ءبىلىم • 16 تامىز، 2022

شالعايداعىلار شاعىم ايتادى

63 رەت كورسەتىلدى

ستاتيستيكاعا سۇيەنسەك، كەرەكۋ وڭىرىندە 212 شاعىن جيناقتى مەكتەپ بار. وسىدان ءبىراز جىل بۇرىن وبلىس باسشىلىعى وڭىردە بولاشاعى جوق اۋىلدار دەپ تانىلعان شالعاي ەلدى مەكەندەردىڭ مەكتەپتەرىن جاپپاق بولىپ، ەل-جۇرتتى شۋلاتقانى ەسىمىزدە. ونداعان شاعىن ءبىلىم مەكەمەسى انە جابىلادى، مىنە جابىلادى دەپ ءجۇرىپ، كوپتىڭ تىلەۋىمەن اۋپىرىمدەپ ساقتالىپ قالدى. ونسىز دا الاقانداي اۋىلدىڭ ۇيىتقىسىنا، تۇرعىنداردىڭ قوتارىلا كوشىپ كەتپەۋىنە سەپ بولىپ وتىرعان مەكتەپتەردىڭ كەيبىرىندە ءالى دە ماسەلە جەتەرلىك. اسىرەسە مودەرنيزاتسيا يگىلىگىنە ىلىگە الماي وتىرعانى قىنجىلتادى.

ماسەلەن، باياناۋىل اۋدانىنداعى ق.كەمەڭگەروۆ اتىنداعى ورتا مەكتەپ ديرەكتورى ءماديان قابدۋوۆا اۋىلدىق جەردە مۇعالىمدەر جەتىسپەۋشىلىگى بارىن ايتادى. ءارى ينتەرنەت جىلدامدىعىنا دا كوڭىل تولمايدى.

– ءبىلىم سالاسىنا جاۋاپتى مەكەمەلەر اۋىلدىق مەكتەپتەردە قىزمەت ەتەتىن مۇعالىمدەرگە قارايلاسسا ەكەن دەيمىز. قازىر اۋىل مەكتەپتەرىندە مۇعالىمدەر تاپشى. مامان جەتىسپەۋشىلىگىنە بايلانىستى ءبىر مۇعالىم بىرنەشە پاننەن ساباق بەرۋگە ءماجبۇر. بۇل دەگەنىمىز – ۇستاز جۇمىسىن ەكى ەسە كوبەيتەدى دەگەن ءسوز. اسىرەسە قاعاز جۇمىستارى، ەسەپ بەرۋ، كۇندەلىك تولتىرۋ كوپ ۋاقىتتى الادى. قازىر كۇندەلىك ەلەكتروندى فورمات تۇرىندە بولعاندىقتان، كەيدە Kundelik.kz سايتىنا كىرۋدىڭ ءوزى كوپ ۋاقىتتى الادى. سوندىقتان كەڭجولاقتى ينتەر­نەتتىڭ ساپاسى ءبىز ءۇشىن وتە ما­ڭىز­دى، – دەيدى مەكتەپ باسشىسى.

ەلەكتروندى «كۇندەلىك» جۇيەسىنە وبلىستىڭ بارلىق مەكتەبى 100 پا­يىز قوسىلعان. وبلىستىق ءبىلىم بەرۋ باس­قار­ما­سىنىڭ باسشىسى سامال ايت­قا­زينا وسىلاي دەپ اقپار بەردى. بۇگىن­دە قوسىلعان قولدانۋشىلاردىڭ بار­لىعى، ياعني 211 881 اككاۋنت پورتالدى جۇيەلى تۇردە قول­دانادى. 2022-2023 وقۋ جىلىندا وڭىردە 359 مەكتەپ (355-ءى - مەملەكەتتىك، 4-ەۋى - جەكە مەنشىك) جۇمىس ىستەيتىن بولادى، ونىڭ ىشىندە 271 اۋىل مەكتەبى بار. وبلىستىڭ ەكى مەكتەبى تەح­نيكالىق مۇمكىندىكتىڭ جەتكىلىك­سىز­­دىگىنەن كەڭجولاقتى ينتەرنەت­كە قو­سىلماعان. ولار – ماي اۋدا­نىنداعى اقشيمان اۋىلدىق مەكتەبى جانە ۋسپەن اۋدانىنىڭ دميت­ريەۆكا اۋىلىنداعى ءبىلىم ورداسى. «قوس اۋىلدا ۇيالى بايلانىس بار. ءبىلىم ۇيىمدارى ۇيالى بايلانىس وپەراتورلارىنىڭ جىلدامدىعى تومەن ينتەرنەتىن پايدالانادى. بۇل ماسە­لە جەرگىلىكتى اتقارۋ ورگاندارىنىڭ با­قى­لاۋىندا، الداعى ۋاقىتتا ماسەلە شەشىلەدى»، دەپ سەندىردى باسقارما باسشىسى.

شاعىن جيناقتى مەكتەپتەردىڭ باسىم بولىگى بۇگىندە ەسكىرىپ تۇرعانى دا راس. عيماراتتارى مەن ينجەنەرلىك جەلى­لە­رى ابدەن توزعان نىساندار جىل سا­يىن اعىمداعى جوندەۋمەن عانا شەكتەلىپ كەلە جاتقانى دا بەلگىلى. بيىل «زاماناۋي مەكتەپ»، «اۋىل – ەل بەسىگى» باعدارلامالارى اياسىندا وبلىس بويىنشا 46 مەكتەپكە جوندەۋ جۇرگىزىلىپ جاتىر. مەكتەپتەردى مودەرنيزاتسيالاۋ بو­يىنشا 33 نىسان، «زاماناۋي مەكتەپ» اياسىندا 4 مەكتەپ جانە «اۋىل – ەل بەسىگى» بويىنشا 9 ءبىلىم وشاعى جوندەلۋدە. بارلىعىنا قازىنادان 10 ملرد تەڭگەدەن استام قاراجات بولىنگەن. اتاپ وتەرلىگى، سوڭعى 3 جىلدا ايماقتا «زاماناۋي مەكتەپ» باعدارلاماسى تابىستى جۇزەگە اسۋدا. 2025 جىلعا دەيىن بۇل باعدارلاما ارقىلى 85 مەكتەپ كۇردەلى جوندەلىپ، جاڭا كەيىپكە ەنەدى دەپ جوسپارلانعان. ورتا مەكتەپتەردى زامانعا ساي جاڭارتىپ، ارنايى سىنىپتاردى جاڭا تەحنولوگيالارمەن جاب­دىقتاۋدى ماقسات ەتكەن وڭىرلىك جو­باعا كوبىنە قالالىق جانە قالالارعا جاقىن ورنالاسقان ءبىلىم مەكەمەلەرى ەنىپ وتىر­عانىن ايتۋ كەرەك. شاھارلاردىڭ بيۋدجەتى جەتكىلىكتى. ونسىز دا قىسقا ءجىبى كۇرمەۋگە كەلمەيتىن اۋداندارعا وڭىر­لىك باعدارلامانى تولىعىمەن بۇ­رىپ، اۋىل مەكتەپتەرىن، ونىڭ ىشىندە شاعىن جيناقتى مەكتەپتەردى جاڭار­تاتىن ۋاقىت جەتكەن سىڭايلى. اۋىل جۇرتىنىڭ سۇراۋى دا وسى.

 

پاۆلودار وبلىسى

سوڭعى جاڭالىقتار

ۇقساس جاڭالىقتار