بەلگىلى سۋرەتشى اماندوس اقاناەۆتىڭ ءوز ءستيلى بار. ول شىعارمالارىندا كوشپەندىلەر مادەنيەتى مەن ەلىمىزدىڭ باي وركەنيەتىن ەرەكشە ەتىپ كورسەتەدى. ونىڭ كارتينالارى قازاق تاريحىن جاڭعىرتۋدا. ماسەلەن, «ساۋكەلە» كارتيناسىندا قالىڭدىقتىڭ تويعا ارنالعان باس كيىمىن كيگەن ءساتىن بەينەلەگەن. XIX عاسىردىڭ العاشقى جارتىسىندا كىشى ءجۇزدىڭ بايساقال اتتى بايى مەن ورتا ءجۇزدىڭ ساپاق بايى قۇدا بولىپتى. بايساقال قۇدالارىنا قىزدىڭ ساۋكەلەسىن جىبەرىپ: «باسقا ەشتەڭە سۇرامايمىن, تەك وسى ءبىر ساۋكەلەنىڭ باعاسىن وزدەرى ەسەپتەپ بەرسە بولدى», دەپتى. سوندا كەنەسارىنىڭ اعاسى سارجان تورە: «بۇل ساۋكەلەنىڭ باعاسى بەس ءجۇز بايتال بولادى ەكەن, سوندىقتان قىزىنىڭ مالى بەس ءجۇز جىلقى بولسىن» دەپ كەسكەن ەكەن. بۇل دەرەك عالىم, ەتنوگراف ءماشھۇر ءجۇسىپ كوپەي ۇلى ەڭبەگىندە جازىلعان.
باقساڭىز, سۋرەتشى باس كيىمگە باسىمدىق بەرەدى. ساۋكەلە قىز بالانىڭ بۇرىنعى قامسىز ومىردەن كەيىنگى وتباسىلىق جاڭا ءومىردى باستاۋىنىڭ سيمۆولى سانالادى. ساۋكەلە شاشاقتارمەن جانە ءارتۇرلى ۇساق التىن جانە كۇمىس تيىندارمەن كومكەرىلگەن. ودان بولەك اقىق, پەرۋزا جانە امەتيست سىندى اسىل جانە جارتىلاي اسىل تاستارمەن تۇرلەنىپ, كورەرمەننىڭ كوركىن وزىنە تارتادى. وتە باي ادەپتەلگەن ساۋكەلەدەن قالىڭدىقتىڭ ءجۇزى كورىنبەيدى.
تۋىندىدا قالىڭدىق مەرەكەلىك بەزەندىرىلگەن كيىز ۇيدە وتىر. الۋان ءتۇستى وسىمدىك ستيلىندەگى ورنەكتەر گەومەتريالىق ورنەكتەرمەن ارالاسا وتىرىپ, كەنەپ بەتىن تولتىرادى دا, كارتيناعا مەرەكەلىك كوڭىل كۇي سىيلايدى. سۋرەتتىڭ جوعارعى جاعىنداعى شاڭىراقتان كوگىلدىر ءتۇستى تازا اسپان كورىنەدى. ول كورەرمەننىڭ نازارىن اشەكەيلى ساۋكەلەدەن جوعارى جىلجىتىپ, باس كيىمنىڭ ۇشىنداعى ۇكىگە اۋدارتادى.
