«بالانى مەكتەپكە جينايىق» اكتسياسى پارتيالىق «باقىتتى وتباسى» جوباسى اياسىندا ءداستۇرلى تۇردە وتكىزىلەدى. ونىڭ باستى ماقساتى – كوپبالالى جانە از قامتىلعان وتباسىلارعا بالالارىن 1 قىركۇيەككە دەيىن مەكتەپكە دايىنداۋعا كومەكتەسۋ.
اكتسياعا پارتيانىڭ ورتالىق اپپاراتى مەن ايماقتىق فيليالدارىنىڭ قىزمەتكەرلەرى, پارتيا دەپۋتاتتارى, باستاۋىش پارتيا ۇيىمدارىنىڭ مۇشەلەرى جانە قاراپايىم ازاماتتار قاتىسادى.
اكتسيا اياسىندا ەل اۋماعىنداعى 30 مىڭنان استام بالا جاڭا وقۋ جىلىنا ارنالعان جيىنتىقتار الادى دەپ جوسپارلانىپ وتىر. ياعني, ولارعا مەكتەپ فورماسى, وقۋلىقتار مەن كەڭسە تاۋارلارى سالىنعان ريۋكزاكتار تابىستالادى.
ماسەلەن, بۇگىن پاۆلوداردا پارتيالىقتار التى بالانى جالعىز ءوزى تاربيەلەپ وتىرعان ۆالەنتينا گريگورەۆانىڭ شاڭىراعىنا باردى.
«بالالار تەز وسەدى عوي. جىل وتكەن سايىن ولاردى جاڭا وقۋ جىلىنا دايىنداۋ قيىنعا سوعىپ بارادى. وتكەن اپتادا پارتياعا جۇگىنگەن بولاتىنمىن. بۇگىن قاجەت زاتتىڭ ءبارىن الىپ كەلدى», دەدى كوپبالالى انا ۆالەنتينا گريگورەۆا.
ال وسكەمەندە اماناتتىقتار مۇشەلباەۆتار وتباسىنا باردى. ەربول جانە اسەل ەسىمدى ەرلى-زايىپتىلار ءتورت بالا تاربيەلەپ وتىر. سوندىقتان جاڭا وقۋ جىلى قارساڭىندا پارتيا كومەگى ۋاقتىلى قولداۋ بولدى.
«كوبالالى وتباسىلار ءۇشىن بالاقايلاردى جاڭا وقۋ جىلىنا دايىنداۋ – ۇلكەن جۇكتەمە. پارتيانىڭ مۇنداي باستاماسى ءبىز ءۇشىن قوماقتى قولداۋ», دەدى كوپبالالى انا اسەل مۇشەلباەۆا.
