ۇلتتىق اكادەميالىق كىتاپحانادا قازاقستان رەسپۋبليكاسىنىڭ ەڭبەك سىڭىرگەن عىلىم قايراتكەرى, حالىقارالىق جوعارى مەكتەپتەر عىلىم اكادەمياسىنىڭ قۇرمەتتى اكادەميگى, قازاقستان جازۋشىلار وداعىنىڭ ساكەن سەيفۋللين اتىنداعى سىيلىعىنىڭ لاۋرەاتى, «پاراسات» وردەنىنىڭ يەگەرى, فيلولوگيا عىلىمدارىنىڭ دوكتورى, پروفەسسور تۇرسىنبەك كاكىش ۇلىنىڭ تۋعانىنا 95 جىل تولۋىنا وراي دوڭگەلەك ۇستەل ءوتتى. اتالعان ءىس-شارا سىنشى-عالىم, جازۋشى تۇرسىنبەك كاكىش ۇلىنىڭ قازاق ادەبيەتىنىڭ وركەندەۋىنە قوسقان ۇلەسىن باعالاۋ, ۇلتجاندىلىعى مەن ادەبيەتكە دەگەن ادالدىعىن كەلەر ۇرپاققا, قازىرگى جاستارعا ۇلگى ەتۋ, سونىمەن بىرگە عالىمنىڭ ارتىندا قالعان مۇراسىن دارىپتەۋ, ونىڭ رۋحىنا قۇرمەت كورسەتۋدى ماقسات ەتتى.
دوڭگەلەك ۇستەلدى اقىن, قازاقستان جازۋشىلار وداعىنىڭ حاتشىسى, نۇر-سۇلتان قالاسى فيليالىنىڭ ديرەكتورى داۋلەتكەرەي كاپ ۇلى جۇرگىزىپ, ت.كاكىش ۇلىنىڭ قازاق ادەبيەتىنە قوسقان وراسان زور ەڭبەگىنە, ۇستازدىق جولىنا توقتالا كەلىپ, ەلورداداعى جاڭادان اشىلاتىن №94 مەكتەپ-گيمنازياسىنا تۇرسىنبەك كاكىشەۆ ەسىمىن بەرۋ تۋرالى ۇسىنىستار ايتىلعانىن, ەلوردا اۋەجايى ماڭىنداعى كوتتەدجدەر قالاشىعىندا عالىم اتىنا كوشە بەرىلگەنىن قۋانىشپەن ايتىپ ءوتتى, ءارى ۇستازى تۋرالى جىلى ەستەلىكتەرمەن ءبولىستى.
ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور ديحان قامزابەك ۇلى عالىمنىڭ ۇلتتىق ادەبيەت عىلىمىنا جاناشىرلىعى, ادالدىعى كەيىنگى ۇرپاققا ۇلگى بولادى دەي كەلىپ: «ول عىلىمعا سالىستىرمالى تۇردە كەش كەلدى, بىراق ۇلكەن مەكتەپ دايارلاپ كەتتى, عالىمنىڭ سۇبەلى ەڭبەگى ادەبيەت جانە ونەر, سىن سالاسىنىڭ قالىپتاسىپ-دامۋىندا ۇلكەن باعدار بولدى دەپ ەسەپتەيمىز. اسىرەسە 1986 جىلعى جەلتوقسان كوتەرىلىسى كەزىندەگى ازاماتتىق ۇستانىمى تۋرالى بولەك ايتۋعا بولادى, ول كەزدە دەكان كەزى. «ساداقتىڭ» رۋحى مەن مازمۇنى دا الاش تاقىرىبى بولدى. ول قازاق زيالىلارىنا تۇتاس قاراي الدى. ەۋرازيا ۇلتتىق ۋنيۆەرسيتەتىندە عالىم اتىندا مەموريالدىق كىتاپحانا بار. كەلەشەكتە تۇرسەكەڭنىڭ رۋحىنداعى جاڭا زەرتتەۋلەر دۇنيەگە كەلەدى دەپ سەنەمىز» دەپ قورىتىندىلادى.
