تۇرعىنداردىڭ جانايقايىن ەڭ اۋەلى الەۋمەتتىك جەلىدە تاراعان بەينەۇندەۋدەن بايقادىق. وندا امانگەلدى اۋىلىنىڭ حالقى وبلىستىڭ جولاۋشىلار كولىگى جانە اۆتوكولىك جولدارى باسقارماسىنان كومەك سۇراعان. ەلدى مەكەن قازاقستان مەن رەسەيدىڭ ءدال شەكارا تۇبىندە ورنالاسقان. اۋىلدان «ۇلكەن تراسساعا» شىعاتىن جول بىرەۋ عانا, ول «لەنين – ەرتىس – رۋسسكايا پوليانا» رەسپۋبليكالىق جولىنا بارىپ تۇيىسەدى. ال ول ماگيسترالدىڭ 4 شاقىرىمعا جۋىق بولىگى رەسەيدىڭ ومبى وبلىسىنا كىرىپ تۇر. 1 تامىزدان باستاپ رەسەي جاعى جولدىڭ اتالعان ۋچاسكەسىن جاۋىپ, اۆتوكولىكتەردىڭ كەز كەلگەن تۇرىنە جۇرۋگە تىيىم سالىپتى. ال «لەنين – ەرتىس – رۋسسكايا پولياناعا» قىزمەت كورسەتۋ قۇزىرى «قازاۆتوجول» اق-عا جۇكتەلگەن.
ەرتىس اۋدانىنىڭ اكىمدىگى جۋىقتا لەنين اۋىلى ارقىلى رف ۋچاسكەسىنە دەيىن وتەتىن ۇزىندىعى 17 شاقىرىم جولدىڭ امانگەلدى اۋىلىنا كىرەبەرىسىن رەكونسترۋكتسيالاۋ, ءارى توپىراق جامىلعىسىن اسفالت-بەتونعا اۋىستىرۋ جوباسىن ازىرلەگەن ەكەن. ودان سوڭ اينالما جول دايىندالعان. الايدا مەردىگەرلەر توسەگەن اينالما جول جاۋىنعا شىداس بەرمەي, مي باتپاققا اينالىپ كەتكەن. سالدارىنان اۋىل حالقى ىرگەدە تۇرعان لەنين ەلدى مەكەنىنە جەتە الماي ازاپقا ءتۇسىپ وتىر.
اۋىل تۇرعىنى قاديشا راحمەتوۆانىڭ ايتۋىنشا, امانگەلدىدە 300-گە جۋىق ادام تۇرادى. كوبى – زەينەتكەر مەن بالا.
«بۇل – ءبىزدى سىرتقى الەممەن بايلانىستىراتىن جالعىز جول. اۋىلعا اۆتوبۋس كىرە الماي قالدى. جەڭىل كولىكتەر اينالما جولدا باتىپ جاتىر. جول ماشاقاتى بيىل عانا ەمەس, 8 جىلدان بەرى جالعاسىپ كەلە جاتىر. جاڭبىر جاۋسا, كەلەسى كۇنى جولدىڭ دەگدىگەنىن كۇتىپ وتىرامىز. كورشى اۋىلدان ازىق-ت ۇلىك اكەلۋگە, اۋدان ورتالىعىنداعى اۋرۋحاناعا كورىنۋ ءۇشىن وسى جولمەن جۇرەمىز. قۇداي بەتىن اۋلاق قىلسىن, اۋىلدا ادام قاتتى اۋىرا قالسا, اۋرۋحاناعا جەتە المايتىنى انىق. ءبىزدىڭ ەلدى مەكەندە, ءتىپتى ناۋبايحانادا جوق», دەگەن شاعىمىن جەتكىزدى تۇرعىن.
امانگەلدى اۋىلدىق وكرۋگىنىڭ اكىمى الماگۇل شارمانوۆا ماسەلەنى جاقسى بىلەدى. اپتا باسىندا جاڭبىر ءبىر تاۋلىكتەن اسا جاۋعاندىقتان اۋىلداستارىن كەلەسى كۇنى 18 شاقىرىم جەردە تۇرعان لەنين اۋىلىنا ۇزاق ءجۇرىپ ارەڭ جەتكىزگەنىن ايتادى. اۋىلدا ازىق-ت ۇلىك دۇكەنى جوق بولۋىنا بايلانىستى حالىق اۋدان ورتالىعىنا بارىپ ساۋدا جاسايدى. اكىمنىڭ ءوزى بۇل اۋىلدا 38 جىل بويى تۇراتىنىن, رەسپۋبليكالىق جولدىڭ شىرعالاڭى كوپتەن بەرى جالعاسىپ وتىرعانىن قىنجىلا ايتتى.
وبلىستىڭ جولاۋشىلار كولىگى جانە اۆتوكولىك جولدارى باسقارماسى ءوز كەزەگىندە بۇگىندە اتالعان اينالما جولدىڭ بەتكى قاباتى ينەرتتى ماتەريالدارمەن نىعايتىلىپ جاتقانىن حابارلادى. 10 تامىز كۇنى باسقارما مەن «قازاۆتوجول» جانە «قازاقاۆتودور» مەكەمەلەرىنىڭ وكىلدەرى اتالعان ۋچاسكەگە بارىپ, ماسەلە تۋىنداپ تۇرعان تۇستىڭ بارلىعىن قاعازعا ءتۇرتىپ الىپتى. ايتۋلارىنشا, الداعى ۋاقىتتا بۇل جەردە ارنايى تەحنيكالار سانى كوبەيتىلەدى.
دەي تۇرعانمەن, امانگەلدىلىك جۇرت ماسەلەنىڭ بىردەن شەشىلە سالاتىنىنا كۇمانمەن قاراپ وتىر. قازىر كۇن ىسىپ, جاڭبىر باسىلعانىمەن كۇزدە اينالما جول تاعى مي باتپاققا اينالا ما دەگەن قاۋىپ بار. قوڭىز كۇزدە بۇل جولمەن قىسقا قاجەت مال ازىعى مەن وتىن-سۋىن تاسىمالدايتىن اعايىن جول ازابىن تاعى تارتارى انىق.
پاۆلودار وبلىسى,
ەرتىس اۋدانى
