ءىس-شارا الدىندا قاتىسۋشىلار ابايدىڭ ەسكەرتكىش تاقتاسىنا گۇل شوقتارىن قويىپ, ۇلى شايىردىڭ ەسىمىن قۇرمەتپەن ەسكە الدى.
قازاقستان ەلشىسى سەرجان ابدىكارىموۆ ءوز سوزىندە قوناقتاردى ايتۋلى كۇنمەن قۇتتىقتاي وتىرىپ, قازاق حالقىنىڭ رۋحاني بايلىعى بولىپ تابىلاتىن ابايدىڭ باعا جەتپەس شىعارماشىلىق مۇراسى بولاشاق ۇرپاق ءۇشىن ماڭگىلىك ماڭىزعا يە ەكەنىن اتاپ ءوتتى. ول ازەربايجاندىق دوستارعا ابايدىڭ «ادام بول!» اتتى ونەگەلىلىك فورمۋلاسىنىڭ مازمۇنى, ونىڭ ادامگەرشىلىككە, ەڭبەكسۇيگىشتىككە, اعارتۋشىلىققا قاتىستى ۇندەۋلەرى جونىندە ايتىپ بەردى. ابايدىڭ وزات شاكىرتتەرى قازاق حالقىنىڭ جەرگە دەگەن قۇقىعى, ءوزىن-ءوزى باسقارۋ, ءتىلى, ۇلتتىق مادەنيەتى مەن ءداستۇرىن ساقتاپ قالۋ جولىندا ارپالىسقان «الاش» پارتياسى مەن الاش اۆتونومياسىن قۇرعانى ايتىلدى.
ديپلومات ابايتانۋشىلارعا ولاردىڭ اباي شىعارمالارىن ازەربايجان تىلىنە اۋدارۋداعى جىلدار بويعى ەڭبەگى, ابايدىڭ بۇكىل تۇركى الەمى مەن دۇنيە ءجۇزى ادەبيەتى ءۇشىن قۇندى بولىپ سانالاتىن مۇراسىنا دەگەن قۇرمەتتەرى مەن سۇيىسپەنشىلىكتەرى ءۇشىن العىس ءبىلدىردى.
ءسوز العان قوناقتار اباي قازاقتىڭ ءوز حالقىنا باق-بەرەكەگە جەتەلەيتىن تۋرا جول كورسەتكەن ءبىرتۋار پەرزەنتى, عالىمى, ماقتانىشى ەكەنىن, ءارى ونىڭ ەڭبەكتەرى بۇكىل ادامزاتقا, ونىڭ ىشىندە, باۋىرلاس ازەربايجان حالقىنا دا تيەسىلى ەكەنىن اتاپ ءوتتى.
اكتسيا گەوساياسات, ءدىن, ادەبيەت جانە ونەر ماسەلەلەرىن زەرتتەيتىن بەلگىلى ازەربايجاندىق تاريحشى, پۋبليتسيست, تەولوگ تەيمۋر اتاەۆتىڭ «ابايدىڭ ۇلىلىعى نەمەسە 21 عاسىرداعى ويشىلدىڭ پورترەتىن جاساۋعا تالپىنىس» اتتى كىتابىنىڭ تۇساۋكەسەرىمەن جالعاستى. بۇل باسىلىمدا ابايدىڭ اتاقتى شىعارماسى – «قارا سوزدەرى» تالدانادى. اۆتور بۇل ەڭبەكتى ءتۇرلى قىرىنان زەرتتەگەن, ونىڭ ىشىندە اباي ويلارىن قاسيەتتى قۇرانداعى ۋاحيلەرمەن سالىستىرۋعا تىرىسقان. بۇل رەتتە اۆتور قازاق تاريحىنىڭ اقىن تۇلعاسىن قالىپتاستىرۋعا اسەر ەتكەن داڭقتى بەتتەرى مەن ابايدىڭ باسىنان وتكەن سان-الۋان جاعدايلار كورنەكتى اعارتۋشىنىڭ قازاق وي-پايىمىنا ولشەۋسىز ۇلەس قوسۋىنا مۇمكىندىك بەرگەنىن تۇسىنۋگە ۇمتىلادى.
كىتاپتىڭ تۇساۋكەسەرى قازاقستان مەن ازەربايجان اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىن مەرەكەلەۋ اياسىندا باكۋدەگى تەڭىز جاعالاۋى بۋلۆارىندا تىگىلگەن قازاقتىڭ كيىز ۇيىندە ءوتتى.
