ZOOM پلاتفورماسىندا ۇيىمداستىرىلعان باسقوسۋعا اۆتوموبيل جولدارى كوميتەتىنىڭ توراعاسى تولەگەن ابدۋللين, «قازاۆتوجول» ۇك» اق, «قازاقاۆتوجول» جشس باسشىلارى, تاۋەلسىز ساراپشىلار مەن جۇك جانە جولاۋشىلار تاسىمالداۋشى كومپانيالاردىڭ وكىلدەرى قاتىستى.
«قازاقاۆتوجول» جشس اقپاراتىنا سۇيەنەر بولساق, ارنايى تەحنيكالاردىڭ قىسقى كەزەڭگە دايىندىعى 74 پايىزدى قۇرايدى. كومپانيا باسشىسى سامات عيلىموۆتىڭ ايتۋىنشا, الداعى ماۋسىمدىق جۇمىستار ءۇشىن جەكە تۇلعالاردان 400 دانا تەحنيكانى جالعا الۋ قاجەتتىلىگى تۋىنداپ وتىر.
«قازىرگى تاڭدا بىزگە 2 836 دانا تەحنيكا قاجەت. ال قولىمىزدا بار-جوعى 1 117 بىرلىك تەحنيكا بار. ونىڭ 527-ءسىنىڭ توزىعى جەتكەن. جوندەۋگە دە كەلمەيدى», دەپ اتاپ ءوتتى سامات عيلىموۆ.
سونداي-اق ول ەڭبەكاقى مولشەرى 30 پايىزعا ارتقانىمەن بىلىكتى ماماندارعا دەگەن تاپشىلىق سەزىلىپ وتىرعانىن ايتتى.
«مينيسترلىك تاراپىنان قولداۋدىڭ ارقاسىندا مەكەمە جۇمىسشىلارىنىڭ جالاقىسى كوتەرىلدى. بۇگىندە قىزمەتكەرلەر جەتىسپەۋشىلىگى بىرتىندەپ ازايىپ كەلەدى. دەسە دە جوعارى بىلىكتى ماماندارعا دەگەن زارۋلىك تۋىنداۋى مۇمكىن ەكەندىگىن جوققا شىعارمايمىز», دەدى «قازاقاۆتوجول» باسشىسى.