ۇلتتىق عىلىم اكادەمياسىنىڭ اكادەميگى, فيلولوگيا عىلىمدارىنىڭ دوكتورى, پروفەسسور باۋىرجان ومار ۇلى ۇستاز تۇرسىنبەك كاكىشەۆ تۋرالى: «بۇگىن ءبارىمىزدىڭ ۇستازىمىز, اعا بۋىننىڭ ىشىندەگى وتە زيالى ادام رەتىندە, ايتاتىنىن ەشكىمنەن قايمىقپاي ايتاتىن ازامات رەتىندە ۇلتىمىزدىڭ تاريحىندا قالعان تۇرسىنبەك اعامىزدى ۇلىقتاۋ ءۇشىن جينالىپ وتىرمىز. قازىرگى ۇرپاق تاريحقا قاراعان كەزدە اينالىپ سوعاتىن «جيىرما جەتىنشى جىلعىلار» دەگەن ءبىر ۇعىم بار. سەرىك قيراباەۆ, تۇرسىنبەك كاكىشەۆ, زەينوللا قابدولوۆ, ءمۇسىلىم بازارباەۆ, نىعمەت عابدۋللين, راحمانقۇل بەردىباەۆ, ۇشكىلتاي سۇبحانبەردينا, تەلعوجا جانۇزاق,...بۇل ءتىزىمدى جالعاستىرا بەرۋگە بولادى. بۇلاردىڭ بارلىعى جيىرما جەتىنشى جىلعىلار. وسىلاردىڭ ىشىندە توقسان بەس جاسىن كوزىمەن كورگەن تەلعوجا جانۇزاق اعامىز. وسى جيىرما جەتىنشى جىلعىلاردىڭ اراسىنداعى عيبراتتى عالىم, ۇلاعاتتى ۇستاز, ابىرويلى اقساقال, ارداقتى اعا تۇرسىنبەك كاكىشەۆتىڭ ورنى بولەك. ول عىلىمداعى كەيىنگى بۋىنعا جاقسى قارادى, بارىنە جول اشتى, جاستاردى قولدادى, قولداۋىن كورگەننىڭ ءبىرىمىز. ول كىسى الىس-جاقىن شەتەلدەردىڭ ارحيۆتەرىن تۇگەل ءسۇزىپ شىققان ادام, قاي ارحيۆكە بارساڭ دا تۇرسەكەڭنىڭ قولى تۇراتىن», دەگەن جۇرەكجاردى ويىن ايتتى.
ۇلتتىق عىلىم اكادەمياسىنىڭ كوررەسپوندەنت-مۇشەسى, فيلولوگيا عىلىمدارىنىڭ دوكتورى امانتاي ءشارىپ جانە عالىمنىڭ ءىنىسى جەڭىس ەسىم ۇلى دا اتالعان ءىس-شاراعا ارنايى قاتىسىپ, اكادەميك تۋرالى ەستەلىكتەرىمەن ءبولىستى. ساياساتتانۋشى, قازاقستاننىڭ ەڭبەك سىڭىرگەن قايراتكەرى سەيداحمەت قۇتتىقادام, پۋبليتسيست, اۋدارماشى قايىربەك سادۋاقاسوۆ, اقىن باقىتجان توباياقوۆ, فيلولوگيا عىلىمدارىنىڭ دوكتورى, پروفەسسور راحىمجان تۇرىسبەك, جازۋشىلار توكەن ءالجان, ءجادي شاكەن ۇلى, ايگۇل كەمەلباەۆا, الاشتانۋشى, پروفەسسور ساعىمباي جۇماعۇل, شايسۇلتان شاياحمەتوۆ اتىنداعى ءتىل-قازىنا عىلىمي-پراكتيكالىق ورتالىعىنىڭ ديرەكتورى ەربول تىلەشەۆ سياقتى زيالى قاۋىم وكىلدەرى دە ءىس-شاراعا قاتىستى. قازاق ادەبيەتىنىڭ ءوسىپ-وركەندەۋىنە ەرەكشە ۇلەس قوسقان عالىمنىڭ ەسىمى ۇلىقتالا بەرەتىنى ءشۇباسىز.
