قوعام • 15 تامىز، 2022

جول اقىسىنا جاڭا تاريف ەنگىزىلەدى

46 رەت كورسەتىلدى

پاۆلودارداعى قوعامدىق كولىكتە جىل سوڭىنا دەيىن سارالانعان تاريف ەنگىزىلمەكشى. شاھارداعى اتقارۋشى بيلىك وكىلدەرى الداعى ۋاقىتتا اۆتوبۋس پەن ترامۆايداعى جول ءجۇرۋ قۇنى 130 تەڭگە بولادى دەپ وتىر. بۇل – اقشانى قولما قول تولەگەن جاعدايدا قويىلاتىن باعا. ال Avtobys جۇيەسىن پايدالانىپ، ارنايى كارتامەن نەمەسە QR-كود ارقىلى سمارتفوننان تولەسەڭىز، بۇرىنعىشا 80 تەڭگەمەن جۇرە بەرەسىز.

مۇنى قوعامدىق كولىك مارشرۋتتارىن ۇيىمداستىرۋشى كاسىپورىنداردىڭ باس­شىلىعى مەن ەلەكتروندى تولەم جۇ­يە­سىنىڭ وكىلدەرى كۇن سايىن جولاۋشى­لار­دان تۇسەتىن پايدانى باقىلاۋ ءۇشىن جاساپ وتىرعاندارى ءسوزسىز.

– بۇگىنگى كۇنى وبلىس ورتالىعىنىڭ قو­عامدىق كولىك باعىتتارىنداعى بار­لىق تاسىمالداۋشى «سمارت اۆتوبۋس پۆ» جشس-نىڭ بىرىڭعاي وپەراتورىمەن جۇمىس ىستەيدى. وسى جىلدىڭ العاشقى جارتىسىندا قوعامدىق كولىكتى 9،1 ملن جولاۋشى قولدانسا، ونىڭ ىشىندە 3،8 ملن ادام قولما-قول تولەم جا­ساعان. ال 5،3 ملن ازامات، ياعني 58،2 پايىزى جول ءجۇرۋ قۇنىن كارتامەن تو­لە­گ­ەن. ەندىگى كەزەكتە سارالانعان تاريفتى ەنگىزۋ ەلەكتروندى بيلەت ۇلەسىن ارت­تىرۋعا مۇمكىندىك بەرەدى، – دەيدى قا­لا­لىق تۇرعىن ءۇي-كوممۋنالدىق شا­ر­ۋا­شىلىعى، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى ارسلان قالياقباروۆ.

بيىل قالاداعى اۆتوبۋستار، شاعىن اۆتوبۋستار مەن ترامۆايلاردىڭ بار­لى­عى Avtobys جۇيەسىن پايدالانۋعا كوش­كەن. جولاۋشىلار قوعامدىق كولىككە مىنگەندە جول اقىسىن كارتامەن تولەيدى. بىراق تولەمدى اقشالاي بەرگەندى قۇپ كورە­تىندەر ءالى دە ازايماي تۇر. كولىك كار­تالارىن پايدالانۋدىڭ شەكتى مەرزىمى جوق. پاۆلودار قالاسىنداعى قوعامدىق كولىكتەردە كوپبالالى انالار، مۇمكىندىگى شەكتەۋلى جاندار، اۋعان سوعىسىنىڭ ارداگەرلەرى سىندى 14 توپ وكىلى تەگىن، زەينەتكەرلەر 50 پا­­يىزدىق جەڭىلدىكپەن قاتىنايدى. قا­ريالار تولەۋگە ءتيىس جولاقىنىڭ قال­عان بولىگىن جەرگىلىكتى بيلىك وتەيدى. «با­لا­لار جىلىنا» وراي وبلىس اكىمى­نىڭ شەشىمىنەن بيىل پاۆلودار، ەكى­باس­تۇز جانە اقسۋ قالالارىنداعى بالا­لار قوعامدىق كو­لىك­تە تەگىن جۇرۋگە مۇم­كىن­دىك العانىن دا ايتىپ وتكەن ابزال.

جوعارىدا اتالعان ساناتتارعا جاتاتىن تۇرعىنداردىڭ قانشاسى قوعامدىق كو­لىكپەن جۇرەتىنىن ەشكىم بىلمەيدى. سونىڭ سالدارىنان بيلىك پەن تاسىمالداۋشىلار اراسىندا تۇسىنىسپەۋشىلىك تۋىنداپ كەلگەن. مۇنداي جاعدايدىڭ الدىن الىپ، كومپانيالارعا سۋبسيديا تولەۋدى ءبىر ىزگە كەلتىرۋ ءۇشىن جولاۋ­شى­لار­دىڭ ناقتى سانى قاجەت ەكەن.

