭگەيدىڭ بولۋىمەن، كاسىبي باسقارۋشىلىق دايىندىعىمەن، زەردەلىلىگىمەن، دامىعان مورالدىق-ەتيكالىق جەكە قاسيەتتەرىمەن بايلانىستى بولۋعا ءتيىس.

مەن وسى سالاعا جوعارى ءبىلىم­دى كاسىبي مامان دايارلايتىن ساناۋلى ءبىلىم ورداسىنىڭ ءبىرى ءىىم ش.قابىلباەۆ اتىنداعى اكادەمياسىن باسقارعان جىلدارى (2014-2019 جج) قىزمەتىمدى ساپالى اتقارۋعا بار كۇش-جىگە­رىمدى جۇمسادىم. بۇل وقۋ ورنىنداعى ىستەگەن قىزمەتىم مەن يگى ىستەرىم جوسپار بويىنشا اتقا­رىلاتىن كۇندەلىكتى قارەكەت ەمەس، بۇگىنگى پوليتسەيدىڭ تۇلعاسىن قالىپتاستىرۋعا قوسىلعان ۇلەس دەپ ايتسام ارتىقتىعى جوق شىعار. مەن وقۋ-تاربيە ىسىندە «الدىمەن – ادام، سوسىن – مامان» دەگەن ۇستانىمدى العا تارتتىم. بۇل پوليتسەيدىڭ الدىمەن ادامگەرشىلىك تۇلعاسىن قالىپتاستىرىپ، سونىڭ نەگىزىندە ونىڭ بويىندا ەلگە، جەرگە، مەملەكەتكە دەگەن پاتريوتتىق سەزىمدى تاربيەلەۋگە تالپىنىستى كوزدەگەن وي بولاتىن...

– اڭگىمەڭىزگە راحمەت.

 

اڭگىمەلەسكەن

ورالحان احماديا،

«Egemen Qazaqstan»

سوڭعى جاڭالىقتار

ەلوردادا Astana Marathon-2022 وتەدى

ەلوردا • بۇگىن، 12:16

سوماليدە جارىلىس بولدى

الەم • بۇگىن، 10:25

بۇگىنگى ۆاليۋتا باعامى

قارجى • بۇگىن، 10:13

ەكىنشى ورىنعا تابان تىرەدى

سپورت • بۇگىن، 07:32

وۆەرتايمدا جەڭدى

حوككەي • بۇگىن، 07:30

ۇقساس جاڭالىقتار