قىلقالام شەبەرىنىڭ شىعارمالارىنىڭ كوپشىلىگى ادەبي نەمەسە تاريحي تاقىرىپتاردى قوزعايدى. اڭىزدار مەن ەرتەگىلەر سۋرەتشىنى ەرەكشە تاڭ قالدىردى. كومپوزيتسياعا قاتىسۋشىلاردىڭ ءبارى سوڭعى مينۋتقا دەيىن دۇربەلەڭ ىشىندە جۇرەدى. وقتاۋلى مىلتىقتار, وتكىر پىشاقتار جانالعىش قۇرال عانا ەمەس, قورعانىش جانە اجالعا اراشا. شىعارمانىڭ ەموتسيونالدى قارقىندىلىعى اۆتوردىڭ بارلىق تۋىندىسىنا ءتان قۇبىلىس. مۇنى ونەرتانۋشىلار دا ايتادى.
كارتيناعا كوز سالساڭىز, ەكى اڭشى تاۋ وزەنىنىڭ جانىندا اعاشقا سۇيەنگەن جارتاستى قالقان ەتكەن. ولاردىڭ اشىق قىزىل جانە اق ءتۇستى كيىمى اعاش كولەڭكەسىنەن اڭعا كورىنبەيدى. كەيىپكەرلەردىڭ قول-اياقتارى اڭ پاتشاسىنىڭ ارەكەتىن قايتالاپ تۇرعانداي. الداعى بولار وقيعانى ىشتەي تۇيسىنگەن اڭشىلار ۇلكەن پىشاقتى كەيىنگە قالدىرعان. بۇل دەتال ءتۇبى ولاردىڭ ارىستاننان ايلاسىن اسىرىپ, ولجاعا كەنەلەتىنىن اڭعارتادى.
باقساڭىز, جارقىراعان كوگىلدىر اسپان مەن تاۋ اعىنى اعاش پەن جارتاستاردىڭ تەرەڭ كولەڭكەسىن كەسىپ ءوتىپ, جارىقتىڭ تەپە-تەڭدىگىن بۇزادى. بۇل – بەيبىت تاۋ پەيزاجى جالپى سيۋجەتتىڭ ءديناميزمىن كۇشەيتەدى. ابدەن شىنىققان قوس اڭشى كۇنى بويى ارىستاندى اڭدىعانىن بايقايمىز. ەكەۋى دە ۇرىسقا ساقاداي ساي. ال اڭ بولسا, ءتۇبى تۇزاققا تۇسەرىن باعامدايتىن سەكىلدى.
ەجەن دەلاكرۋا كارتينامەن جۇمىس ىستەي وتىرىپ, 1855 جىلى پاريجدە وتكەن دۇنيەجۇزىلىك كورمەدە ۇسىنىلعان «ارىستان اۋلاۋ» تاقىرىبىن قايتا تاڭداپ الادى. سونىمەن ءرومانتيزمنىڭ نەگىزىن سالۋشى ەكزوتيكالىق ەلدەرگە ساياحاتتاپ, اكادەميالىق ەسكى الەم مادەنيەتىنىڭ جاڭا جارقىن ءستيلى مەن ەرەكشە سيۋجەتتەرىن ومىرگە اكەلدى.