– ونى تەك ەلەكتروندى بيلەت جۇيەسى ارقىلى انىقتاۋعا بولادى. سوندىقتان وسى جىلدىڭ ناۋرىز ايىنان باستاپ «سمارت اۆتوبۋس پۆ» ترامۆايلار مەن ۇلكەن كلاستى اۆتوبۋستارعا پلانشەتتەر (ستاتسيونارلى ۆاليداتورلار) جانە ءموبيلدى ۆاليداتورلار ورناتتى. ءبىزدىڭ باستى مىندەت – ءبىر كۇندە، ءبىر ساعاتتا، ءتىپتى مينۋتىنا دەيىن نەشە ادامنىڭ قوعامدىق كولىككە كىرىپ-شىق­قا­نىن، ولاردىڭ قانداي تولەم ءتاسىلى ارقىلى جولاقىسىن وتەگەنىن جانە قاي ايالدامادان وتىرىپ، قايسىسىنان تۇسكەنىن كورسەتۋ، – دەيدى «سمارت اۆتوبۋس پۆ» جشس تەحنيكالىق ديرەكتورى تالعات توقتاعانوۆ.

وبلىس ورتالىعىندا بۇگىندە ۇلكەن جانە شاعىن اۆتوبۋستاردىڭ جەت­پەي­تىنى دە بايقالادى. وڭىرلىك كولىك جۇر­گى­زۋشىلەر وداعى قاۋىمداستىعىنىڭ پرەزيدەنتى ۆاسيلي رۋداكوۆ ايماق بو­يىن­شا 100-گە جۋىق اۆتوبۋس جۇر­گىزۋشىسى قا­جەت ەكەنىن ايتادى. كولىكتەردەگى جول اقىسى باقىلانا باستاعالى بۇرىنعى جۇرگىزۋشىلەردىڭ كوبى جۇمىستان شىعىپ كەتكەن. سەبەبى ولاردىڭ بۇعان دەيىن تاپقان تابىسىن ەشكىم باقىلاماي، ءار اۆتوبۋستىڭ تىزگىنىندەگى جۇرگىزۋشى مەن كوندۋكتور كۇندەلىكتى تۇسكەن قاراجاتقا وزدەرى بي، وزدەرى قوجا بولعان.

«الەۋمەتتىك ماڭىزى بار باعىت­تار­دى سۋبسيديالاۋ جۇرگىزىلۋدە، بىراق بۇل قالاداعى كولىك جۇمىسىن جاقسارتۋعا جەت­كىلىكسىز. ولقىلىقتىڭ شەشىمى – ەلەك­تروندى بيلەت جۇيەسىن پايدالاناتىن تۇرعىنداردىڭ سانىن كوبەيتۋ. قازىر زەينەت جاسىنداعى ازاماتتار قولما-قول تولەم كەزىندە جول ءجۇرۋ قۇنى ءۇشىن 40 تەڭگە تولەپ ءجۇر. ال سارالانعان تاريف ەنگىزىلگەندە ولار كارتاسى جوق بولسا 65 تەڭگە تولەۋى مۇمكىن. بىراق بۇل بو­يىنشا ناقتى شەشىم قابىلدانعان جوق»، دەيدى ءبولىم جەتەكشىسى ارسلان قالياقباروۆ.

ايتپاقشى، كوپشىلىك Avtobys جۇيە­سى­نىڭ QR-كودىن kaspi.kz قوسىمشاسى ارقىلى سكانەرلەپ، تولەم جاساۋ مۇم­كىن­دىگىن ەنگىزۋدى سۇراپ كەلەدى. بۇل تۇر­عىن­دار ءۇشىن ىڭعايلى بولار ەدى. الايدا «سمارت اۆتوبۋس پۆ» بۇل بويىنشا بانك­پەن كەلىسە الماي وتىرعان كورىنەدى. قارجى ۇيىمى ولارعا كۇنىنە قانشا تولەم جاسالعانى تۋرالى اقپارات بەرۋدەن باس تارتامىز دەگەن تالاپ قويىپتى.

 

پاۆلودار وبلىسى

سوڭعى جاڭالىقتار

ءوڭىر جانە وركەنيەت

ساياسات • كەشە

اعا بۋىننىڭ قولداۋى

ساياسات • كەشە

ەسىمنەن كەتپەس ەساعاڭ

رۋحانيات • كەشە

بار ءۇمىت – بۋبليكتە

تەننيس • كەشە

وقىرماننىڭ رۋحاني ولجاسى

ەگەمەن قازاقستان • كەشە

ۇقساس جاڭالىقتار